កីឡាករស្ប៉ាញ Jonathan Castroviejo បានសម្តែងនូវក្តីរីករាយជាខ្លាំងបន្ទាប់ពីបានយកឈ្នះណាក់បើកឆាក(ដំណាក់ទី១)នៃការប្រណាំងកង់កម្មវិធី Tour of Spainនៅប្រទេសកំណើតរបស់ខ្លួនកាលពីថ្ងៃសៅរ៍ទី១៩ខែសីហាកន្លងមកនេះ។ ការប្រណាំងដំណាក់ខាងលើបញ្ចប់នៅទីក្រុង Pamplonaប្រទេសអេស្ប៉ាញ។
Castroviejoដែលជាអ្នកជិះកង់ឱ្យក្រុមMovistar Teamបានយកឈ្នះដំណាក់ដែលមានចម្ងាយផ្លូវ១៦.៥គីឡូម៉ែត្រដោយការប្រណាំងត្រូវធ្វើនៅជុំវិញទីក្រុង Pamplona។
Castroviejoបានបោះពួយឆ្លងកាត់គំនូសខ្សែព្រ័ត្រក្នុងថិរវេលា១៨នាទីនិង៥១វិនាទីជួយឱ្យក្រុមនិងមិត្តរួមក្រុមរបស់ខ្លួនយកឈ្នះលើក្រុមOmega Pharma-Quickstepដែលមានកីឡាករហូឡង់ Niki Terpstra, កីឡាករអុីតាលីDario Cataldo, កីឡាករបែលហ្ស៊ិក Kevin De Weert, Kristof Vandewalle និងSerge Pauwelsដែលទាំងអស់គ្នាបានប្រើថិរវេលាយឺតជាង១០វិនាទី។
សូមបញ្ជាក់ថាកីឡាករ Castroviejoបញ្ចប់ការប្រណាំងលើកនេះនាំមុខលើមិត្តរួមក្រុមរបស់ខ្លួន៥នាក់ផ្សេងទៀត មានដូចជា Javier Moreno Bazan,Benat Intxausti Elorriaga ,Nairo Alexander Quintana Rojas, Alejandro Valverde Belmonte និងកីឡាករ Juan Jose Cobo Acebo ក្នុងថិរវេលា ១វិនាទី ។
ថ្លែងបន្ទាប់ពីបញ្ចប់ការប្រកួត Castroviejoបានបញ្ជាក់ថា៖«ក្នុងពេលប្រណាំង ខ្ញុំសង្ឃឹមថាមានកីឡាករណាម្នាក់វ៉ាខ្ញុំបាន។ ប៉ុន្តែការពិតមិនដូចជាការគិតរបស់ខ្ញុំនោះទេ។ នេះជាការប្រណាំងមួយដែលយើងត្រូវតែមានល្បិចអំឡុងការប្រណាំង»។
សូមបញ្ជាក់ថាការប្រណាំងកម្មវិធី Tour of Spainឆ្នាំនេះចែកចេញជា២១ដំណាក់និងមានចម្ងាយផ្លូវសរុប៣៣៦០គីឡូម៉ែត្រ។ ដោយឡែកដំណាក់ទី២ដែលជាដំណាក់បន្តមានចម្ងាយផ្លូវ១៨១.៤គីឡូម៉ែត្រចេញដំណើរពីទីក្រុងPamplonaឆ្ពោះទៅកាន់ទីក្រុង Viana ភាគខាងជើងប្រទេសអេស្ប៉ាញ។ គួរសម្គាល់ផងដែរថា ការប្រណាំងលើកទី៦៧ឆ្នាំនេះ មានវត្តមាននៃការចូលរួមពីសំណាក់កីឡាករល្បីឈ្មោះខ្លាំងក្នុងលោក អាល់បឺតូ កុងតាឌ័រ ប៉ុន្តែកីឡាករកាដែល អេវែននិងកីឡាករបងប្អូនត្រកូល Schleckមិនមានវត្តមាននោះទេ ៕
ចែករំលែកព័តមាននេះ