រាជធានីភ្នំពេញ ៖ អគ្គលេខាធិការដ្ឋានរដ្ឋសភា កាលពីថ្ងៃទី១៧ សីហា បានឱ្យដឹងថា សភានៃព្រះរាជាណាចក្រកម្ពុជា ដែលរួមមានរដ្ឋសភា និងព្រឹទ្ធសភា សហការជាមួយរដ្ឋសភានៃសាធារណរដ្ឋសង្គមនិយមវៀតណាម នឹងប្រារព្ធមហាមិទ្ទិញសភាកម្ពុជា-វៀតណាម ដើម្បីអបអរសាទរខួប៤៥ឆ្នាំនៃការបង្កើតចំណងទាក់ទងការទូតកម្ពុជា-វៀតណាម ១៩៦៧-២០១២ និងឆ្នាំមិត្តភាពកម្ពុជា-វៀតណាម២០១២ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា និងលោកង្វៀន ស៊ីងហ៊ុង (Nguyen Sinh Hung) ប្រធានរដ្ឋសភានៃសាធារណរដ្ឋសង្គមនិយមវៀតណាម ចាប់ពីថ្ងៃទី២២ ដល់ថ្ងៃទី២៥ ខែសីហា ឆ្នាំ២០១២ នៅទីក្រុងហូជីមិញ សាធារណរដ្ឋសង្គមនិយមវៀតណាម ។
អញ្ជើញចូលរួមក្នុងមហាមិទ្ធិញ មានថ្នាក់ដឹកនាំសំខាន់ៗនៃប្រទេសទាំង២ សមាជិក សមាជិការដ្ឋសភា ព្រឹទ្ធសភា រាជរដ្ឋាភិបាល គណៈអភិបាលខេត្ត យុវជនរាជធានី និងខេត្តមួយចំនួន ដែលមានព្រំប្រទល់ជាប់ប្រទេសវៀតណាម ព្រមទាំងមន្ត្រីជាន់ខ្ពស់នៃអគ្គលេខាធិការដ្ឋានរដ្ឋសភា ព្រឹទ្ធសភា ។មហាមិទ្ទិញសភាកម្ពុជា-វៀតណាម គឺជាព្រឹត្តិការណ៍ដ៏សំខាន់ ដើម្បីអបអរសាទរ«ឆ្នាំមិត្តភាពកម្ពុជា-វៀតណាម២០១២» និងខួបអនុស្សាវរីយ៍៤៥ឆ្នាំ នៃថ្ងៃបង្កើតទំនាក់ទំនងការទូតកម្ពុជា-វៀតណាម(២៤/០៦/១៩៦៧-២៤/០៦/២០១២) ត្រូវបានរដ្ឋសភាវៀតណាម និងសភាកម្ពុជាសហការប្រារព្ធឡើងទុកជាឱកាសសម្រាប់សមាជិក សមាជិកា រដ្ឋសភា ព្រឹទ្ធសភា តំណាងក្រសួង ស្ថាប័ន អាជ្ញាធរមូលដ្ឋាន និងយុវជននៃប្រទេសទាំង២ ជួបជុំផ្លាស់ប្តូរព័ត៌មាន និងពិភាក្សាអំពីកិច្ចសហប្រតិបត្តិការរវាងប្រទេសទាំង២ សំដៅជំរុញទំនាក់ទំនងជាប្រពៃណី និងកិច្ចសហប្រតិបត្តិការលើគ្រប់វិស័យឱ្យបានរឹងមាំយូរអង្វែង រវាងស្ថាប័នរដ្ឋាភិបាលរដ្ឋសភាទាំង២ បណ្តាអាជ្ញាធរមូលដ្ឋាន ព្រមទាំងប្រជាជននៃប្រទេសទាំង២ ៕
ចែករំលែកព័តមាននេះ