រាជធានីភ្នំពេញ ៖ បុរសម្នាក់ស្រវឹងជោកបានបើករថយន្តឌុបស្រី្តម្នាក់ពីភ្នំពេញឆ្ពោះទៅកៀនស្វាយ ក្នុងល្បឿនលឿនក៏រេចង្កូតទៅខាងស្តាំងដៃបុកស្លាកយីហោភោជនីយដ្ឋានតារាវាលស្បូវ រួចទៅបុកបង្គោលភ្លើង ហើយមិនទាន់អស់ល្បឿន ក៏ជ្រុលទៅបុកផ្ទប់នឹងស្លាកយីហោហ្គារ៉ាសសាំងជាប់ទៅមុខលែងរួច បណ្តាលឱ្យអ្នកបើករថយន្ត និងអ្នករួមដំណើររងរបួសធ្ងន់ កាលពីវេលាម៉ោង៣រំលងអធ្រាត្រឈានចូលថ្ងៃទី១៩ សីហា នៅចំណុចមុខភោជនីយដ្ឋានតារាវាលស្បូវ ក្នុងភូមិបឹងឈូក សង្កាត់វាលស្បូវ ខណ្ឌមានជ័យ ។
សាក្សីដែលបានឃើញហេតុការណ៍ខាងលើឱ្យដឹងថា មុនពេលកើតហេតុ គេឃើញបុរសម្នាក់ស្ថិតក្នុងស្ថានភាពស្រវឹងបានបើករថយន្តមួយគ្រឿងម៉ាក Funcargo ពណ៌ស រួមដំណើរជាមួយស្រី្តម្នាក់ ក្នុងទិសដៅពីលិចទៅកើត គឺពីភ្នំពេញឆ្ពោះទៅស្រុកកៀនស្វាយ ។ លុះបើកមកដល់ចំណុចកើតហេតុ ស្រាប់តែរថយន្តនោះរេចង្កូតទៅខាងស្តាំដៃពន្លះស្លាកយីហោភោជនីយដ្ឋានតារាវាលស្បូវពេញទំហឹងអូសជាង២០ម៉ែត្រ ទៅបុកបង្គោលភ្លើងមួយដើមទៀតដែលនៅពីមុខស្លាកយីហោនោះ ហើយរថយន្តនៅមិនទាន់អស់ល្បឿនក៏បន្តទៅពន្លះស្លាកហ្គារ៉ាសសាំងមួយនៅមុខហាងកៀបជាប់ទៅមុខលែងរួចតែម្តង ។ ប្រភពដដែលបន្តថា បន្ទាប់ពីកើតហេតុនោះ គេឃើញបុរសអ្នកបើកបរ និងស្ត្រីដែលរួមដំណើរជាមួយបែកក្បាល រយះដៃជើង គឺរងរបួសធ្ងន់ត្រូវបានប្រជាពលរដ្ឋជួយដឹកទៅមន្ទីរពេទ្យនៅជិតនោះ ចំណែករថយន្តរងការខូចខាតខាងមុខទាំងស្រុង ។
បន្ទាប់ពីកើតហេតុ សមត្ថកិច្ចបានស្ទូចរថយន្តបង្កយកទៅរក្សាទុកនៅសាលារាជធានីភ្នំពេញដើម្បីឱ្យម្ចាស់រថយន្តចូលខ្លួនទៅដោះស្រាយ ។ សមត្ថកិច្ចមិនទាន់ស្គាល់អត្តសញ្ញាណអ្នកបើកបរ និងស្រ្តីតរួមដំណើរទាំងពីរនាក់នោះនៅឡើយទេ ព្រោះអ្នកទាំងពីរនៅមិនទាន់ដឹងខ្លួន ហើយកំពុងសម្រាកនៅមន្ទីរពេទ្យ ៕
ចែករំលែកព័តមាននេះ