ខេត្តឧត្តរមានជ័យ ៖ ប្រជាពលរដ្ឋម្នាក់ ត្រូវបានក្រុមហ៊ុនដាតារ៉ាប់ប៊ឺ នាំមន្ត្រីយោធាដែលការពារក្រុមហ៊ុន និងមន្ត្រីការពារដែនជម្រកសត្វព្រៃគូលែនព្រំទេពចាប់យកឈើចំនួន២គោយន្តកន្ត្រៃ មានឈើចំនួន៥៤ដុំ ស្មើនឹងជិត១ម៉ែត្រគូប កាលពីវេលាម៉ោង១០ និង៣០នាទីព្រឹកថ្ងៃទី១៩ សីហា នៅក្នុងភូមិដីថ្មី ឃុំអន្លង់វែង ស្រុកអន្លង់វែង ។
ប្រជាពលរដ្ឋឈ្មោះលី ភេទប្រុស អាយុ៤៥ឆ្នាំ រស់នៅក្នុងភូមិ-ឃុំខាងលើរៀបរាប់ថា រូបគាត់ចូលទៅទិញឈើធ្នង់ពីប្រជាពលរដ្ឋនៅក្នុងភូមិរំចេកបានចំនួន៥៤ដុំស្មើនឹងជិត១ម៉ែត្រគូប ក្នុងគោលបំណងយកមកធ្វើតុ ទូ និងគ្រែ សម្រាប់ដេក ហើយក៏បានជួលគោយន្តកន្ត្រៃដឹកក្នុងតម្លៃ១០ម៉ឺនរៀលក្នុង១គោយន្ត ។ លុះពេលធ្វើដំណើរមកដល់មុខផ្ទះ ស្រាប់តែមានផ្នែកសន្តិសុខរបស់ក្រុមហ៊ុនដាតារា៉ប់ប៊ឺ នាំយោធាការពារក្រុមហ៊ុន និងមន្ត្រីបរិស្ថានការពារជម្រកសត្វព្រៃគូលែនព្រំទេពប្រដាប់ដោយអាវុធមកចាប់យកដោយពួកគេចោទថា ឈើនេះទៅលួចកាប់នៅក្នុងដីក្រុមហ៊ុន ។
នៅក្នុងហេតុការណ៍នេះក៏មានប្រជាពលរដ្ឋជាច្រើននាក់ចោមរោមមើលហើយនិយាយថា ក្រុមហ៊ុនដាតារ៉ាប់ប៊ឺនេះយកទាហាននៅការពារជុំវិញតើមាននរណាចូលទៅលួចកាប់ឈើបានទៅ សូម្បីតែប្រជាពលរដ្ឋដើរក្បែរៗនោះរកអុសយកមកដុតដាំបាយ និងរកបន្លែ ស្លឹកឈើព្រៃក៏មិនបានផង ។ តើនរណាហា៊នចូលលួចកាប់ឈើនោះទៅ ហើយប្រជាពលរដ្ឋសព្វថ្ងៃនេះពុំមានព្រៃសម្រាប់ដើរចូលរកបន្លែបង្ការអ្វីបានឡើយ ដោយសារទៅទីណា ក៏សុទ្ធតែជាដីរបស់ក្រុមហ៊ុនទាំងអស់ ។ បន្ទាប់ពីបានជជែកគ្នាទៅវិញទៅមកជុំវិញការចាប់ឈើនេះ ក៏កើតមានរឿងជម្លោះបែកផ្សែងស្ទើរតែបង្ហូរឈាមដាក់គ្នាផងដែរ ។
លោកសំ វីរក្ស ផ្នែកសន្តិសុខឱ្យក្រុមហ៊ុនអះអាងថា ឈើធ្នង់នេះពិតជាឈើរបស់ក្រុមហ៊ុន គឺប្រជាពលរដ្ឋបានលួចទៅកាប់នៅក្នុងដីរបស់ក្រុមហ៊ុន ហើយលោកមកចាប់យកទៅវិញ ។ ទោះជាយ៉ាងណា ការអះអាងនេះត្រូវបានប្រជាពលរដ្ឋបដិសេធ និងលើកហេតុផលយ៉ាងសមស្របមកបង្ហាញផងដែរ ៕
ចែករំលែកព័តមាននេះ