រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ស្ថានទូតបារាំងប្រចាំនៅកម្ពុជាចុះថ្ងៃទី១៧ សីហា ២០១២ ឱ្យដឹងថា ចាប់ពីខែកញ្ញាទៅ និស្សិតអាហារូបករណ៍កម្ពុជាប្រមាណ១០០នាក់ នឹងចាកចេញទៅបន្តការសិក្សានៅប្រទេសបារាំង ។ ជារៀងរាល់ឆ្នាំ ស្ថានទូតបារាំងប្រចាំនៅកម្ពុជា និងទីភ្នាក់ងារសាកលវិទ្យាល័យនៃបណ្តាប្រទេសប្រើប្រាស់ភាសាបារាំង (AUF) បានផ្តល់អាហារូបករណ៍ដល់បណ្តានិស្សិតឆ្នើមកម្ពុជា ដើម្បីឱ្យពួកគេបន្តការសិក្សាថ្នាក់បរិញ្ញាបត្រជាន់ខ្ពស់ ឬថ្នាក់បណ្ឌិតនៅតាមសាកលវិទ្យាល័យ ឬសាលាធំៗនៅប្រទេសបារាំង ។
ក្នុងចំណោមនិស្សិតជ្រើសរើសនៅឆ្នាំនេះ មានប្រមាណ២០នាក់ទទួលអាហារូបករណ៍របស់រដ្ឋាភិបាលបារាំង ដើម្បីទៅបន្តការសិក្សាលើមុខវិជ្ជាផ្សេងៗជាច្រើនមានដូចជា ស្ថាបត្យកម្ម ច្បាប់ សេដ្ឋកិច្ច-គ្រប់គ្រង វិទ្យាសាស្ត្រវិស្វកម្ម វិទ្យាសាស្ត្រអប់រំ ទេសចរណ៍ និងសិល្បៈថតរូបជាដើម។ ចំណែកនិស្សិតកម្ពុជា១៧នាក់ទៀតបានទទួលអាហារូបករណ៍ Eiffel ផ្តល់ដោយក្រសួងការបរទេសបារាំង ដែលនឹងអនុញ្ញាតឱ្យពួកគេបន្តការសិក្សាថ្នាក់បរិញ្ញាបត្រជាន់ខ្ពស់ ។ និស្សិតដែលត្រូវចេញដំណើរនៅពេលនេះ នឹងទៅជួបជុំជាមួយនិស្សិតកម្ពុជាជាច្រើនាក់ទៀត ដែលកំពុងរៀនបន្ថែម ផ្នែកវេជ្ជសាស្ត្រ និងឱសថសាស្ត្រក្នុងរយៈពេល១ទៅ២ឆ្នាំនៅតាមមណ្ឌលសុខភាពសាកលវិទ្យាល័យនានានៅប្រទេសបារាំង (នៅឆ្នាំ២០១២ មាននិស្សិតពេទ្យ៣៥នាក់ទទួលអាហារូបករណ៍នេះដែរ) ។
ស្ថានទូតបារាំងបន្តថា ក្រៅពីនេះប្រទេសបារាំងគាំទ្រដល់អាហារូបករណ៍ផ្សេងៗទៀតដែលអនុញ្ញាតឱ្យនិស្សិតនិយាយភាសាបារាំង ចេញទៅបន្តការសិក្សានៅតាមគ្រឹះស្ថានឧត្តមសិក្សាល្បីល្បាញជាអន្តរជាតិនៅប្រទេសបារាំង ឬនៅរដ្ឋណាមួយក្នុងចំណោមរដ្ឋប្រើប្រាស់ភាសាបារាំងទាំង៥៦ ។ ជាក់ស្តែងមានអាហារូបករណ៍ថ្មីប្រមាណ៥០ត្រូវបានផ្តល់ជូនដល់និស្សិត ដើម្បីចេញទៅសិក្សានៅប្រទេសបារាំង និងប្រទេសប្រើប្រាស់ភាសាបារាំងផ្សេងៗទៀតតាមរយៈកិច្ចសហប្រតិបត្តិការជាមួយទីភ្នាក់ងារ AUF ដែលជាអង្គការអន្តរជាតិមួយមានគ្រឹះស្ថានឧត្តមសិក្សា និងស្រាវជ្រាវចំនួន៧៨៦នៅប្រទេស៩៨ជាសមាជិក ។ ក្រៅពីនេះ មាននិស្សិតកម្ពុជា៣នាក់បានទទួលអាហារូបករណ៍ Erasmus Mundus ដែលឧបត្ថម្ភដោយសហភាពអឺរ៉ុបដើម្បីទៅសិក្សានៅប្រទេសបារាំង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ