ខេត្តកំពង់ស្ពឺ ៖ ព្រឹកថ្ងៃទី១៨ សីហា លោកនាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង ទីប្រឹក្សាផ្ទាល់ និងជានាយករងខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញជួបសំណេះសំណាលជាមួយសមាជិក សមាជិកាគណបក្សប្រជាជនកម្ពុជាឃុំព្រះនិពា្វន ស្រុកគងពិសី ខេត្តកំពង់ស្ពឺ និងឃុំដើមឫស ស្រុកកណ្តាលស្ទឹង ខេត្តកណ្តាល ចំនួន១.៤៥១នាក់។ ពិធីនេះបានប្រារព្ធធ្វើឡើងនៅក្នុងបរិវេណវត្តអន្លង់គគីរ ស្រុកគងពិសី ខេត្តកំពង់ស្ពឺ។
លោកនាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង បានមានប្រសាសន៍សម្ដែងនូវការកោតសរសើរ និងវាយតម្លៃខ្ពស់ចំពោះអាជ្ញាធរដែនដីគ្រប់លំដាប់ថ្នាក់រួមទាំងក្រុមការងារចុះជួយក្នុងមូលដ្ឋានដែលសម្រេចបានលទ្ធផលជាបន្តបន្ទាប់ក្នុងរយៈពេលកន្លងមក និងចូលរួមយ៉ាងសកម្មក្នុងការកសាង និងអភិវឌ្ឍន៍ ស្របតាមកម្មវិធីគោលនយោបាយរបស់រាជរដ្ឋាភិបាល និងគណបក្សប្រជាជនកម្ពុជាក្នុងការជំរុញការអនុវត្តនូវយុទ្ធសាស្រ្តចតុកោណដំណាក់កាលទី២ ដើម្បីកំណើនការងារសមធម៌ប្រសិទ្ធភាព ជាពិសេសធ្វើឱ្យប្រជាជនមានជំនឿជឿជាក់មកលើថ្នាក់ដឹកនាំ និងគណបក្សប្រជាជនកម្ពុជាដែលមានសម្តេចទាំងបី ជាពិសេសសម្តេចអគ្គមហាសេនាបតីតេជោហ៊ុន សែន ជាថ្នាក់ដឹកនាំដ៏ឆ្នើម។
លោកនាយឧត្តមសេនីយ៍កិត្តិបណ្ឌិត ក៏បានលើកឡើងពីការពាក់ព័ន្ធទៅនឹងការងារបោះបង្គោលព្រំដែនរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមដែលសម្តេចតេជោនាយករដ្ឋមន្រ្តីនៃព្រះរាជាណាចក្រកម្ពុជាបានបំភ្លឺជូនអង្គសភាក៏ដូចជា ប្រជាពលរដ្ឋទូទាំងប្រទេសបានជ្រាបច្បាស់អំពីសកម្មភាពការងារបោះបង្គោលព្រំដែនរវាងប្រទេសទាំង២ ដោយសម្តេចបានគូសបញ្ជាក់ថា ការបោះបង្គោលព្រំដែន គឺជារបងដ៏សំខាន់ក្នុងការការពារបូរណភាពទឹកដីឱ្យបានគង់វង្សសម្រាប់ជំនាន់ក្រោយ។ ទាក់ទិនទៅនឹងភាពរាំងស្ងួតនៅតាមបណ្តាឃុំមួយចំនួនក្នុងខេត្តកំពង់ស្ពឺ លោកនាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង បានជំរុញឱ្យក្រុមការងារចុះសិក្សាមើលជាបន្ទាន់ ដើម្បីបញ្ជូនម៉ានស៊ីនបូមទឹកជួយអន្តរាគមន៍សង្គ្រោះសំណាបបងប្អូនប្រជាពលរដ្ឋ ៕
ចែករំលែកព័តមាននេះ