អាជ្ញាធរស៊ីរីកាលពីថ្ងៃទី១៨ សីហា បានបដិសេធពាក្យចចាមអារ៉ាមដែលនិយាយពីការរត់ចោលជួររបស់អនុប្រធានាធិបតីស៊ីរីលោក ហ្វារុក អាល់ចារ៉ា ចំណែកកងទ័ពរដ្ឋាភិបាលវិញ បានបង្កើនការគាបសង្កត់លើបណ្តាទីតាំងរបស់ពួកឧទ្ទាម នៅក្រុងអាឡែប និងនៅភាគខាងកើតប្រទេស ។
ដោយដកស្រង់សេចក្តីប្រកាសមួយរបស់ខុទ្ទកាល័យអនុប្រធានាធិបតី ទូរទស្សន៍រដ្ឋស៊ីរី គូសបញ្ជាក់ថា ពាក្យចចាមអារ៉ាមនោះចេញនៅប្រទេសហ្ស៊កដានី ។ លោកហ្វារុកអាល់ ចារ៉ា គ្មានពេលណាមួយនឹកគិតចាកចេញពីប្រទេសឡើយ ។ ការបដិសេធនេះរបស់ក្រុងដាម៉ាស់ ធ្វើឡើង២ថ្ងៃក្រោយការប្រកាសពីការរត់ចោលជួររបស់ប្អូនជីដូនមួយម្នាក់របស់លោក ដែលជាសមាជិកនៃភ្នាក់ងារស៊ើបការណ៍ ។
លោកចារ៉ា ត្រូវបានជ្រើសតាំងជាអនុប្រធានាធិបតីកាលពី៦ឆ្នាំមុន ក្រោយការរត់ចោលជួររបស់អ្នកកាន់តំណែងនេះមុនលោក គឺលោកអាប់ឌូល ហាលីមកាដដាម ជាជនស៊ុននីត មានដើមកំណើតនៅខេត្តដឺរ៉ាអា ជាទីតាំងនៃចលនាតវ៉ាប្រឆាំងរបបលោកបាចាអាល់អាសាដ ។
យោងតាមសេចក្តីប្រកាសមួយថា លោកហ្វារុកអាល់ ចារ៉ា ខិតខំរួមចំណែកឱ្យមានដំណោះស្រាយនយោបាយមួយតាំងពីចាប់ផ្តើមការបះបោរមកម្ល៉េះ ។ ម្យ៉ាងវិញទៀត លោកបានសម្រួលដល់ការតែងតាំងលោកឡាក់ដា ប្រាហ៊ីមីឱ្យកាន់តំណែងអាជ្ញាកណ្តាលអន្តរជាតិក្រោយការលាលែងរបស់លោកកូហ្វីអាណាន់ ៕
ចែករំលែកព័តមាននេះ