រាជធានីភ្នំពេញ ៖ ក្រសួងទេសចរណ៍នៃព្រះរាជាណាចក្រកម្ពុជាបានបំពេញកិច្ចការជាបន្ទាន់ បន្ទាប់ពីទទួលពាក្យបណ្តឹងរបស់ជនជាតិហ្វ៊ីលីពីនម្នាក់ដែលបានប្តឹងតាមរយៈស្ថានទូតហ្វ៊ីលីពីនប្រចាំនៅកម្ពុជា ករណីដែលជនជាតិខ្មែរម្នាក់ឈ្មោះលី ហេង ម្ចាស់ហាងលក់វត្ថុអនុស្សាវរីយ៍ CITY GEMS នៅខេត្តសៀមរាប ថា បានលក់វត្ថុក្លែងបន្លំក្នុងតម្លៃរាប់ម៉ឺនដុល្លារ ។
មន្ត្រីក្រសួងទេសចរណ៍បានឱ្យដឹងថា កាលពីថ្ងៃទី១៨ សីហា ២០១២ លោក Filebertos Alquiros ជនជាតិហ្វ៊ីលីពីនជាអ្នកទេសចរបានដាក់ពាក្យបណ្តឹងស្តីពីការលក់វត្ថុអនុស្សាវរីយ៍ជាគ្រឿងអលង្ការក្លែងបន្លំ តាមរយៈស្ថានទូតហ្វ៊ីលីពីន ប្រចាំនៅកម្ពុជា មកក្រសួងទេសចរណ៍។ មន្ត្រីដដែលបញ្ជាក់ថា គ្រឿងអលង្ការក្លែងបន្លំនោះរួមមានចិញ្ចៀនត្បូងពណ៌សមួយវង់, ក្រវិលបួនគូ, ខ្សែ.កពណ៌មាសពីរខ្សែដែលសរុបទឹកប្រាក់ប្រមាណ២៧.៨០០ដុល្លារអាមេរិក ។ គ្រឿងអលង្ការក្លែងក្លាយនោះត្រូវបានអ្នកទេសចរហ្វ៊ីលីពីនអះអាងថា បានទិញពីឈ្មោះលី ហេង ម្ចាស់ហាងលក់វត្ថុអនុស្សាវរីយ៍យីហោ CITY GEMS នៅខេត្តសៀមរាប ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ