ខេត្តស្វាយរៀង ៖ មានការភ្ញាក់ផ្អើលមួយកើតឡើងនៅក្នុងបរិវេណកាស៊ីណូម៉ុកបាយ ក្រុងបាវិត ដោយស្ត្រីជាបុគ្គលិកកាស៊ីណូម្នាក់បានធ្លាក់ពីលើអគារជាន់ទី២ បណ្តាលឱ្យរងរបួសធ្ងន់ បាក់ចង្កេះ និងបាក់កជើងខាងស្តាំ សន្លប់នៅនឹងកន្លែង ។ ចំពោះករណីនេះមានខ្លះសង្ស័យថាមានមនុស្សច្រាន ខ្លះសង្ស័យថា រអិលជើងធ្លាក់ និងខ្លះទៀតសង្ស័យថាស្ត្រីរងគ្រោះលោតសម្លាប់ខ្លួន ។
ហេតុការណ៍ស្ត្រីជាបុគ្គលិកធ្លាក់ពីលើអគារកាស៊ីណូម៉ុកបាយនេះ បានកើតឡើងកាលពីវេលាម៉ោងប្រមាណ២និង២០នាទីរំលងអធ្រាត្រឈានចូលថ្ងៃទី១៩ សីហា ពីអគារជាន់ទី២នៃកាស៊ីណូម៉ុកបាយ ខាងលិចច្រកទ្វារព្រំដែនអន្តរជាតិបាវិតចម្ងាយប្រមាណ២០០ម៉ែត្រ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ។ បើតាមក្រុមគ្រួសារនិយាយថា ស្ត្រីរងគ្រោះឈ្មោះលី ស្រីពៅ អាយុ២៣ឆ្នាំ ជាបុគ្គលិកកាស៊ីណូម៉ុកបាយផ្នែកអ្នកចែកបៀ និងមានទីលំនៅក្នុងភូមិថ្នល់កែង ឃុំកណ្តៀងរាយ ស្រុកស្វាយទៀប ។ ប្រភពពីក្រុមគ្រួសារបន្តទៀតថា នាងមានប្តីធ្វើការនៅកាស៊ីណូក្រុងបាវិតដែរ និងមានកូនប្រុសម្នាក់អាយុ២ឆ្នាំ ទុកឱ្យម្តាយជួយមើលឱ្យ ទៅធ្វើការនៅកាស៊ីណូម៉ុកបាយក្រុងបាវិត គឺម៉ោងយប់ ហើយក៏មិនដឹងថាមានរឿងអ្វីដែរ ទើបបានជាធ្លាក់ពីលើអគារកាស៊ីណូពីជាន់ទី២ មកដីបាក់ចង្កេះ បាក់ជើងយ៉ាងដូច្នេះ ។
លោកវរសេនីយ៍ត្រីកែវ គង់ អធិការនគរបាលក្រុងបាវិត បានប្រាប់កោះសន្តិភាពតាមទូរស័ព្ទថា បើតាមមន្ត្រីនគរបាលក្រសួងមហាផ្ទៃប្រចាំការនៅកាស៊ីណូម៉ុកបាយប្រាប់ឱ្យដឹង គឺស្ត្រីរងគ្រោះស្រវឹង ពីព្រោះនៅយប់កើតហេតុនាងបានផឹកស៊ីជាមួយមិត្តភក្តិ៣-៤នាក់ដែលធ្វើការជាមួយគ្នាក្នុងអគារស្នាក់នៅរបស់បុគ្គលិកខាងក្រោយអគារកាស៊ីណូដោយផឹកស៊ីនៅជាន់ទី២។ លុះពេលស្រវឹងខ្លាំងដើរចេញពីក្នុងបន្ទប់ក៏រអិលជើងធ្លាក់ពីលើអគារតែម្តង ពុំមែនជាអំពើឃាតកម្មអ្វីទេ ។ ប៉ុន្តែទោះបីមានការអះអាងពីមន្ត្រីនគរបាលក្រសួងមហាផ្ទៃបែបនេះក្តី ក៏នគរបាលក្រុងបាវិតកំពុងស្រាវជ្រាវរកមិត្តភកិ្តដែលផឹកស៊ីជាមួយគ្នា ដើម្បីរកការពិតថា តើមានមនុស្សច្រានឬធ្លាក់ខ្លួនឯង ឬក៏ជាការប៉ុនប៉ងសម្លាប់ខ្លួន ។ ស្ត្រីរងគ្រោះត្រូវបានក្រុមគ្រួសារបញ្ជូនទៅមន្ទីរពេទ្យព្រះកុសុមៈឯរាជធានីភ្នំពេញ ដើម្បីសង្គ្រោះ ។
ដោយឡែក បុគ្គលិកកាស៊ីណូម្នាក់ទៀតឈ្មោះសុង ទីន ភេទប្រុស អាយុ៣៣ឆ្នាំ ត្រូវប្រពន្ធចាក់មួយកាំបិតចំក្រលៀនខាងឆ្វេង ប្រកាច់សន្លប់នៅក្នុងកាស៊ីណូ ដោយសារភ្លើងប្រចណ្ឌ កាលពីថ្ងៃទី១៦ សីហា វេលាម៉ោង១០យប់ហើយត្រូវមិត្តភក្តិដឹកយកមកសង្គ្រោះនៅមន្ទីរពេទ្យខេត្ត ។ ជនរងគ្រោះមានទីលំនៅក្នុងភូមិចាក់អង្រែលើ សង្កាត់ចាក់អង្រែ រាជធានីភ្នំពេញ ។
មិត្តភក្តិដែលដឹកជនរងគ្រោះមកកាន់មន្ទីរពេទ្យខេត្ត បង្ហើបថា ដោយសារប្រពន្ធប្រចណ្ឌ ក៏យកកាំបិតចុងស្រួចបម្រុងចាក់ប្រដាប់ភេទ តែពេលចាក់ខុសក៏ចំក្រលៀនខាងឆ្វេងលិច១កាំបិតបាញ់ឈាមពេញបន្ទប់សន្លប់នៅក្នុងថ្លុកឈាម ។ ក្រោយពីចាក់ប្តីហើយ ប្រពន្ធជាជនដៃដល់បានគេចខ្លួនបាត់ ៕
ចែករំលែកព័តមាននេះ