រាជធានីភ្នំពេញ ៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នារសៀលថ្ងៃទី១៨ សីហា ២០១២ វេលាម៉ោង៣និង៣០នាទីបានយាងមកដល់មាតុប្រទេសវិញហើយ តាមព្រះទីនាំងអាកាសចរកម្ពុជាអង្គរអែរ បន្ទាប់ពីព្រះអង្គបានយាងទៅពិនិត្យព្រះរាជសុខភាពរបស់ព្រះអង្គ និងយាងចូលបង្គំគាល់ព្រះវររាជបិតា ព្រះវររាជមាតា ដែលគង់ប្រថាប់នៅទីក្រុងប៉េកាំង សាធារណរដ្ឋប្រជាមានិតចិន កាលពីថ្ងៃទី២២ កក្កដា ២០១២ កន្លងមក។
ព្រះរាជវត្តមាន និងវត្តមានយាង និងអញ្ជើញទទួលព្រះរាជបដិសណ្ឋារកិច្ចព្រះមហាក្សត្រនៅឯព្រលានយន្តហោះអន្តរជាតិភ្នំពេញ មានព្រះរាជវង្សានុវង្ស សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា, សម្តេចអគ្គមហាពញាចក្រី ហេង សំរិន ប្រធានរដ្ឋសភា, សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា, លោកផាន គ័ងស៊ា, ឯកអគ្គរដ្ឋទូតសាធារណប្រជាមានិតចិនប្រចាំព្រះរាជាណាចក្រកម្ពុជា និងមន្ត្រីរាជការ អ្នកមុខ អ្នកការជាច្រើនក្នុងឱកាសនោះផងដែរ ៕
ចែករំលែកព័តមាននេះ