រាជធានីភ្នំពេញ ៖ បុរសម្នាក់ស្រវឹងជោកបើករថយន្តមួយគ្រឿងរួមដំណើរដោយស្ត្រីម្នាក់ផង ពីភ្នំពេញទៅកៀនស្វាយ ក្នុងល្បឿនលឿនក៏រេចង្កូតទៅខាងស្តាំដៃបុកស្លាកយីហោហាងតារាវាលស្បូវនៅលើចិញ្ចើមផ្លូវ ហើយជ្រុលទៅបុកបង្គោលភ្លើងមួយទៀត និងមិនទាន់អស់ល្បឿនបន្តទៅបុកផ្ទប់នឹងស្លាកយីហោហ្គារ៉ាសសាំងជាប់ទៅមុខលែងរួច បណ្តាលឲ្យអ្នកបើករថយន្ត និងអ្នករួមដំណើររងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យជិតនោះ កាលពីវេលាម៉ោង៣រំលងអធ្រាត្រឈានចូលថ្ងៃទី១៩ សីហា ២០១២ នៅចំណុចមុខហាងតារាវាលស្បូវ តាមបណ្តោយផ្លូវជាតិលេខ១ ស្ថិតក្នុងភូមិបឹងឈូក សង្កាត់វាលស្បូវ ខណ្ឌមានជ័យ ។
សាក្សីដែលឃើញហេតុការណ៍ឱ្យដឹងថា រថយន្តម៉ាក Funcargo ពណ៌ស បើកដោយបុរសម្នាក់ស្រវឹងធ្លាក់ភ្នែករួមដំណើរជាមួយស្ត្រីម្នាក់ផងក្នុងទិសដៅពីលិចទៅកើត គឺពីភ្នំពេញ ឆ្ពោះទៅស្រុកកៀនស្វាយ។ លុះបើកមកដល់ចំណុចកើតហេតុមិនដឹងជាយ៉ាងម៉េច ស្រាប់តែរេចង្កូតទៅខាងស្តាំដៃពន្លះស្លាកយីហោតារាវាលស្បូវដែលតាំងនៅលើចិញ្ចើមផ្លូវជាតិលេខមួយ ពេញទំហឹងអូសជាង២០ម៉ែត្រទៅបុកនឹងបង្គោលភ្លើងមួយដើមទៀតដែលនៅពីមុនស្លាកយីហោហើយរថយន្តមិនទាន់អស់ល្បឿនក៏បន្តទៅបុកស្លាកហ្គារ៉ាសសាំងនៅក្បែរនោះកៀបជាប់ទៅមុខលែងរួច ។
ប្រភពដដែលបន្តថា បន្ទាប់ពីកើតហេតុគេឃើញបុរសអ្នកបើកបរ និងស្ត្រីដែលរួមដំណើរជាមួយបែកក្បាល រយះដៃ រយះជើង រងរបួសធ្ងន់ត្រូវបានប្រជាពលរដ្ឋដឹកទៅសង្គ្រោះនៅមន្ទីរពេទ្យជិតនោះ ចំណែករថយន្តរងការខូចខាតផ្នែកខាងមុខទាំងស្រុង ត្រូវបាននគរបាលចរាចរខណ្ឌមានជ័យ សហការជាមួយប៉ូលិសក្រុងស្ទូចយករក្សាទុកនៅសាលារាជធានីភ្នំពេញ ដើម្បីឱ្យម្ចាស់រថយន្តចូលខ្លួនទៅដោះស្រាយសំណងជូនរដ្ឋថ្លៃខូចខាតទ្រព្យសម្បត្តិសាធារណៈ ៕
ចែករំលែកព័តមាននេះ