ខេត្តព្រៃវែង ៖ ប្រាសាទថ្មីមួយកំពុងតែលេចរូបរាងឡើងដោយកសាងពីបេតុង មានឈ្មោះថា «ប្រាសាទព្រះពុទ្ធអង្គរយពាន់» ។ ប្រាសាទនេះស្ថិតនៅក្នុងវត្តព្រំសូរិយារាម ហៅគោកសំពៅ ក្នុងភូមិពានី ឃុំល្វា ស្រុកព្រះស្តេច ខេត្តព្រៃវែង ដោយព្រះចៅអធិការវត្តនោះជាអ្នកផ្តួចផ្តើមកសាង ។
ព្រះតេជគុណឥន្ទសិរី ព្រំ ទូច ចៅអធិការវត្ត មានថេរដីកាកាលពីថ្ងៃទី១៦ សីហា ថា «ប្រាសាទព្រះពុទ្ធអង្គរយពាន់»បានកសាងនៅថ្ងៃ១៥កើត ខែអាសាឍ ឆ្នាំខាល ត្រូវនឹងខែសីហា ឆ្នាំ២០១០ ។ រហូតមកដល់ថ្ងៃទី១៦ សីហា ២០១២ ប្រាសាទដែលមានទំហំប្រហែល៣០ម៉ែត្របួនជ្រុងនេះ កសាងបាន៤០ភាគរយហើយ ។ ប្រាសាទនេះរៀបជញ្ជាំងយកក្បាច់ភ្ញីលំនាំប្រាសាទអង្គរតូច និងប្រាសាទបន្ទាយស្រី។ ក្រៅពីនេះកសាងរូបពុទ្ធបដិមាអង្គធំទាំង៨ទិស នៅកណ្តាលប្រាសាទ ព្រះពុទ្ធបដិមាជុំវិញជញ្ជាំងប្រាសាទទាំងបួនទិស ក្នុង១ទិស៤ព្រះអង្គ ហើយកំពុងឆ្លាក់ និងចាក់ពុម្ពក្បាច់ភ្ញី រូបអប្សរា។ មានពុទ្ធបរិស័ទមួយចំនួនក៏បានជាវពុទ្ធបដិមាមកដាក់ក្នុងប្រាសាទជាបន្តបន្ទាប់ដែរ ។
ចំពោះប្រាក់សម្រាប់កសាងប្រាសាទ «ព្រះពុទ្ធអង្គរយពាន់»ព្រះចៅអធិការឱ្យដឹងថា បានមកពីព្រះអង្គស្វែងរកការបរិច្ចាគនានា ព្រមទាំងការចូលរួមពីលោកគ្រូក្មេង ឬហៅតាសក់វែង ដែលស្នាក់នៅវត្ត ហើយព្យាបាលជំងឺដល់ពុទ្ធបរិស័ទក្នុង១ថ្ងៃរាប់រយនាក់បានប្រាក់ជាសគុណ។ ចំណែកពេលវេលានៃការសាងសង់ប្រាសាទ គឺមិនកំណត់ទេ អាស្រ័យលើមានប្រាក់សម្រាប់់ផ្គត់ផ្គង់ ។
ព្រះចៅអធិការវត្តព្រំសូរិយារាម មានថេរដីកាថា ព្រះអង្គមានកំណើតទី២នៅថ្ងៃទី៧ មករា ១៩៧៩ ហើយបានចូលសាងផ្នួសនៅឆ្នាំ១៩៨២ នៅវត្តស្វាយឧត្តម ក្នុងភូមិពានី ឃុំល្វា ស្រុកព្រះស្តេច ។ រហូតមកដល់ឆ្នាំ១៩៩២ ព្រះអង្គបានទៅគង់នៅវត្តព្រំសូរិយារាម ហៅវត្តគោកសំពៅវិញ ។
ដោយនឹកគុណថ្ងៃ៧ មករា និងគុណបំណាច់ប្រមុខរាជរដ្ឋាភិបាលខិតខំកសាងសន្តិភាព និងបង្រួបបង្រួមជាតិ ព្រមទាំងកសាងសង្គមជាតិមានការរីកចម្រើនលើគ្រប់វិស័យ ទើបព្រះអង្គសម្រេចកសាងប្រាសាទ «ព្រះពុទ្ធអង្គរយពាន់» ជូនទុកជាសមិទ្ធផលថ្មី និងជាកេរដំណែលតទៅអ្នកជំនាន់ក្រោយ ។ បើតាមលោកតា នៅ នន់ គណៈកម្មការអាចារ្យវត្តគោកសំពៅ ប្រាប់កោះសន្តិភាពថា វត្តនេះ កសាងក្នុងអំឡុងឆ្នាំ១៨១៣ ប៉ុន្តែបានបាត់ព្រះនាមព្រះចៅអធិការអស់ហើយ នៅចាំត្រឹមឆ្នាំ១៩១២ ព្រះនាមហ៊ុន ឆ្នាំ១៩៤៨ ព្រះនាម សា ។ ចាប់ពីឆ្នាំ១៩៦៧ ព្រះនាម វ៉ា សំរិត និងពីឆ្នាំ១៩៩២ ព្រះគ្រូចៅអធិការព្រះនាម ព្រំ ទូច គង់នៅរហូតបច្ចុប្បន្ន ។
បានជាដាក់ឈ្មោះវត្តថា វត្តគោកសំពៅ គឺមានចាស់ព្រឹទ្ធាចារ្យតំណាលប្រាប់តគ្នាថា កាលពីបុរាណក្នុងស្រុកព្រះស្តេចគឺជាដែនសមុទ្រ ហើយនៅចំណុចគោកសំពៅនេះមានកោះមួយនៅកណ្តាលសមុទ្រ ។ នាថ្ងៃមួយមានសំពៅធំមួយមកបោះយុថ្កាចតសម្រាក ហើយបាវបម្រើស្ត្រីពីរ-បីនាក់បានចុះទៅលើកោះ ដើម្បីដាំបាយ ធ្វើម្ហូប ។ ខណៈនោះស្រាប់តែទឹកសមុទ្រនាចធ្វើឱ្យសំពៅដ៏ធំមួយនេះនៅលើគោកកឿងជាប់តែម្តង ។ នាយសំពៅបានអុជធូបបន់ស្រន់យ៉ាងណាក៏ដោយទឹកសមុទ្របាននាចទៅឆ្ងាយកោះ ទុកសំពៅឱ្យនៅលើគោករហូតទៅ។
ដូច្នេះហើយនៅក្នុងអំឡុងឆ្នាំ១៨១៣ ពុទ្ធបរិស័ទកសាងវត្តនេះឡើងដាក់ឈ្មោះថា «វត្តគោកសំពៅ» ។ លុះមកដល់សម័យចៅអធិការព្រះនាមព្រំ ទូច គង់នៅក៏ប្តូរឈ្មោះថា «វត្តព្រំសូរិយារាម» ហៅវត្តគោកសំពៅ រហូតមក ។នៅពេលប្រាសាទ «ព្រះពុទ្ធអង្គរយពាន់» កសាងរួចហើយ នឹងក្លាយជាសម្បត្តិវប្បធម៌របស់ជាតិមួយថ្មីទៀត ៕
ចែករំលែកព័តមាននេះ