ខេត្តកំពត ៖ ស្ត្រីម្នាក់ជាអាជីវករលក់គ្រឿងទេសបានរងរបួសធ្ងន់ និងត្រូវបានអ្នករត់ម៉ូតូឌុបប្រទះឃើញនៅលើផ្លូវលំមួយក្បែរជើងភ្នំ ស្ថិតក្នុងភូមិភ្នំតូច ឃុំកណ្តោល ស្រុកទឹកឈូ ហើយក៏ជួយដឹកយកទៅសង្គ្រោះនៅគ្លីនិកឯកជនមួយ ។ តាមប្រភពព័ត៌មានឱ្យដឹងថា ស្ត្រីរងគ្រោះរូបនេះបានជិះម៉ូតូម៉ាកស្មាស់ពណ៌ខៀវលាយខ្មៅមួយគ្រឿងចេញពីផ្ទះ គោលបំណងយកលុយទៅសងគេនៅផ្សាររ៉ឺញាណ ចម្ងាយពីផ្ទះប្រមាណជាងពីរគីឡូម៉ែត្រ តែពេលទៅដល់ពាក់កណ្តាលផ្លូវក៏ត្រូវចោរប្រដាប់ដោយពូថៅស្ទាក់ចាប់ចង្កូតម៉ូតូ រួចវាយពីរខ្នងពូថៅចំក្បាលពីក្រោយសន្លប់រួចប្លន់យកលុយចំនួន៥០ម៉ឺនរៀល និងជិះម៉ូតូយកទៅបាត់ស្រមោល ។
ហេតុការណ៍នេះកើតឡើងកាលពីវេលាម៉ោង២និង២០នាទីរសៀលកាលពីថ្ងៃទី១៦ សីហា នៅផ្លូវលំក្បែរជើងភ្នំបុះដំបង ស្ថិតក្នុងភូមិភ្នំតូច ឃុំកណ្តោល ស្រុកទឹកឈូ ហើយក្រោយពីអ្នករត់ម៉ូតូឌុបដឹកជនរងគ្រោះដល់គ្លីនិកទើបរាយការណ៍ជូននគរបាលប៉ុស្តិ៍រដ្ឋបាលឱ្យដឹង។ មន្ត្រីនគរបាលមូលដ្ឋានឱ្យដឹងថា ស្ត្រីរងគ្រោះឈ្មោះសោម សារុំ អាយុ៣៥ឆ្នាំ ជាកសិករ និងរកស៊ីលក់គ្រឿងទេសបន្តិចបន្តួចនៅក្នុងភូមិ ។ ឯចោរប្លន់គឺជាបុរសម្នាក់ពាក់អាវយឺតដៃខ្លីពណ៌ខ្មៅស្លៀកខោខ្លីពណ៌ខ្មៅ នៅនឹងដៃកាន់កូនពូថៅមួយផង បានស្ទុះមកចាប់ចង្កូតម៉ូតូឱ្យឈប់រួចគំរាមឱ្យប្រមូលប្រាក់ដែលមាននៅក្នុងខ្លួនឱ្យទៅគេទាំងអស់។
ប្រភពព័ត៌មានដដែលបន្តទៀតថា ពេលនោះស្ត្រីរងគ្រោះថា អត់មានប្រាក់ទេ ហើយក៏មានការប្រវាយប្រតប់គ្នា រួចចោរនោះបានវាយស្ត្រីរងគ្រោះពីរខ្នងពូថៅចំក្បាលពីខាងក្រោយបណ្តាលឱ្យសន្លប់ ទើបជនល្មើសឆែកឆេរយកប្រាក់នៅជាប់នឹងខ្លួនដែលបម្រុងយកទៅសងគេចំនួន៥០ម៉ឺុនរៀលនោះអស់ ព្រមទាំងយកម៉ូតូស្ត្រីរងគ្រោះជិះចេញទៅបាត់ទៅ ។ មួយសន្ទុះក្រោយមក ពេលស្ត្រីរងគ្រោះដឹងខ្លួនវិញឃើញអ្នករត់ម៉ូតូឌុបធ្វើដំណើរតាមផ្លូវក៏លើកដៃបក់និងស្រែកឱ្យឌុបជួយនាំទៅមន្ទីរពេទ្យដោយប្រាប់អ្នករត់ម៉ូតូឌុបថា ត្រូវចោរប្លន់វាយនិងខ្នងពូថៅគេយកលុយនិងម៉ូតូទៅបាត់ហើយ ។
ចំពោះករណីនេះកម្លាំងអធិការដ្ឋាននគរបាលស្រុកទឹកឈូបានសហការជាមួយកម្លាំងកងរាជអាវុធហត្ថស្រុកបញ្ជាឱ្យកម្លាំងតាមគោលដៅទាំងអស់ទូទាំងស្រុកនិងនគរបាលប៉ុស្តិ៍ផងដែរ ដាក់កម្លាំងពួនស្ទាក់គ្រប់ច្រកចេញចូលទំាងអស់ ដើម្បីប្រមាញ់ចោររូបនោះ ប៉ុន្តែការត្រួតពិនិត្យនិងស្រាវជ្រាវតាំងពីក្រោយពេលកើតហេតុរហូតមកដល់ព្រឹកថ្ងៃទី១៧ សីហា នៅពុំទាន់ចាប់ជនល្មើសបាននៅឡើយទេ។ រីឯស្ត្រីរងគ្រោះដោយសាររបួសធ្ងន់ពេក ខាងគ្លីនិកក៏បានឱ្យក្រុមគ្រួសារដឹកយកទៅព្យាបាលនៅមន្ទីរពេទ្យខេត្តតាកែវ បន្តទៀត ៕
ចែករំលែកព័តមាននេះ