រាជធានីភ្នំពេញ ៖ ការជួបប្រកួតឥតព្រាងទុករវាងកីឡាករជើងចាស់វ៉ាន់ ចាន់វ៉ៃ និងកីឡាផល សោភ័ណ្ឌ នៅសង្វៀនស្ថានីយទូរទស្សន៍បាយ័ន បានទទួលការចាប់អារម្មណ៍យ៉ាងខ្លាំងពីអ្នកទស្សនាដោយសារតែកីឡាករជើងខ្លាំងទាំងពីររូបនេះវាយលុកគ្នាទៅវិញទៅមកគួរឱ្យញាក់សាច់នៅគ្រប់ទឹកនៃការប្រកួត កាលពីថ្ងៃអាទិត្យទី១៩ សីហា កន្លងមកនេះ ។
រាជធានីភ្នំពេញ ៖ ការជួបប្រកួតឥតព្រាងទុករវាងកីឡាករជើងចាស់វ៉ាន់ ចាន់វ៉ៃ និងកីឡាផល សោភ័ណ្ឌ នៅសង្វៀនស្ថានីយទូរទស្សន៍បាយ័ន បានទទួលការចាប់អារម្មណ៍យ៉ាងខ្លាំងពីអ្នកទស្សនាដោយសារតែកីឡាករជើងខ្លាំងទាំងពីររូបនេះវាយលុកគ្នាទៅវិញទៅមកគួរឱ្យញាក់សាច់នៅគ្រប់ទឹកនៃការប្រកួត កាលពីថ្ងៃអាទិត្យទី១៩ សីហា កន្លងមកនេះ ។
ក្នុងពេលផ្គូផ្គងកីឡាករផល សោភ័ណ្ឌ ដែលជាជើងខ្លាំងមកពីក្លិបតាឡីដំរីមានឫទ្ធិ និងជាម្ចាស់ខ្សែក្រវាត់ស្រាបៀរកម្ពុជា បន្ទាប់ពីដណ្តើមបានពីកីឡាករជើងខ្លាំងវង្ស ណយ មកពីក្លិបកងពលតូចលេខ៣១ ត្រូវជួបប្រកួតជាមួយកីឡាករឯម ខ្លឹមខ្មៅ មកពីក្លិបគ្រុឌមានជ័យឯណោះទេ ។ ប៉ុន្តែដោយសារតែកីឡាករឯម ខ្លឹមខ្មៅ បណ្តោយខ្លួនឱ្យឡើងគីឡូលើសកីឡាករផល សោភ័ណ្ឌ ច្រើនពេក ទើបតម្រូវឱ្យមានការដោះដូរគូភ្លាមៗ ហើយជំនួសដោយកីឡាករវ៉ាន់ ចាន់វ៉ៃ មកពីក្លិបសិង្ហកីឡា ក្រុងបាត់ដំបង ។
ការប្រកួតរវាងកីឡាករបង្គោលក្រហមវ៉ាន់ ចាន់វ៉ៃ និងកីឡាករបង្គោលខៀវ ផល សោភ័ណ្ឌ កាលពីថ្ងៃអាទិត្យនោះ គ្មានអ្នកណាមិនជក់ចិត្តនោះទេ ដោយសារតែពួកគេទាំងពីរនាក់វាយលុកគ្នាទៅវិញទៅមកដែលធ្វើឱ្យសង្វៀនបាយ័នស្ទើរតែរញ្ជួយ ព្រោះតែសម្រែកហ៊ោកញ្ជ្រៀវរបស់អ្នកទស្សនា ។ចាប់ពីទឹកទី១រហូតដល់ចុងទឹកគូប្រកួតទាំងពីរវាយបកគ្នាទៅវិញទៅមកដោយមិនសំចៃឡើយ ។
ថ្វីដ្បិតថា កីឡាករទាំងពីររូបមានអាយុខុសគ្នា៦ឆ្នាំ ប៉ុន្តែកីឡាករវ័យ១៩ឆ្នាំ ផល សោភ័ណ្ឌ ត្រូវគេស្គាល់ថា ជាជើងខ្លាំងស្រករក្រោយម្នាក់ដែលធ្លាប់ប្រឡូកក្នុងការប្រកួតបានចំនួន៦៤ដងរួចមកហើយ ដោយក្នុងនោះគឺធ្លាប់ឈ្នះ៥៣ដង និងចាញ់តែ១១ដងប៉ុណ្ណោះ ។ កីឡាកររូបនេះ បានផ្តួលកីឡាករជើងខ្លាំងវង្ស ណយ ឱ្យទទួលបរាជ័យចំនួនពីរលើក គឺចាញ់ក្នុងវគ្គដណ្តើមខ្សែក្រវាត់ស្រាបៀរកម្ពុជា និងក្នុងវគ្គប្រកួតការពារខ្សែក្រវាត់មួយលើកទៀត ។ ចំណែកកីឡាករវ័យ២៥ឆ្នាំ វ៉ាន់ ចាន់វ៉ៃ វិញ ទោះជាធ្លាប់ប្រកួតរហូតដល់៩៨ដង និងឈ្នះ៧២ដង ចាញ់១៦ដង ច្រើនជាងគូប្រកួតខ្លួនក៏ពិតមែន ប៉ុន្តែក៏មិនអាចផ្តួលកីឡារផល សោភ័ណ្ឌ ឱ្យចាញ់ដាច់នោះដែរ ។ អីុចឹងហើយទើបការប្រកួតរវាងអ្នកទាំងពីរធ្វើឱ្យរញ្ជួយសង្វៀនបាយ័ន បើទោះជាកីឡាករផល សោភ័ណ្ឌ ពូកែម៉ាត់ជាង និងបានវាយឱ្យកីឡាករវ៉ាន់ ចាន់វ៉ៃ ជ្រុះធ្មេញចេញពីមាត់ក៏នៅតែវ៉ាន់ ចាន់វ៉ៃ ឈ្នះពិន្ទុ បន្ទាប់ពីគេទាត់ផង អុកជង្គង់ផង និងសម្រុកលើកីឡាករផល សោភ័ណ្ឌ ឱ្យដួលបានល្អជាងក្នុងទឹកទី៥ ។
កីឡាករផល សោភ័ណ្ឌ បញ្ជាក់ថា ខ្លួននឹងឡើងសងសឹកក្នុងការជួបគ្នាលើកទី២ បន្ទាប់ពីបានស្គាល់ថ្វីដៃសិស្សច្បងវ៉ាន់ ចាន់វ៉ៃ កាលពីជួបគ្នាលើកទី១នោះ ។ ចំណែកកីឡាករវ៉ាន់ ចាន់វ៉ៃ វិញ ក៏ប្រកាសថានឹងឡើងសង្វៀនដើម្បីប្រកួតជាមួយកីឡាករវ័យក្មេងរូបនេះជាលើកទី២ដូចគ្នា ដែលការប្រកួតលើកក្រោយនោះ គឺអាចប្រកួតដណ្តើមយកខ្សែក្រវាត់ពីកីឡាករផល សោភ័ណ្ឌ ផងក៏មិនដឹង ។ លោកនាង ស៊ីវត្ថា អ្នករៀបចំកីឡាប្រដាល់ប្រចាំនៅស្ថានីយទូរទស្សន៍បាយ័ន បានអះអាងថា ក្រោយពីការប្រកួតមិត្តភាពរវាងកីឡាករវ៉ាន់ ចាន់វ៉ៃ និងផល សោភ័ណ្ឌ ហើយឃើញពួកគេមានសមត្ថភាពស៊ីមិនដាច់នោះម្តងនេះ ស្ថានីយទូរទស្សន៍បាយ័ន នឹងរៀបចំផ្គូផ្គងឱ្យពួកគេប្រកួតសងសឹកគ្នាជាលើកទី២ ប៉ុន្តែលោកមិនទាន់ច្បាស់ថា លើកក្រោយនោះគ្រាន់តែជាការប្រកួតសងសឹក ឬជាការប្រកួតដណ្តើមខ្សែក្រវាត់ស្រាបៀរកម្ពុជា ដែលកីឡាករផល សោភ័ណ្ឌ កំពុងក្តាប់ក្នុងដៃនោះទេ ។
ក្រោយពីការប្រកួតដ៏ជក់ចិត្តរវាងគូពិសេសមួយគូនេះ ការប្រកួតសងសឹករវាងកីឡាករទី ពន្លែត មកពីក្លិបសឹករងខេត្តសៀមរាប និងកីឡាករផាន់ គ្រាន់ មកពីក្លិបព្រះខ័នរាជ ក៏ធ្វើឱ្យអ្នកទស្សនាផ្ទាល់ស្រែកចង់បាក់សាលប្រដាល់នៅស្ថានីយទូរទស្សន៍បាយ័នដែរ ដោយសារតែកីឡាករទាំងពីរនេះវាយសម្រុកគ្នាមិនដកដៃធ្វើឱ្យម្នាក់ៗជក់អារម្មណ៍ពីបច្ចេកទេសវាយបកទៅវិញទៅមករបស់ពួកគេ ។ ទីបំផុតកីឡាករផាន់ គ្រាន់ ដែលធ្លាប់ឈ្នះម្តងទៅហើយ កាលពីប្រកួតលើកទី១នៅតែអាចយកឈ្នះពិន្ទុកីឡាករជើងខ្លាំង ទីពន្លែត បានដដែល ។ ការប្រកួតរវាងគូផ្សេងទៀត គឺកីឡាករចាន់ ប៊ុនឡេក មកពីក្លិបនិរោធមានជ័យ បានយកឈ្នះកីឡាករហេង ចេក មកពីក្លិបកងពលតូចលេខ៧០ ដោយពិន្ទុ កីឡាការិនីសាំង គន្ធា មកពីក្លិបអេភូថងកីឡា បានផ្តួលកីឡាការិនីម៉ន ស្រីម៉ាច មកពីក្លិបព្រែកឯកកីឡា ឱ្យសន្លប់ក្នុងទឹកទី៣ និងកីឡាករឈិន ក្វាន់ង៉ុយ មកពីក្លិបមកុដរាជសីហ៍ បានផ្តួលកីឡាករសុខ ចំរើនស្រ៊ុន មកពីក្លិបមជ្ឈមណ្ឌលកម្ចាត់មីនកម្ពុជា ឱ្យសន្លប់ក្នុងទឹកទី៣ បន្ទាប់ពីធ្វើឱ្យកីឡាកររូបនេះ បាក់ខ្ទង់ច្រមុះ ហើយហូរឈាមស្រោចមុខមិនអាចឱ្យបន្តការប្រកួតបាន ។
ជាម អាដាំ ឈ្នះ ចៅ ផលឌឿ ជាលើកទី៣នៅសង្វៀនកោះពេជ្រនៅទីបំផុតជំនួបជាលើកទី៣រវាងកីឡាករចៅ ផលឌឿ និងកីឡាករជាម អាដាំ នៅលើសង្វៀនស្ថានីយទូរទស្សន៍បាយ័នព័ត៌មានកោះពេជ្រ កាលពីរាត្រីថ្ងៃអាទិត្យទី១៩ សីហា កន្លងទៅនេះ ជាលទ្ធផលកីឡាករចៅ ផលឌឿ មកពីក្លិបតេជៈរាជសីហ៍បង្ក្រាបគ្រឿងញៀនខេត្តក្រចេះ ដែលធ្លាប់ចាញ់ជាម អាដាំ មកពីក្លិបឃ្លាំងមឿងកីឡា ពីរលើកផ្ទួនៗមកហើយនោះនៅតែមិនអាចសងសឹកបានដដែល ។
មុនការប្រកួតចាប់ផ្តើមដំណើរការ កីឡាករជាម អាដាំ ដែលល្បីខាងប្រើជង្គង់យ៉ាងស្ទាត់ជំនាញនោះបានអះអាងប្រាប់កោះសន្តិភាពថា ម្តងនេះលោកនៅតែមានជំនឿចិត្តថាពិតជាអាចយកឈ្នះម្តងទៀតជាមិនខាន ព្រោះលោកបានស្គាល់ពីល្បិចប្រកួតរបស់ចៅ ផលឌឿ ក្នុងជំនួបគ្នាពីរលើកកន្លងទៅហើយ ។ ហេតុផលដែលលោកហ៊ានអះអាងថា អាចឈ្នះផលឌឿ បានគឺដោយសារតែលោកខិតខំហ្វឹកហាត់បំប៉នសមត្ថភាពខ្លួនឯងជាប្រចាំ ពិសេសមុនពេលចេញប្រកួតម្តងៗលោកកាន់តែបង្កើនការហ្វឹកហាត់ខ្លាំងជាងថ្ងៃធម្មតា ។
រីឯកីឡាករចៅ ផលឌឿ ដែលមានប្រភពមកពីខេត្តបាត់ដំបងបានអះអាងឱ្យកោះសន្តិភាពដឹងដែរថា លោកមិនអាចស្មានមុនបានទេនៅពេលដែលការប្រកួតមិនទាន់ចាប់ផ្តើម ។ ទោះជាយ៉ាងណា ធម្មតាការប្រកួតតែងមានឈ្នះ និងចាញ់ ហើយលើកនេះប្រសិនបើចាញ់អាដាំទៀតលោកពិតជាអស់ចិត្តហើយ តែពេលក្រោយខាងគណៈកម្មការគេផ្គូផ្គងឱ្យជួបប្រកួតទៀតលោកក៏នៅតែទទួលប្រកួតដដែល។
នៅពេលការប្រកួតចាប់ផ្តើមចៅ ផលឌឿ បានប្រើស្នៀតជើងទាត់សន្ធាប់ទៅលើអាដាំធ្វើឱ្យអាដាំទន់ជើងរកកល់ចង់ដួលម្តងៗដែរ តែត្រូវអាដាំវាយបកវិញយ៉ាងចាស់ដៃទាំងស្នៀតកណ្តាប់ដៃ និងស្នៀតជង្គង់យកឈ្នះពិន្ទុដាច់ធ្វើឱ្យចៅ ផលឌឿ ត្រូវចាញ់ជាលើកទី៣យ៉ាងអាម៉ាស់នៅលើសង្វៀនកោះពេជ្រ ។រីឯលទ្ធផលគូប្រកួតលក្ខណៈមិត្តភាពវិញ កីឡាករមាន វុទ្ធី មកពីក្លិបយុវជនកម្ពុជាមានជ័យ ផ្តួលកីឡាករលី ហ៊ូវ មកពីក្លិបកងរាជអាវុធហត្ថរាជធានីភ្នំពេញ ឱ្យសន្លប់ក្នុងទឹកទី៣ ។
កីឡាការិនីសឹង តុ មកពីក្លិបតាឡីដំរីមានឫទ្ធិ ឈ្នះពិន្ទុកីឡាការិនីស្រីខួច មកពីក្លិបនាគមានជ័យ ។ កីឡាករផៃ គឹមហឿត មកពីក្លិបនិរោធមានជ័យ ឈ្នះកីឡាករគង់ សំបូរ មកពីក្លិបបុរីរាជសីហ៍មានឫទ្ធិ ដោយពិន្ទុ និងកីឡាករមាស ភារម្យ មកពីក្លិបកងទ័ពជើងទឹក ឈ្នះពិន្ទុកីឡាករចាន់ សាយ័ន្ត មកពីក្លិបនិរោធមានជ័យ ៕
ចែករំលែកព័តមាននេះ