កីឡាករលំដាប់ទី១ពិភពលោករ៉ូជើ ហ្វេដឺរ័រនឹងជួបប្រកួតជាមួយកីឡាករលំដាប់ទី២ពិភពលោកណូវ៉ាក់ យ៉ូកូវិចដើម្បីប្រជែងយកពានជើងឯកកម្មវិធី Cincinnati Openវគ្គផ្តាច់ព្រ័ត្របន្ទាប់ពីពួកគេទាំង២នាក់បានឈ្នះគូប្រកួតរៀងៗខ្លួនក្នុងវគ្គពាក់កណ្តាលផ្តាច់ព្រ័ត្រកាលពីថ្ងៃសៅរ៍ទី១៨សីហាកន្លងមក ។ ការប្រកួតត្រូវបានរៀបចំធ្វើនៅក្រុង Cincinnatiរដ្ឋអូហៃយ៉ូសហរដ្ឋអាមេរិក ។
ហ្វេដឺរ័របានបំបាក់មិត្តរួមជាតិខ្លួន Stanislas Wawrinka ក្នុងលទ្ធផល ៧-៦និង៦-៣ ខណៈកីឡាករយូកូវិចបំបាក់កីឡាករអាហ្សង់ទីនចូអាន ម៉ាទីន ឌែលប៉ូត្រូក្នុងលទ្ធផល ៦-៣និង៦-២ ។
ហ្វេដឺរ័រពេលនេះកំពុងតែព្យាយាមដណ្តើមយកពានជាលើកទី៥ខណៈយ៉ូកូវិចកំពុងដណ្តើមយកពានជាលើកទី១ ។ សម្រាប់កីឡាករស៊ែប៊ីយ៉ូកូវិច គេធ្លាប់បានបរាជ័យក្នុងវគ្គផ្តាច់ព្រ័ត្រនៅទីនេះចំនួន៣លើករួចមកហើយដោយគិតបញ្ចូលពីឆ្នាំទៅមិញផងដែរ ។ កាលពីឆ្នាំ២០០៩ គេក៏ធ្លាប់បានបរាជ័យក្រោមថ្វីដៃកីឡាករស្វ៊ីសហ្វេដឺរ័រម្តងរួចមកហើយដែរ ។
នៅក្នុងការជួបគ្នាចំនួន ២៧ប្រកួតកន្លងមក ហ្វេដឺរ័រមានចំនួនឈ្នះច្រើនជាង យ៉ូកូវិច ។ ជ័យជម្នះចុងក្រោយរបស់គេគឺនៅក្នុងវគ្គពាក់កណ្តាលផ្តាច់ព្រ័ត្រក្របខណ្ឌធំ Wimbledonនៅប្រទេសអង់គ្លេសខែកក្កដាកន្លងទៅ ។ បង្ហាញពីចំណាប់អារម្មណ៍របស់ខ្លួនក្នុងការជួបគ្នាលើកនេះ យ៉ូកូវិចបានបញ្ជាក់ថា ៖«យើងទាំងអស់គ្នាពិតជាដឹងថា ហ្វេដឺរ័រពូកែប៉ុនណា ជាពិសេសនៅក្នុងការប្រកួតថ្មីៗនេះ ។ លក្ខខណ្ឌទីលាននៅទីនេះ ខ្ញុំគិតថា វាសក្តិសមនឹងស្ទីលប្រកួតរបស់ហ្វេដឺរ័រ ។ យើងធ្លាប់បានប្រកួតជាមួយគ្នាអស់ជាច្រើនលើកមកហើយ ។ ជានិច្ចកាល វាជាការប្រជែងដ៏ខ្លាំងក្លាមួយនៅពេលដែលយើងប៉ះគូប្រកួតខ្លាំងម្នាក់ »។
ហ្វេដឺរ័រវិញបាននិយាយថា៖«ជួបជាមួយយ៉ូកូវិច ខ្ញុំនឹងខាតបង់២-៣ពិន្ទុ តែយ៉ាងណា ខ្ញុំមិនព្រួយបារម្ភចំពោះការប្រកួតដែលត្រូវធ្វើក្នុងវគ្គបន្ថែមម៉ោងឡើយ ។ បើទោះណា ការលេងរបស់គេសកម្មខ្លាំង ប៉ុន្តែគេនឹងជួបការលំបាកប្រកួតនៅលើទីលានរអិលបែបនេះ ។ នេះជាវគ្គផ្តាច់ព្រ័ត្រដែលខ្ញុំទន្ទឹងរង់ចាំ »។វាជាលើកទី១ហើយក្នុងប្រវត្តិកម្មវិធី Cincinnati Openដែលកំពូលកីឡាករពិភពលោកទាំង២នាក់(លេខ១និងលេខ២)ជួបគ្នានៅវគ្គផ្តាច់ព្រ័ត្រ ៕
ចែករំលែកព័តមាននេះ