ក្រុងប៉ោយប៉ែត ៖ ដោយការកើតទុក្ខមិនសុខចិត្តដ្បិតមានឈ្មោះក្នុងបញ្ជីតាំងពីមុនឆ្នាំ២០០០ តែបែរជាមិនទទួលបានរបបដី ក្រោយពីបញ្ចប់ជម្លោះដ៏រ៉ាំរ៉ៃជាមួយភាគីម្ខាងទៀត ប្រជាពលរដ្ឋ៤៤គ្រួសារក្នុងចំណោម២១៨គ្រួសារ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត បានធ្វើការតវ៉ាសុំឱ្យអាជ្ញាធរខេត្តបន្ទាយមានជ័យជួយរកយុត្តិធម៌ដោយពួកគាត់អះអាងថា ពួកគាត់ពុំទទួលបានរបបដីទេ ក្រោយពីបញ្ចប់ជម្លោះ ។
ជាមួយនឹងការតវ៉ាតាមផ្លូវច្បាប់ និងមានមេធាវីការពារក្តីផង ចំណុចទីតាំងដី២១៨គ្រួសារ ដែល៤៤គ្រួសារធ្វើការតវ៉ាឱ្យអាជ្ញាធរជួយរកយុត្តិធម៌សម្រាប់ពួកគាត់នោះ កាលពីព្រឹកថ្ងៃទី១៧ សីហា គេឃើញមន្ត្រីសាលាខេត្តបន្ទាយមានជ័យចំនួន៣រូបចុះពិនិត្យមើលដល់ចំណុចកើតហេតុ ។ ប្រជាពលរដ្ឋទាំង៤៤គ្រួសារនិយាយថា ពួកគាត់បានកាន់កាប់ដីចំណុចនេះតាំងពីឆ្នាំ១៩៩៧ លុះដល់ឆ្នាំ២០០០ ក៏មានជម្លោះប្តឹងប្តល់គ្នាជាមួយភាគីម្ខាងទៀត ដោយចំនួនអ្នកប្តឹងសរុប២១៨គ្រួសារ ហើយនៅឆ្នាំ២០០៥ ពួកគាត់ទាំង២១៨គ្រួសារ បានជួបបញ្ហាមួយក្នុងពេលអនុវត្តសាលក្រមដោយកាលនោះក្រុមពួកគាត់ បានស្លាប់៥នាក់ និងមួយចំនួនទៀតរងរបួស ។ ពួកគាត់បានរំលឹកទៀតថា កាលណោះអាជ្ញាធរ និងសមត្ថកិច្ចអនុវត្តសាលក្រមគឺពួកគាត់កំពុងតវ៉ានៅឯមុខរដ្ឋសភា លុះការអនុវត្តសាលក្រមបានបញ្ចប់ ពួកគាត់វិលមកវិញបែរជាក្រុមតំណាងថ្មីគេបដិសេធមិនឱ្យដីពួកគាត់ឡើយមកទល់ពេលនេះទើបពួកគាត់នៅតែបន្តធ្វើការតវ៉ារហូតមក ។
មន្ត្រីសាលាខេត្តមួយរូបក្នុងចំណោម៣រូបដែលមិនប្រាប់ឈ្មោះនិយាយថា រឿងរ៉ាវខាងលើវាជារឿងរបស់អ្នកជំនាន់មុន អូសបន្លាយមកដល់បច្ចុប្បន្ន ។ ដោយសារប្រជាពលរដ្ឋទាំងនេះ មានតែឈ្មោះក្នុងបញ្ជី តែពុំទទួលបានរបបដី ទើបធ្វើការតវ៉ាសុំឱ្យអាជ្ញាធរជួយ ។ មន្ត្រីដដែលបន្តថា ម៉្យាងទៀតមេធាវីការពារក្តីឱ្យប្រជាពលរដ្ឋ៤៤គ្រួសារបានលើកឡើងថា ដីចំណុច២១៨គ្រួសារនៅមានដីនៅឡើយ ម៉្យាងខាងអាជ្ញាធរក្រុងក៏ប្រាប់ដែរថា ដីចំណុចកើតហេតុនៅមាន ទើបលោកចុះមកពិនិត្យមើលឱ្យដឹងការពិតថា តើដីនៅមានមែន ឬក៏អត់ ។
មន្ត្រីដដែលបន្តទៀតថា ដោយសារកន្លងមកការដោះស្រាយមានភាពមិនប្រក្រតី ព្រោះកាលពីឆ្នាំ២០០២ មានបញ្ជីឈ្មោះរួម តែនៅឆ្នាំ២០០៧ បញ្ជីឈ្មោះបាត់ចំនួន៤៤គ្រួសារ ទើបមានរឿងតវ៉ាមកដល់ពេលនេះ ។ កន្លងមកអាជ្ញាធរខេត្តធ្លាប់បានចេញការណែនាំឱ្យចែកដីម្តងដែរ ប៉ុន្តែកាលនោះទើបតែចែកបានជាង១០០គ្រួសារ ស្រាប់តែ៤៤គ្រួសារធ្វើការតវ៉ា ព្រោះពួកគាត់ពុំបានដី ទើបអាជ្ញាធរខេត្តឱ្យផ្អាកវិញ ។
មន្ត្រីខាងលើបន្តថា ដោយការចុះពិនិត្យមើលនេះ ប្រជាពលរដ្ឋចង្អុលបង្ហាញថា ដីនៅសល់មែន ដូច្នេះលោកនឹងសុំគោលការណ៍ទៅលោក អភិបាលខេត្តបង្កើតក្រុមការងារមួយដែលមានមន្ត្រីពាក់ព័ន្ធក្នុងខេត្ត និងក្រុងចុះមកលើកក្រោយដោះស្រាយបញ្ហាហ្នឹង ដើម្បីបញ្ចប់ជម្លោះតាមគោលការណ៍ឈ្នះ=ឈ្នះ ៕
ចែករំលែកព័តមាននេះ