រាជធានីភ្នំពេញ ៖ ក្រុមហ៊ុនមេត្រូគ្រុបខេមបូឌា បានរៀបចំសិក្ខាសាលាដើម្បីបង្ហាញនូវផលិតផលថ្មី និងផ្ដល់ការយល់ដឹងពីផលិតផលCaterpilla បន្ថែមដល់អតិថិជនរបស់ខ្លួន ដែលមានការចូលរួមពន្យល់ និងបង្ហាញពីអ្នកជំនាញមកពីប្រទេសសិង្ហបុរីនៅសណ្ឋាគារជូលីណា រាជធានីភ្នំពេញ កាលពីថ្ងៃទី១៤ សីហាឆ្នាំ២០១២ ។
គួររំលឹកថា នេះមិនមែនជាលើកទីមួយទេ ដែលក្រុមហ៊ុនមេត្រូគ្រុបខេមបូឌា រៀបចំសិក្ខាសាលារបស់ខ្លួន។ ក្រុមហ៊ុនមេត្រូគ្រុបខេមបូឌា ជាក្រុមហ៊ុនតំណាងរបស់រោងចក្រ Caterpilla ដែលទទួលលក់ផលិតផលម៉ាក Caterpilla ហៅកាត់ថា Cat ដែលបានដំណើរការរបស់ខ្លួនក្នុងប្រទេសកម្ពុជា ចាប់តាំងពីឆ្នាំ១៩៩៤ ដោយក្រុមហ៊ុននេះមានទីតាំងតែមួយគត់នៅក្នុងរាជធានីភ្នំពេញ។
លោក តាំង គឹមវេង ជានាយកចាត់ការទូទៅប្រធានផ្នែកលក់ និងទីផ្សាររបស់ក្រុមហ៊ុនមេត្រូគ្រុបខេមបូឌាប្រចាំកម្ពុជា បានផ្ដល់បទសម្ភាសន៍ដល់កោះសន្ដិភាពឱ្យដឹងថា សិក្ខាសាលានេះមានសារសំខាន់សម្រាប់់អតិថិជន ដើម្បីធ្វើការយល់ដឹងពីផលិតផល Caterpilla បន្ថែមជាពិសេសក្នុងគោលបំណងប្រមូលផ្ដុំអតិថិជនដែលប្រើប្រាស់ និងអតិថិជនដែលនឹងប្រើប្រាស់ផលិតផល Caterpilla ដើម្បីឱ្យពួកគេយល់ដឹងអំពីរបៀបប្រើប្រាស់ ការប្រើប្រាស់ផ្ដល់ការយល់ដឹងអំពីការថែរក្សាផលិតផលរបស់ខ្លួនជូនដល់អតិថិជន និងអាចឱ្យអតិថិជនស្វែងយល់អំពីផលិតផលណាមួយដែលខ្លួនត្រូវការ ។
លោកតាំង គឹមវេង មានប្រសាសន៍បន្ដថា ផលិតផល Caterpilla ហៅកាត់ថា Cat ជាផលិតផលរបស់សហរដ្ឋអាមេរិក ដែលមានសាខានៅប្រទេសមួយចំនួនដូចជា ប្រទេសចិន ជប៉ុន អង់គ្លេស និងមានទីស្នាក់ការធំនៅសហរដ្ឋអាមេរិក។ លោកបញ្ជាក់ថា គ្រប់ផលិតផល Caterpilla សុទ្ធតែមានគុណភាព ធន់ និងមានស្ដង់ដាដូចគ្នាឱ្យអតិថិជនជឿទុកចិត្ដក្នុងការប្រើប្រាស់ ។លោកបានអះអាងថា អតិថិជនដែលចង់ប្រើប្រាស់ផលិតផលដែលមានគុណភាព និងមានស្ដង់ដាគួរតែជ្រើសរើសផលិតផល Cat ជាជាងផលិតផលដែលមានតម្លៃថោកគ្មានគុណភាព ។ លោកបានលើកឡើងថា បច្ចុប្បន្នប្រជាពលរដ្ឋមានលទ្ធភាពទិញផលិតផលដែលមានគុណភាពដូចជាផលិតផល Cat ដោយសារបច្ចុប្បន្នប្រទេសកម្ពុជាមានការរីកចម្រើនដែលធ្វើឱ្យប្រជាពលរដ្ឋមានកម្រិតជីវភាពធូរធារ ។
សូមបញ្ជាក់ថាក្រុមហ៊ុនមេត្រូគ្រុបខេមបូឌា មានលក់ផលិតផលគ្រប់ប្រភេទដែលរោងចក្រ Caterpilla មានដូចជា គ្រឿងចក្រម៉ាស៊ីនភ្លើង ឧបករណ៍បំពាក់បន្ថែមលើគ្រឿងចក្រឧបករណ៍អគ្គិសនីផ្សេងៗ មានសេវាកម្មគ្រឿងបន្លាស់សុទ្ធពីរោងចក្រ Caterpilla និងសេវាកម្មជួសជុលនៅនឹងក្រុមហ៊ុនផ្ទាល់ និងសេវាកម្មដល់ទីកន្លែង ៕
ចែករំលែកព័តមាននេះ