ខេត្តប៉ៃលិន ៖ ហ៊ីណូសណ្តោងរឺុម៉កមួយគ្រឿងបើកបរដោយបុរសស្រវឹងធ្លាក់ភ្នែកម្នាក់ ដឹកគ្រាប់ពោតរបស់ឈ្មួញថៃ បោះពួយយ៉ាងលឿនពេលទៅដល់ផ្លូវកែងអ្នកបើកបរប្រឹងបួងចង្កូតបត់ក៏បោកនឹងកន្ទុយរឺុម៉កដាច់ផ្ងារក្រឡាប់បះជើង ក្អួតចេញគ្រាប់ពោតរាយប៉ាយពាសពេញលើចិញ្ចើមផ្លូវ ប៊ិះសង្កត់លើម៉ូតូមួយគ្រឿងទៀតជិះដោយស្ត្រី២នាក់ នៅចំណុចផ្លូវកែងក្នុងភូមិអូរច្រាកណ្តាល សង្កាត់ទួលល្វា ក្រុងប៉ៃលិន កាលពីវេលាម៉ោង១និង៤០នាទីរសៀល ថ្ងៃទី១៩ សីហា ។
អ្នកបើករថយន្តខាងលើឈ្មោះផាក ម៉ន ភេទប្រុស អាយុ២៣ឆ្នាំ ជាអ្នកបើករថយន្តដឹកគ្រាប់ពោតឱ្យថៅកែថៃ និងអ្នកជិះក្នុងកាប៊ីនម្នាក់ទៀតឈ្មោះ ភីរម្យ យ៉ា អាយុ៣០ឆ្នាំ ។ អ្នកទាំង២ជាជនជាតិថៃ រស់នៅស្រុកខ្លងហាត ខេត្តស្រះកែវ ប្រទេសថៃ រថយន្តនេះបើកបរក្នុងទិសដៅពីកើតទៅលិច ដោយសណ្តោងរឺុម៉កដឹកគ្រាប់ពោតទម្ងន់រាប់សិបតោន។
សាក្សីឃើញហេតុការណ៍និយាយថា កាលពីវេលាម៉ោងខាងលើគេឃើញរថយន្តសណ្តោងរឺុម៉កមួយគ្រឿង បើកបរយ៉ាងលឿនក្នុងទិសដៅពីកើតទៅលិចចេញពីខេត្តប៉ៃលិនសំដៅទៅព្រំដែនកម្ពុជា-ថៃ លុះមកដល់កន្លែងកើតហេតុត្រង់ចំណុចផ្លូវកែងវត្តអូរច្រា ត្រង់ភូមិអូរច្រាកណ្តាល ស្រាប់តែរថយន្តនោះបានបើកជ្រុលហួសផ្លូវកែងទៅខាងឆ្វេងដៃ រួចអ្នកបើកបរបានទាញបួងចង្កូតមកខាងស្តាំវិញទាំងបង្ខំបណ្តាលឱ្យផុតតែតួក្បាលរថយន្តខាងមុខ ចំណែកកន្ទុយរឺុម៉កនៅខាងក្រោយដាច់ក្រឡាប់បះជើងកំពប់គ្រាប់ពោតពេញលើចិញ្ចើមផ្លូវ បណ្តាលឱ្យស្ទះចរាចរណ៍មួយសន្ទុះ ។ ប្រភពបន្តទៀតថា ពេលនោះគេឃើញរឺុម៉ករថយន្តក្រឡាប់ប៊ិះសង្កត់លើម៉ូតូស្ត្រី២នាក់ ដែលកំពុងជិះឌុបគ្នាក្នុងទិសដៅបញ្ច្រាសគ្នា ដោយឃ្លាតផុតពីកន្ទុយរឺុម៉កនោះត្រឹមតែ២ម៉ែត្រប៉ុណ្ណោះ ទើបធ្វើឱ្យអ្នកជិះម៉ូតូស្រែកស្ទើរភ្លាត់សំឡេង ហើយមនុស្សប្រុសស្រីក្មេងចាស់នៅក្បែរកន្លែងកើតហេតុភ័យព្រលឹងចុងសក់គ្រប់គ្នា។
ចំណែកមន្ត្រីចរាចរផ្លូវគោកក្រុងប៉ៃលិនបានចុះទៅអន្តរាគមន៍ដើម្បីបញ្ជៀសការស្ទះចរាចរណ៍ ហើយបានវាស់ជាតិអាកុលបុរសជនជាតិថៃទាំង២នាក់នេះរកឃើញថា ពួកគេស្រវឹងខ្លាំង ។ ក្រោយពីពិនិត្យនៅចំណុចកើតហេតុឃើញថា រថយន្តបង្កបានធ្វើឱ្យខូចផ្លូវប្រវែងជាង១០ម៉ែត្រ ទើបសមត្ថកិច្ចតម្រូវឱ្យរថយន្តបង្កបង់ថ្លៃជួសជុលផ្លូវចំនួន៣ពាន់បាត រួចក៏អនុញ្ញាតឱ្យបន្តដំណើរទៅប្រទេសថៃទៀត ៕
ចែករំលែកព័តមាននេះ