ខេត្តប៉ៃលិន ៖ បុរសចំណាស់ជនជាតិថៃម្នាក់បានដេកស្លាប់នៅមុខបន្ទប់ជួលមួយកន្លែង និងបង្កឱ្យមានការភ្ញាក់ផ្អើលកាលពីវេលាម៉ោង៤និង៤០នាទីទៀបភ្លឺថ្ងៃទី១៨ សីហា នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។ បុរសចំណាស់ម្នាក់នេះឈ្មោះ កូឡា ឆាត អាយុ៦២ឆ្នាំ ស្នាក់នៅបណ្តោះអាសន្នក្នុងផ្ទះជួលបន្ទប់លេខ២ ដែលមានម្ចាស់ផ្ទះឈ្មោះ ពៅ សុទ្ធ ភេទស្រី អាយុ៤៥ឆ្នាំ ។
ប្រភពព័ត៌មានបានឱ្យដឹងថា បុរសជនជាតិថៃរូបនេះទើបតែត្រឡប់មកពីស្រុករបស់ខ្លួនវិញ ហើយនៅមុនពេលកើតហេតុ២ថ្ងៃ គាត់តែងតែទៅលេងល្បែងស៊ីសងនៅក្នុងកាស៊ីណូតាំងពីក្បាលល្ងាចរហូតដល់ទៀបភ្លឺទើបត្រឡប់មកផ្ទះជួលវិញ ។ លុះនៅថ្ងៃកើតហេតុវេលាម៉ោង៤និង៤០នាទីទៀបភ្លឺពេលដែលបុគ្គលិកកាស៊ីណូ២ទៅ៣នាក់ ចេញមកពីធ្វើការវិញ ដើរកាត់មុខផ្ទះរបស់គាត់ ស្រាប់តែប្រទះឃើញបុរសរូបនេះដេកស្លាប់នៅក្បែរមាត់ទ្វារ ។ ពេលឃើញភ្លាមដោយមានការភ័យខ្លាច ទើបប្រាប់ម្ចាស់ផ្ទះឱ្យមកមើល លុះក្រោយមកម្ចាស់ផ្ទះក៏ទៅប្តឹងសមត្ថកិច្ចនៅប៉ុស្តិ៍ស្ទឹងកាច់ឱ្យមកពិនិត្យសព ។
មន្ត្រីនគរបាលប៉ុស្តិ៍ស្ទឹងកាច់ និងកងរាជអាវុធហត្ថខេត្ត ព្រមទាំងមន្ត្រីសមត្ថកិច្ចនៅព្រំដែនជាច្រើនរូបទៀតបានមកដល់កន្លែងកើតហេតុ រួចធ្វើកោសល្យវិច័យសពឃើញថា មិនមានស្នាមជាំអ្វីនៅលើរាងកាយ ឬមានផឹកថ្នាំពុលអ្វីទេ តែប្រហែលជាជនរងគ្រោះកើតជំងឺខ្យល់គរ ឬខ្សោយបេះដូង ។ ពេលជំងឺនោះធ្វើទុក្ខ គាត់បើកទ្វារចេញមកក្រៅដើម្បីហៅគេឱ្យជួយរឺត តែក៏ដួលនៅមុខទ្វារបន្ទប់ស្លាប់តែម្តង ដោយមានស្នាមជាំនៅលើក្បាលជង្គង់ខាងឆ្វេងដោយសារដួលបុកនឹងថ្ម ។ លុះសមត្ថកិច្ចធ្វើការឆែកឆេរបានរកឃើញសុទ្ធតែថ្នាំពេទ្យយ៉ាងច្រើននៅលើគ្រែ និងនៅលើកម្រាលឥដ្ឋ ។
ស្ត្រីឈ្មោះ ពៅ សុទ្ធ ជាម្ចាស់ផ្ទះជួលឱ្យដឹងថា គាត់បានជួលបន្ទប់ឱ្យបុរសជនជាតិថៃនេះស្នាក់នៅអស់រយៈពេល២ឆ្នាំមកហើយ តែក្នុងមួយខែៗបុរសរូបនេះស្នាក់នៅតែប្រហែលមួយអាទិត្យប៉ុណ្ណោះ ដោយគាត់ជាអ្នកលេងល្បែង តែងតែទៅរកប្រាក់នៅឯស្រុករបស់ខ្លួនដើម្បីយកមកចូលលេងក្នុងកាស៊ីណូ ។ ប្រភពព័ត៌មានបន្តថា ជារៀងរាល់យប់ឱ្យតែគាត់មានប្រាក់គឺមិនដែលសម្រាកនៅក្នុងបន្ទប់ផ្ទះជួលនេះទេ គឺសម្រាកតែពេលថ្ងៃប៉ុណ្ណោះ ។ បុរសរងគ្រោះឈ្មោះ កូឡាឆាត នេះគ្មានបងប្អូន ឬសាច់ញាតិរស់នៅជាមួយទេ គាត់មកជួលបន្ទប់ស្នាក់នៅតែម្នាក់ឯង ។
ប្រភពព័ត៌មានបន្តទៀតថា លុះដល់ម៉ោង៨និង៣០នាទីព្រឹក ពេលសមត្ថកិច្ចពិនិត្យធ្វើកោសល្យវិច័យរួចរាល់អស់ មិនឃើញមានអ្វីប្លែក ក៏ប្រគល់សពទៅឱ្យភ្នាក់ងារជនជាតិថៃនាំយកត្រឡប់ទៅប្រទេសរបស់ខ្លួនវិញ ៕
ចែករំលែកព័តមាននេះ