ខេត្តស្វាយរៀង ៖ នារីវ័យក្មេងស្រស់ស្អាតម្នាក់ជាបុគ្គលិកកាស៊ីណូម៉ុកបាយ បានធ្លាក់ពីលើអគារកាស៊ីណូជាន់ទី២ បណ្តាលឱ្យរងរបួសធ្ងន់បាក់ចង្កេះ និងបាក់.កជើងខាងស្តាំសន្លប់ស្តូកស្តឹងនៅនឹងកន្លែង ដែលសង្ស័យថា មានមនុស្សច្រាន ខ្លះថារអិលជើងធ្លាក់ អ្នកខ្លះទៀតថា នារីរងគ្រោះលោតសម្លាប់ខ្លួន បង្កឱ្យមានការភ្ញាក់ផ្អើល កាលពីវេលាម៉ោង២និង២០នាទីរំលងអធ្រាត្រឈានចូលថ្ងៃទី១៩ សីហា ២០១២ នៅកាស៊ីណូម៉ុកបាយ ខាងលិចច្រកទ្វារព្រំដែនអន្តរជាតិបាវិតចម្ងាយប្រហែល២០០ម៉ែត្រ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ។
នារីរងគ្រោះឈ្មោះលី ស្រីពៅ អាយុ២៣ឆ្នាំ ជាបុគ្គលិកកាស៊ីណូម៉ុកបាយ មានទីលំនៅភូមិថ្នល់កែង ឃុំកណ្តៀងរាយ ស្រុកស្វាយទាប។ លោកវរសេនីយ៍ត្រី កែវ គង់ អធិការនគរបាលក្រុងបាវិត ប្រាប់កោះសន្តិភាពតាមទូរស័ព្ទថា បើតាមមន្ត្រីប៉ូលិសក្រសួងមហាផ្ទៃប្រចាំការនៅកាស៊ីណូម៉ុកបាយ ប្រាប់ឱ្យដឹងថា នៅយប់កើតហេតុនារីរងគ្រោះបានផឹកស៊ីជាមួយមិត្តភក្តិ៣ទៅ៤នាក់ដែលធ្វើការជាមួយគ្នានៅក្នុងអគារស្នាក់នៅរបស់បុគ្គលិកជាន់ទី២ រហូតស្រវឹងជោកលែងដឹងខ្លួនវង្វេងដើរចេញពីក្នុងបន្ទប់ក៏រអិលជើងធ្លាក់ពីលើអគារតែម្តង ពុំមានអំពើឃាតកម្មអ្វីទេ ។ ប៉ុន្តែទោះបីជាមានការអះអាងពីមន្ត្រីប៉ូលិសក្រសួងមហាផ្ទៃបែបនេះក្តីក៏ប៉ូលិសក្រុងបាវិត កំពុងអង្កេតស្រាវជ្រាវរកមិត្តភក្តិដែលផឹកស៊ីជាមួយគ្នា ដើម្បីរកការពិតថា មានមនុស្សច្រាន ឬធ្លាក់ខ្លួនឯង ឬក៏លោតសម្លាប់ខ្លួន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ