ខេត្តកំពត ៖ ពិធីផ្ទេរមុខតំណែងអភិបាលខេត្តកែបជាផ្លូវការ នឹងប្រព្រឹត្តទៅនៅថ្ងៃពុធទី ២២ សីហា ២០១២នេះ ដោយលោក កែន សត្ថា អភិបាលរងខេត្តនេះ នឹងឡើងទៅកាន់មុខតំណែងជាអភិបាលខេត្តកែប ជំនួស លោក ហាស់ សារ៉េត ដែលនឹងផ្លាស់ ទៅធ្វើ ជាអភិបាលខេត្តព្រៃវែង ជំនួស លោក អ៊ុង សាមី ដែលនឹងឡើងកាន់តួនាទីជាអនុរដ្ឋលេខាធិការក្រសួងមហាផ្ទៃ ។
នេះបើយោងតាមអ្នកនំាពាក្យក្រសួងមហាផ្ទៃលោកឧត្តមសេនីយ៍ឯកខៀវ សុភ័គ ដែលថ្លែងតាមទូរស័ព្ទប្រាប់កោះសន្តិភាពនៅ រសៀលថ្ងៃទី២០ សីហានេះ ។ លោកខៀវ សុភ័គ បានបញ្ជាក់ឲ្យដឹងដែរថា ការផ្លាស់ប្តូរនេះ មិនមែនជាការដកតួនាទីអ្វីនោះទេ គឺជាការកែសម្រួលភារកិច្ចតែប៉ុណ្ណោះ ដោយសារលោកអ៊ុង សាមី មានបញ្ហាសុខភាព ដែលធ្វើឲ្យកិច្ចការរបស់លោកមួយចំនួនមិនអាចឆ្លើយតបទៅនឹងតួនាទី និង តម្រូវការរបស់ក្រសួងមហាផ្ទៃ ។ បើតាមអ្នកនំាពាក្យក្រសួងមហាផ្ទៃបានឲ្យដឹងទៀតថា ពិធីផ្ទេរ មុខតំណែងខេត្តព្រៃវែងនឹងប្រារព្ធធ្វើនៅថ្ងៃព្រហស្បតិ៍ទី២៣ សីហា ២០១២ ខាងមុខនេះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ