ខេត្តស្វាយរៀង ៖ មានករណីអំពើហិង្សាក្នុងគ្រួសារមួយបានកើតឡើង ដោយសារតែបុរសម្នាក់ស្រវឹងដេញវាយប្រពន្ធ ខណៈពេលបងប្រុសបង្កើត និងបងថ្លៃទៅឃាត់ក៏វាយបងប្រុស២ចបជីកចំក្បាលបែកដួលសន្លប់ក្នុងថ្លុកឈាម លុះស្ត្រីជាប្រពន្ធត្រូវជាបងថ្លៃស្ទុះចូលទៅជួយប្តីក៏ត្រូវប្អូនថ្លៃកំណាចចាប់បោកទៅលើដីរួចជាន់ច្រំលើដើមទ្រូង និងពោះរហូតធ្លាក់ឈាមសន្លប់ស្តូកស្តឹង២នាក់ប្តីប្រពន្ធត្រូវបានអ្នកស្រកហៅរថយន្តដឹកទៅកាន់មន្ទីរពេទ្យខេត្តដើម្បីសង្គ្រោះ ដែលហេតុការណ៍នេះបង្កឱ្យមានការភ្ញាក់ផ្អើល កាលពីថ្ងៃទី១៨ សីហា ២០១២ វេលាម៉ោង៦និង៣០នាទីល្ងាចស្ថិតក្នុងភូមិថ្មី សង្កាត់សង្ឃ័រ ក្រុងស្វាយរៀង ។
បើតាមសមត្ថកិច្ចប្រាប់ឱ្យដឹងថា ជនរងគ្រោះឈ្មោះយឹម ចាន់ ភេទប្រុស អាយុ២៥ឆ្នាំ រស់នៅភូមិកើតហេតុខាងលើត្រូវប្អូនប្រុសឈ្មោះយឹម កែវ អាយុ២០ឆ្នាំ យកចបជីកវាយត្រូវចំក្បាលចំនួន២ចបជីក បែកក្បាលដួលសន្លប់ក្នុងថ្លុកឈាម ចំណែកស្ត្រីជាប្រពន្ធឈ្មោះខៀវ សុភក្តិ អាយុ៣០ឆ្នាំ ត្រូវប្អូនថ្លៃចាប់បោកដួលទៅលើដីជាន់ច្រំពីលើដើមទ្រូង និងពោះរហូតធ្លាក់ឈាមសន្លប់ក្បែរប្តីគួរឱ្យសង្វេគ ។
ប្រភពពីជនរងគ្រោះឱ្យដឹងថា មុនពេលកើតហេតុពួកគេ២នាក់ប្តីប្រពន្ធអង្គុយនៅលើផ្ទះ ស្រាប់តែឃើញប្អូនប្រុសឈ្មោះយឹម កែវ ស្រវឹងមកពីណាទេ ដើរស្រែកឡូឡាជេរប្រពន្ធឈ្មោះភ្លុក រួចទាញព្រនង់ដេញវាយ ។ ដោយឃើញបែបនេះរូបគេ (យឹម ចាន់) ក៏ចុះពីលើផ្ទះមកឃាត់កុំឱ្យប្អូនប្រុសជេរ និងវាយប្រពន្ធ ខណៈនោះអាប្អូនកំណាចទាញបានចបជីកវាយទៅលើក្បាលរូបគេ២ចបជីក បណ្តាលឱ្យបែកស្រាំលលាដ៍ដួលសន្លប់ ហើយក៏ចាប់បោកបងថ្លៃស្រីទៅលើដីជាន់ច្រំដើមទ្រូង និងពោះរហូតធ្លាក់ឈាមសន្លប់ដូចគ្នា ដោយឡែកជនដៃដល់រត់គេចខ្លួនបាត់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ