ខេត្តតាកែវ ៖ កម្ពុជាប្រទេសមួយដែលសម្បូរធនធានធម្មជាតិ ក្នុងនោះមានត្រីជាដើម ដែលពលរដ្ឋខ្មែរភាគច្រើនបានពឹងផ្អែកទាំងស្រុងទៅលើការនេសាទត្រី ដើម្បីផ្គត់ផ្គង់គ្រួសារ ។ «ទីណាមានទឹកទីនោះមានត្រី»នេះជាពាក្យដែលខ្មែរបានប្រើជាទូទៅរៀងមក ។ ការប្រើពាក្យនេះ ដោយសារកម្ពុជាជាប្រទេសសម្បូរត្រី ពិសេសត្រីទឹកសាប ។
បឹងទន្លេសាប ជាប្រភពផ្តល់ត្រីដ៏សម្បូរបែប តែបច្ចុប្បន្នដោយសារបឹងកាន់តែរាក់ មនុស្សកាន់តែច្រើន ធ្វើឱ្យផលត្រីមានការថយចុះ ។ ដូច្នេះដើម្បីបំពេញតម្រូវការដ៏ច្រើន យើងត្រូវបង្កើតឱ្យមានអាជីពចិញ្ចឹមត្រីនេះបន្ថែមទៀត ហើយអាជីពនេះអាចទទួលបានប្រាក់ចំណូលសម្រាប់ផ្គត់ផ្គង់ជីវភាពគ្រួសារបានប្រសើរផងដែរ ។
ស្ត្រីឈ្មោះ គង់ គន អាយុ៤៩ឆ្នាំ រស់នៅភូមិព្រៃសំបូរ ឃុំអង្គរ ស្រុកអង្គរបុរី ខេត្តតាកែវដែលចាប់អាជីពជាអ្នកចិញ្ចឹមត្រីរយៈពេល៧ឆ្នាំកន្លងមកហើយ បានរៀបរាប់ប្រាប់ឱ្យដឹងថា ការចិញ្ជេឹមត្រី និងចេះពីរបៀបចិញ្ចឹមត្រីនេះ ដំបូូងឡើយមានមន្ត្រីកសិកម្មមកបណ្តុះបណ្តាលតាមភូមិ-ឃុំរបស់គាត់ ទើបប្តីរបស់គាត់ចូលរៀនវគ្គបណ្តុះបណ្តាលនេះ និងបន្តការសិក្សាវគ្គនេះបន្ថែមទៀតនៅប្រទេសវៀតណាមអស់រយៈពេល២ខែទាំងរបៀបចិញ្ចឹម និងរបៀបភ្ញាស់ពង និងការផ្គត់ផ្គង់ចំណី ។
ស្ត្រីឈ្មោះគង់ គន បញ្ជាក់ទៀតថា កសិដ្ឋានរបស់គាត់លាតសន្ធឹងលើផ្ទៃដីចំនួន៦ហិកតា ។ ក្នុងនោះរួមមានទាំងអាងដាក់ត្រីតូច និងត្រីធំបូករួមទាំងអាងចិញ្ចឹមបង្កងដែរ ។ ត្រីដែលចិញ្ចឹម និងភ្ញាស់មានច្រើនប្រភេទដូចជា ត្រីឆ្អិន ត្រីប្រា ត្រីទីឡាប់យ៉ា ត្រីកាបស និងត្រីកាបក្រហម ជាដើម ។ កូនត្រីភ្ញាស់បាននឹងធ្វើការលក់ចេញទៅតាមបណ្តាខេត្តនានារួមមានខេត្តបាត់ដំបង ប៉ៃលិន និងលក់បន្តឱ្យបងប្អូនក្នុងខេត្តជាមួយគ្នាផងដែរ ។ ស្ត្រីឈ្មោះគង់ គន ក៏បានបន្តឱ្យដឹងទៀតថា នៅក្នុងកសិដ្ឋានរបស់គាត់ក៏មានចិញ្ចឹមពូជបង្កងទឹកសាបផងដែរ ។ ទាំងការចិញ្ចឹមត្រី និងចិញ្ចឹមបង្កងនេះអាចបង្កើនប្រាក់ចំណូលធ្វើឱ្យជីវភាពរបស់ក្រុមគ្រួសារគាត់បានធូរធារច្រើន ។
លោកខ្លី អីុ រស់នៅភូមិតាសាន និងជាអ្នកចិញ្ចឹមត្រីដែរនោះ បានឱ្យដឹងដែរថា គាត់បានចិញ្ចឹមកូនត្រីចម្រុះចំនួន២.៥០០ក្បាល ក្នុងស្រះទំហំ៣០គុណនឹង៤០ម៉ែត្រ ។ ចំពោះកូនត្រី គឺទិញមកពីកសិដ្ឋានរបស់ ឈ្មោះគង់ គន ដែលកូនត្រីមួយក្បាលតម្លៃចាប់ពី៩០រៀលទៅ១២០រៀល ។ ដោយសារការចិញ្ចឹមត្រីនេះ ធ្វើឱ្យជីវភាពរបស់គាត់ធូរធារជាងមុន ៕
ចែករំលែកព័តមាននេះ