ខេត្តស្វាយរៀង ៖ មានអំពើហិង្សាមួយគួរឱ្យរន្ធត់ និងធ្វើឱ្យផ្អើលអ្នកភូមិមកជួយចាប់ ដោយសារតែបុរសម្នាក់ខណៈស្រវឹងស្រាបានដេញវាយប្រពន្ធ លុះបងប្រុស និងបងថ្លៃទៅឃាត់ក៏វាយបងប្រុសបង្កើត២បំពង់ទីបចំក្បាលបែកដួលសន្លប់នៅក្នុងថ្លុកឈាម ។ ពេលនោះបងថ្លៃស្រីឃើញប្តីសន្លប់ស្ទុះចូលទៅជួយក៏ត្រូវប្អូនថ្លៃនោះ ចាប់បោកផ្ទប់ទៅលើដីរួចជាន់ច្រំលើដើមទ្រូង និងពោះរហូតធ្លាក់ឈាមសន្លប់ស្តូកស្តឹងក្បែរប្តីទៀតទើបអ្នកស្រុកចូលមកជួយចាប់ជនល្មើសជាប្អូនចេញ ហើយហៅរថយន្តដឹកជនរងគ្រោះទៅកាន់មន្ទីរពេទ្យខេត្តដើម្បីសង្គ្រោះ ។
ហេតុការណ៍នេះបានកើតឡើងកាលពីថ្ងៃទី១៨ សីហា វេលាម៉ោង៦និង៣០នាទីល្ងាច នៅភូមិថ្មី សង្កាត់សង្ឃ័រ ក្រុងស្វាយរៀង ។ បើតាមមន្ត្រីសមត្ថកិច្ចឱ្យដឹងថា ជនរងគ្រោះឈ្មោះ យឹម ចាន់ ភេទប្រុស អាយុ២៥ឆ្នាំ ត្រូវប្អូនប្រុសឈ្មោះយឹម កែវ អាយុ២០ឆ្នាំ វាយចំក្បាលចំនួន២បំពង់ទីប បែកដួលសន្លប់ក្នុងថ្លុកឈាម រីឯស្ត្រីជាប្រពន្ធដែលត្រូវប្អូនថ្លៃវាយរហូតសន្លប់ដែរឈ្មោះ ខៀវ សុភ័ក្ត្រ អាយុ៣០ឆ្នាំ ។
ជនរងគ្រោះនិយាយថា នៅមុនពេលកើតហេតុ ពួកគេទាំង២នាក់ប្តីប្រពន្ធអង្គុយនៅលើផ្ទះ ស្រាប់តែប្អូនប្រុសឈ្មោះ យឹម កែវ ស្រវឹងស្រាមកពីណាដើរទៅឡូឡាជេរប្រពន្ធឈ្មោះ ភ្លុក រួចទាញព្រនង់ដេញវាយប្រពន្ធ ។ ដោយឃើញដូច្នេះរូបគេក៏ចុះពីលើផ្ទះទៅឃាត់កុំឱ្យប្អូនប្រុសជេរ និងវាយប្រពន្ធ ស្រាប់តែប្អូនប្រុសទាញបានបំពង់ទីបប៉ុនកដៃវាយរូបគេចំនួន២បំពង់ទីបចំក្បាល។ ដោយសារឃើញរូបគេត្រូវប្អូនវាយបែបនេះប្រពន្ធចូលទៅជួយក៏ត្រូវរងគ្រោះទៀត ហើយបានអ្នកស្រុកជួយបញ្ជូនមកមន្ទីរពេទ្យខេត្តដើម្បីសង្គ្រោះ ។ ចំណែកប្អូនប្រុសនោះបានគេចខ្លួនបាត់ ឯស្ត្រីជាប្រពន្ធក៏រត់ទៅផ្ទះឪពុកម្តាយគេវិញដែរ ៕
ចែករំលែកព័តមាននេះ