រាជធានីភ្នំពេញ ៖ បុរសជាខ្មាន់កាំភ្លើងដែលជាប់ពាក់ព័ន្ធនឹងការផ្ទុះអាវុធ នៅសណ្ឋាគារសម្បត្តិផល ស្ថិតនៅបណ្តោយផ្លូវលេខ១៥០ សង្កាត់ទឹកល្អក់ទី២ ខណ្ឌទួលគោក កាលពីខែមុនក្នុងរឿងដណ្តើមស្រីស្នេហ៍ ត្រូវនគរបាលព្រហ្មទណ្ឌកម្រិតធ្ងន់រាជធានីឃាត់ខ្លួនបានម្នាក់ក្នុងចំណោមបក្សពួក២នាក់ កាលពីរសៀលថ្ងៃទី១៧ សីហា នៅមុខអាកាសយានដ្ឋានអន្តរជាតិភ្នំពេញ ។ ជនសង្ស័យជាខ្មាន់កាំភ្លើងនេះឈ្មោះ សាន សុផល អាយុ៣២ឆ្នាំ ស្នាក់នៅផ្ទះលេខ២១៣ ផ្លូវលេខ១៩ ភូមិ១១ សង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅឃុំដំរិល ស្រុកអូរាំងឪ ខេត្តកំពង់ចាម ។
តាមលោកវរសេនីយ៍ទោ ជួន ណារិន្ទ ប្រធានការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ បានឱ្យដឹងថា តាមដម្លើយរបស់ឈ្មោះ សាន សុផល ថា កាលពីខែកក្កដា ២០១១ គេមានទំនាស់ជាមួយមិត្តភក្តិឈ្មោះ ផុន វុទ្ធា ដែលកាលណោះខ្លួន(សាន សុផល)បានណាត់ឱ្យនារីឈ្មោះ វង្ស ពិសី ជាសង្សារ វុទ្ធា ទៅជួបគេនៅក្បែររបងវិទ្យាល័យព្រះស៊ីសុវត្ថិ ដើម្បីយកប្រាក់១១០ដុល្លារ ទៅសងនាងវិញដែលខ្លួនបានជំពាក់កន្លងមក ។ ពេលនោះនាងក៏បានទៅជួបតាមការណាត់ ប៉ុន្តែមិនមែនទៅម្នាក់ឯងទេគឺនាងបានហៅសង្សារ នឹងមិត្តភក្តិ២នាក់ទៀតទៅជាមួយ។
លោកជួន ណារិន្ទ បានបន្តថា ពេលជួបគ្នានោះ សាន សុផល ក៏ប្រគល់ប្រាក់១១០ដុល្លារឱ្យទៅនារីឈ្មោះ ពិសី ស្រាប់តែ វុទ្ធា នឹងបក្សពួកបានស្ទុះទៅវាយទាត់ធាក់ឈ្មោះ សុផល ជាច្រើនដៃនិងបានយកទូរស័ព្ទដៃ១គ្រឿង ខ្សែ.ក១ខ្សែលុយក្នុងហោប៉ៅ រួចគេចខ្លួនបាត់ ។ ទង្វើទាំងអស់នោះបានធ្វើឱ្យ សាន សុផល មានការឈឺចាប់និងកើតជាគំនុំជាប់រហូតមក ប៉ុន្តែរយៈពេល១ឆ្នាំ ដែលគេមិនបានជួបជនខាងលើនិងបក្សពួកសោះ។ លុះថ្ងៃទី១៦ កក្កដា ២០១២ សាន សុផល បានទទួលដំណឹងថា ឈ្មោះ វុទ្ធា និងសង្សារឈ្មោះ ពិសី កំពុងស្នាក់នៅសណ្ឋាគារសម្បត្តិផល បន្ទប់លេខ៥១៦ ជាន់ទី៥ ស្ថិតក្នុងសង្កាត់ទឹកល្អក់២ ខណ្ឌទួលគោក ។ នៅម៉ោងប្រមាណជិត១រំលងអធ្រាត្រឈានចូលថ្ងៃទី១៧ កក្កដា ឈ្មោះ សាន សុផល បានឱ្យមិត្តភក្តិម្នាក់ឈ្មោះ វីន ជូនទៅកាន់សណ្ឋាគារនោះដើម្បីសងសឹក ។
ពេលទៅដល់បានឃើញវុទ្ធា និងនាងពិសីនៅជាមួយគ្នាមែន ព្រមទាំងមិត្តភក្តិគេ២នាក់ទៀត ពេលនោះសុផលបានសួរទៅ វុទ្ធា ថា លើកមុនហេតុអីបានជាឯងព្រួតគ្នាវាយអញ ។ ខណៈនោះឈ្មោះ វុទ្ធា មិនបានតបវិញទេខ្លួនក៏ដកកាំភ្លើងខ្លីម៉ាកកា៥៤ពីចង្កេះស្ទុះទៅវាយក្បាលវុទ្ធា ទើបមានការតបតគ្នាធ្វើឱ្យផ្ទុះអាវុធ១គ្រាប់បណ្តាលឱ្យឈ្មោះ វុទ្ធារងរបួសរួចសាន សុផល ក៏គេចខ្លួនតែម្តងទៅ។
គួររំលឹកថា ការរៀបរាប់ខាងលើនេះវាខុសគ្នាពីការទទួលព័ត៌មានក្រោយពេលកើតហេតុដែលប្រភពបានឱ្យដឹងថា រវាងខ្មាន់កាំភ្លើង និងជនរងគ្រោះគឺថាមិត្តភក្តិ និងគ្នា ហើយខ្មាន់កាំភ្លើងនេះតាមសុំស្នេហ៍នាងជាសង្សាររបស់មិត្តភក្តិហើយនាងបានប្រាប់ប្រុសស្នេហ៍របស់ខ្លួនទើបមានការស្តីបន្ទោសហើយក៏មានកំហឹងនឹងគ្នាដោយសារតែរឿងដណ្តើមស្រីស្នេហ៍ ។
លុះនៅម៉ោង៤និង៣០នាទីថ្ងៃទី១៧ សីហា ២០១២ នេះត្រូវសមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញចាប់ខ្លួន នៅមុខព្រលានយន្តហោះអន្តរជាតិភ្នំពេញ ខណៈជនសង្ស័យខាងលើកំពុងធ្វើដំណើរទៅលេងផ្ទះមិត្តភក្តិ ។ ក្រោយពីឃាត់ខ្លួនជនសង្ស័យជាខ្មាន់កាំភ្លើងដែលបាញ់ប្រហារមិត្តភក្តិ ត្រូវសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់កសាងសំណុំរឿងបញ្ជូនទៅកាន់សាលាដំបូងរាជធានីតាមផ្លូវច្បាប់ ៕
ចែករំលែកព័តមាននេះ