ម៉ាស៊ីនឃោសនាស៊ីរីរាយការណ៍ថា ប្រធានាធិបតីស៊ីរីលោកបាចាអាល់ អាសាដ កាលពីថ្ងៃទី១៩ សីហា បានចូលរួមក្នុងពិធីសូត្រធម៌ពិសេសមួយ នៅឯព្រះវិហារ អាល់ ហាម៉ាដ ក្រុងដាម៉ាស់ នាថ្ងៃបុណ្យធំកំណត់ពីការបញ្ចប់ខែរ៉ាម៉ាដាន ។
ទូរទស្សន៍រដ្ឋបានចាក់ផ្សាយបន្តផ្ទាល់រូបភាពទាំងឡាយនៃការសូត្រធម៌នោះ ដែលលោកអាសាដចូលរួមអមដោយបណ្តាអ្នកទទួលខុសត្រូវជាន់ខ្ពស់ និងបណ្តារដ្ឋមន្ត្រី ។ នេះជាការលេចមុខជាសាធារណៈលើកដំបូងរបស់ប្រមុខរដ្ឋស៊ីរី ចាប់តាំងពីការវាយប្រហារភេរវកម្មកាលពីខែកក្កដា សំដៅលើទីតាំងសន្តិសុខជាតិ នៅក្រុងដាម៉ាស់ បណ្តាលឱ្យមនុស្សជំនិតទាំងឡាយរបស់លោក ក្នុងនោះមានប្អូនថ្លៃប្រុសម្នាក់ត្រូវស្លាប់មក ។
ប្រធានាធិបតីស៊ីរីដែលស្ថិតក្នុងស្ថានភាពលំបាកត្រូវប្រឈមមុខនឹងការគាបសង្កត់របស់អន្តរជាតិ ដោយសារការបង្ក្រាបបង្ហូរឈាមរបស់រដ្ឋាភិបាលលោក លើពួកប្រឆាំង ។ វិបត្តិនៅស៊ីរីដែលមានរយៈពេល១៧ខែមកហើយ កាន់តែស្មុគស្មាញថែមទៀត ចំណែកចលនាប្រឆាំងរដ្ឋាភិបាលដែលពីមុនធ្វើសកម្មភាពដោយសន្តិវិធីពេលនេះបានក្លាយទៅជាកុប្បកម្មដោយអាវុធយ៉ាងបង្ហូរឈាមជាមួយវត្តមានរបស់ពួកអាល់កៃដា ៕
ចែករំលែកព័តមាននេះ