រាជធានីភ្នំពេញ ៖ កាលពីថ្ងៃទី១៧ សីហា កន្លងមក លោកប៉ូ សំណាង បានចុះធ្វើការអប់រំកុមារចំនួនជាង១០០នាក់ រស់នៅតំបន់ត្រពាំងឈូក សង្កាត់ទឹកថ្លា ខណ្ឌសែនសុខ ទល់មុខមន្ទីរពេទ្យព្រះកុសុមៈជាតំបន់មួយដែលប្រឈមមុខនឹងការប្រើប្រាស់គ្រឿងញៀន ។
លោកប៉ូ សំណាង បានថ្លែងថា មកទល់នឹងពេលនេះមជ្ឈមណ្ឌលវប្បធម៌ជាតិនិងសីលធម៌សង្គមរបស់លោក បានចុះធ្វើសកម្មភាពអប់រំផ្សព្វផ្សាយដល់កុមារអំពីច្បាប់ប្រឆាំងគ្រឿងញៀន ច្បាប់ប្រឆាំងការជួញដូរមនុស្ស និងច្បាប់ចរាចរណ៍ដល់តំបន់ដែលប្រឈមនឹងការប្រើប្រាស់គ្រឿងញៀន ចំនួន៦តំបន់ ហើយក្នុងចំណោមតំបន់ចំនួន២០ដែលកំពុងប្រឈមមុខនឹងការប្រើប្រាស់គ្រឿងញៀននៅក្នុងរាជធានីភ្នំពេញ ។ តំបន់ទាំង៦ដែលលោកធ្លាប់បានចុះអប់រំនោះមានដូចជា តំបន់ភូមិប្អេរ ជិតសណ្ឋាគារអាំងទែរកុងទីណង់តាល់ តំបន់ប៊ូលឌិញ តំបន់រោងភាពយន្តហេមជាតិ តំបន់បឹងកក់ តំបន់បុរីកីឡា និងតំបន់ត្រពាំងឈូកមុខមន្ទីរពេទ្យព្រះកុសុមៈនេះ ប៉ុន្តែលោកមិនបានឱ្យដឹងទេថា តើតំបន់ចំនួន១៤ទៀតនោះស្ថិតនៅទីកន្លែងណាខ្លះទេ ។
គួរបញ្ជាក់ថា ក្នុងសកម្មភាពចុះអប់រំផ្សព្វផ្សាយលើកនេះ លោកប៉ូ សំណាង បានចែកសៀវភៅសរសេរដែលបង្កប់រូបភាពប្រយុទ្ធប្រឆាំងគ្រឿងញៀន ការជួញដូរមនុស្ស និងច្បាប់ស្តីពីចរាចរណ៍ផងដែរ ដោយម្នាក់ៗទទួលបានសៀវភៅមួយក្បាល មីមួយកញ្ចប់ នំប័ុងមួយ ហើយអាវយឺត និងមួកសម្រាប់អ្នកដែលឆ្លើយត្រូវអំពីគ្រោះថ្នាក់ដែលបណ្តាលមកពីការប្រើប្រាស់គ្រឿងញៀន ។
លោកប៉ូ សំណាង បានថ្លែងអំណរគុណចំពោះសប្បុរសជនទាំងអស់ដែលតែងតែជួយឧបត្ថម្ភគាំទ្រសកម្មភាពសង្គមរបស់មជ្ឈមណ្ឌលវប្បធម៌ជាតិនិងសីលធម៌សង្គមរបស់លោកឱ្យមានដំណើរការសកម្មភាពរហូតមកទល់នឹងបច្ចុប្បន្ននេះក្នុងនោះមាន លោកឧកញា៉ថុង អ៊ុយបាង និងលោកជំទាវ លោកស ខេង និងលោកជំទាវ លោកឧកញ៉ាពុង ឃាវសែនិងលោកជំទាវ លោកសូរ ឃុន និងលោកជំទាវ លោកម៉ក់ ពេជ្ជវិទ្ធ និងលោកជំទាវស៊ុយ សុផាន ៕
ចែករំលែកព័តមាននេះ