ខេត្តស្វាយរៀង ៖ ថ្ងៃទី១៨ សីហា ២០១២ វេលាម៉ោង៩ព្រឹកនៅទីស្នាក់ការសមាគមយុវជនកម្ពុជាខេត្ត បានរៀបចំពិធីជួបសំណេះសំណាលជាមួយសមាជិក សមាជិកា សមាគមយុវជនកម្ពុជាក្រោមអធិបតីភាពលោកហ៊ុន ម៉ានី អនុប្រធានសមាគមយុវជនកម្ពុជា និងជាជំនួយការផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកឌី វិជ្ជា ប្រធានសមាគមយុវជនកម្ពុជាខេត្ត លោករស់ ឆាយ អភិបាលរងខេត្ត និងជាប្រធានក្រុមការងារយុវជនគណបក្សប្រជាជនកម្ពុជាខេត្ត ព្រមទាំងមានការចូលរួមពីសមាជិក សមាជិកាចំនួនជាង១.០០០នាក់ ។
នាឱកាសនោះដែរលោកឌី វិជ្ជា បានឡើងអានសុន្ទរកថាស្វាគមន៍ សមាគមយុវជនកម្ពុជាខេត្តជាសាខាថ្នាក់ខេត្តរបស់សមាគមយុវជនកម្ពុជាដែលត្រូវបានតែងតាំងកាលពីថ្ងៃទី៥ កុម្ភៈ ២០១២ ។ លោកឌី វិជ្ជា បន្តទៀតថា សមាគមបានរៀបចំរចនាសម្ព័ន្ធថ្នាក់ខេត្តចាប់តាំងពីខែឧសភា ២០១២ កន្លងមក ដោយបានកៀងគរធនធានមនុស្សរៀបចំផែនការសកម្មភាពបង្កើតជាលេខាធិការដ្ឋានចែកចេញជា៤ គឺការិយាល័យរដ្ឋបាល និងហិរញ្ញវត្ថុ ការិយាល័យធនធានមនុស្ស ការិយាល័យសកម្មភាពយុវជន និងការិយាល័យទំនាក់ទំនងសាធារណៈ ។ ជាមួយគ្នានេះដែរ ដើម្បីធានាប្រសិទ្ធភាពការងារសមាគមបានរៀបចំឱ្យមានក្រុមការងារចុះជួយប្រចាំស្រុក-ក្រុងទាំង៨ដែលមានភារកិច្ចជាអ្នកទ្រទ្រង់ធ្វើសកម្មភាពនានា ពង្រឹង ពង្រីក និងថែទាំរចនាសម្ព័ន្ធយុវជននៅតាមមូលដ្ឋានចាប់ពីថ្នាក់ស្រុក ក្រុង ឃុំ សង្កាត់រហូតដល់ភូមិផងដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ