រាជធានីភ្នំពេញ ៖ ថ្មីៗនេះក្រុមហ៊ុនទីផ្សារមូលបត្រកម្ពុជាបានបង្កើតនូវសេវាផ្តល់ព័ត៌មានទាក់ទងនឹងទីផ្សារមូលបត្រតាមប្រព័ន្ធអីុនធើរណេតដែលអនុញ្ញាតឱ្យវិនិយោគិនចូលមើលទិន្នន័យ និងព័ត៌មានទីផ្សារទាន់ពេលវេលានៃការជួញដូរមូលបត្រតាមរយៈកុំព្យូទ័រ ទូរស័ព្ទដៃទំនើប ឬក៏ Notepads បានគ្រប់ពេលវេលា និងគ្រប់ទីកន្លែងដែលមានប្រព័ន្ធអីុនធើរណេត ។ ដើម្បីផ្តល់ភាពងាយស្រួលដល់វិនិយោគិន ក្នុងការទទួលបានទិន្នន័យ និងព័ត៌មានទីផ្សារទាន់ពេលវេលាជាមួយនឹងសេវាដ៏ពិសេសនេះវិនិយោគិននឹងអាចមើលឃើញបញ្ជាទិញ-លក់បច្ចុប្បន្ន ការផ្តល់ព័ត៌មានរបស់ក្រុមហ៊ុនចុះបញ្ជី និងផ្សារមូលបត្រកម្ពុជា ថ្លៃភាគហ៊ុន និងតម្លៃសន្ទស្សន៍នាពេលកន្លងមក ព្រមទាំងព័ត៌មានផ្សេងៗពាក់ព័ន្ធនឹងភាគហ៊ុន និងក្រុមហ៊ុនចុះបញ្ជី ។
កញ្ញា គឹម សុផានីតា ដែលជាមន្ត្រីប្រតិបត្តិផ្នែកទិន្នន័យទីផ្សារ និងសន្ទស្សន៍នាយកដ្ឋានប្រតិបត្តិការទីផ្សារបានថ្លែងតាមទូរស័ព្ទប្រាប់កោះសន្តិភាពឱ្យដឹងថា សេវាផ្តល់ព័ត៌មានទីផ្សារតាមប្រព័ន្ធអីុនធើរណេតមានសារសំខាន់ណាស់សម្រាប់វិនិយោគិនដែលអាចឱ្យពួកគេងាយស្រួលទទួលបានទិន្នន័យ និងព័ត៌មានទាក់ទិននឹងទីផ្សារមូលបត្រទាន់ពេលវេលានៅក្រុមហ៊ុនទីផ្សារមូលបត្រកម្ពុជា ។ វាជាសក្តានុពលមួយដែលអាចជំរុញឱ្យសាធារណៈជនទូទៅ ជាពិសេសវិនិយោគិនតែម្តង អាចយល់ដឹង និងងាយស្រួលតាមដានព័ត៌មានទាំងអស់ទាក់ទងនឹងទីផ្សារមូលបត្រតាមរយៈសេវាថ្មីនេះ ។
កញ្ញា គឹម សុផានីតា បានបញ្ជាក់ថា វិនិយោគិនដែលជាអតិថិជនរបស់ក្រុមហ៊ុនមូលបត្រអាចទៅចុះឈ្មោះរបស់ខ្លួនដោយផ្ទាល់នៅក្រុមហ៊ុនមូលបត្រជាមុនសិន ទើបអាចប្រើប្រាស់សេវាផ្តល់ព័ត៌មានតាមប្រព័ន្ធអីុនធើរណេតនេះបាន ។ យោងតាមសេចក្តីជូនដំណឹងរបស់ក្រុមហ៊ុនមូលបត្រ កាលពីថ្ងៃទី១៤ សីហា បានឱ្យដឹងថា ពេលនេះមានក្រុមហ៊ុនចំនួន៧ក្នុងចំណោមក្រុមហ៊ុន១២ដែលជាសមាជិកបានបំពេញនីតិវិធីរួចរាល់ជាមួយក្រុមហ៊ុនទីផ្សារមូលបត្រកម្ពុជា ក្នុងការទទួលសិទ្ធិផ្តល់ព័ត៌មានទាំងនេះជូនដល់អតិថិជនរបស់ខ្លួនដែលមានគណនេយ្យជួញដូរហើយក៏មានក្រុមហ៊ុនដទៃទៀតកំពុងត្រៀមរៀបចំបំពេញនីតិវិធីរបស់ខ្លួនផងដែរ ៕
ចែករំលែកព័តមាននេះ