រាជធានីភ្នំពេញ ៖ យោងតាមសេចក្តីប្រកាសព័ត៌មានមួយរបស់ចលនាប្រជាធិបតេយ្យ សង្គ្រោះជាតិចុះថ្ងៃទី១៧ សីហា ២០១២ បានឱ្យដឹងថា លេខាធិការចលនាប្រជាធិបតេយ្យសង្គ្រោះជាតិជូនដំណឹងដល់សាធារណជន អង្គការក្រៅរដ្ឋាភិបាល តំណាងស្ថានទូត និងសារព័ត៌មានជាតិ នងិអន្តរជាតិនានាឱ្យបានជ្រាបថា ចលនាប្រជាធិបតេយ្យសង្គ្រោះជាតិ នឹងរៀបចំធ្វើសន្និសីទសារព័ត៌មានស្តីពី «ការបង្កើតគណបក្សសង្គ្រោះជាតិ» នៅវេលាម៉ោង១រសៀលថ្ងៃទី២០ សីហា ២០១២ ស្ថិតនៅស្នាក់ការកណ្តាលគណបក្សសង្គ្រោះជាតិផ្ទះលេខ៣៨ ផ្លូវលេខ១៩៧២ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
មន្ត្រីគណបក្សសម រង្ស៊ី បានបញ្ជាក់ថា ក្នុងសន្និសីទនេះលោកសម រង្ស៊ី នឹងមានប្រសាសន៍ពីប្រទេសបារាំង និងមានការចូលរួមពីអ្នកគាំទ្រចំនួន៨០នាក់ ។ ក្នុងសន្និសីទកាសែតនេះអ្នកចូលរួមនឹងសម្រេចក្នុងការបង្កើត គណៈកម្មការបណ្តោះអាសន្នមួយមុនពេលឈានដល់ការបង្កើតគណបក្ស សង្គ្រោះជាតិ ។ ស្របពេលជាមួយគ្នានដែរ អ្នកចូលរួម នឹងជ្រើសរើសថ្នាក់ដឹកនាំគណៈកម្មការបណ្តោះអាសន្នចំនួន៧រូប ។ ដោយឡែកមន្ត្រីគណបក្សសិទ្ធិមនុស្សអះអាងថា នៅថ្ងៃទី២០ សីហា ក្រុមការងាររបស់ចលនាប្រជាធិបតេយ្យសង្គ្រោះជាតិ និងដាក់ពាក្យទៅក្រសួងមហាផ្ទៃចុះឈ្មោះបក្ស និងរចនាសម្ព័ន្ធរបស់បក្ស ៕
ចែករំលែកព័តមាននេះ