រាជធានីភ្នំពេញ ៖ ដើម្បីបង្កើនប្រសិទ្ធភាពក្នុងការផ្តល់សេវាកម្មជូនអតិថិជនឱ្យបានកាន់តែប្រសើរឡើងវីងបានបើកសម្ពោធសាខាថ្មី២ទៀត នៅផ្សារអូឡាំពិក និងផ្លូវវេងស្រេងបន្ថែមពីលើភ្នាក់ងារវីងដែលមានច្រើនជាង៨០០កន្លែងទូទាំង២៤ខេត្ត-ក្រុង ។
សាខាអូឡាំពិកមានទីតាំងស្ថិតនៅផ្ទះលេខ៤៨ ផ្លូវ២៩៨ សង្កាត់ទួលស្វាយព្រៃ២ ខណ្ឌចំការមន (ទល់មុខខាងត្បូងផ្សារអូឡាំពិក) សម្ពោធកាលពីថ្ងៃទី១៧ សីហា ២០១២ និងសាខាផ្លូវវេងស្រេង ស្ថិតនៅផ្ទះលេខ3B ផ្លូវវេងស្រេង សង្កាត់ចោមចៅ ខណ្ឌដង្កោ ដែលនឹងចាប់ដំណើរការនៅថ្ងៃទី២២ សីហា ២០១២ ។ ដើម្បីអបអរការបើកដំណើរការសាខាថ្មីនេះ ក្រុមហ៊ុនមានកាដូពិសេសដល់អតិថិជននូវការបើកគណនេយ្យវីង ដោយឥតគិតថ្លៃនៅសាខាទាំង២ចាប់ពីថ្ងៃទី១៧ សីហា រហូតដល់ថ្ងៃទី១៧ កញ្ញា ២០១២ ។ សាខាថ្មីទាំង២នេះគឺជាតថភាពមួយឆ្លុះបញ្ជាំងពីការរីកលូតលាស់របស់វីងនៅក្នុងទីផ្សារប្រទេសកម្ពុជាក៏ដូចជាការផ្តល់ភាពងាយស្រួលកាន់តែប្រសើរឡើងជូនដល់អតិថិជនក្នុងការប្រើប្រាស់សេវាកម្មវីង ។
កញ្ញាឃួន ហ្វ្រន់ដារា អគ្គនាយិកាផ្នែកពាណិជ្ជកម្មបានជំរាបជូនថា «ការចាប់ដំណើរការនៃសាខាថ្មីទាំង២នេះគឺជាការបោះជំហានទៅមុខកាន់តែប្រសើរ ជាមួយនឹងសេវាផ្ទេរប្រាក់តាមរយៈទូរស័ព្ទដៃ ។ ជាទូទៅប្រជាជនកម្ពុជាតែងតែមានតម្រូវការផ្ញើប្រាក់ទៅកាន់បងប្អូននៅគ្រប់ទីកន្លែង ហើយវីងមានមោទនភាពដែលអាចផ្តល់សេវាកម្មផ្ទេរប្រាក់ទិញកាតទូរស័ព្ទដៃជូនដល់អតិថិជនទូទាំងប្រទេស ។ ចាប់ពីថ្ងៃទី៦ សីហា ២០១២ កន្លងទៅ ក្រុមហ៊ុនវីងក៏មានការផ្តល់ជូនពិសេសថ្មីមួយដល់អតិថិជនដែលនិយមប្រើប្រាស់សេវាកម្មបញ្ចូលលុយទូរស័ព្ទតាមរយៈវីង (ឬហៅថាវីងទិញកាត) ជាទឹកប្រាក់២% ភ្លាមៗទៅក្នុងគណនេយ្យរបស់គាត់រាល់ពេលបញ្ចូលទឹកប្រាក់ទៅក្នុងទូរស័ព្ទ ហើយលើសពីនេះទៅទៀតនោះ គឺ អតិថិជនអាចបញ្ចូលលុយទូរស័ព្ទឆ្លងប្រព័ន្ធបានដោយសេរីក្នុងចំណោមដៃគូសហការជាមួយវីង» ។
ក្រុមហ៊ុនវីង បានចាប់ដំណើរការនៅដើមឆ្នាំ២០០៩ ដើម្បីបំពេញតម្រូវការប្រជាជនកម្ពុជា ជាសាធារណៈ និងបានពង្រីកភ្នាក់ងារវីងខាសអិុចប្រេស បានជាង៨០០កន្លែងទូទាំង២៤ខេត្ត-ក្រុង ។ ប្រសិនបើលោកអ្នកមានបំណងចង់ផ្ទេរប្រាក់ បញ្ចូលលុយទូរស័ព្ទ ឬបង់វិក្កយបត្រផ្សេងៗក្នុងតម្លៃទាប មានសុវត្ថិភាព ងាយស្រួល និងរហ័ស វីងគឺជាជំរើសរបស់អ្នក ៕
ចែករំលែកព័តមាននេះ