ខេត្តពោធិ៍សាត់ ៖ លោកជំទាវ ជា ខេង ស៊ុយ សែម អមដំណើរដោយលោកខូយ សុខា អភិបាលខេត្តពោធិ៍សាត់ លោកជំទាវ លឹម ឆេង លោកជំទាវ ឡោកខេង លោកជំទាវ ខ្លូត ទងផ្កា និងក្រុមការងារគណបក្សប្រជាជនកម្ពុជាមួយចំនួនទៀតកាលពីថ្ងៃទី១៨ សីហា ២០១២ បានអញ្ជើញទៅសំណេះសំណាលសួរសុខទុក្ខ និងនាំយកអំណោយទៅចែកជូនដល់បងប្អូនប្រជាពលរដ្ឋដែលខ្វះខាតស្បៀង និងជួបគ្រោះរាំងស្ងួតនៅភូមិជ្រៃក្រឹម ឃុំផ្ទះរុង ស្រុកភ្នំក្រវាញ ។
លោកខូយ សុខា អភិបាលខេត្តពោធិ៍សាត់បានថ្លែងអំណរគុណយ៉ាងជ្រាលជ្រៅចំពោះលោកជំទាវ ជា ខេង ស៊ុយ សែម ដែលបានចុះមកសួរសុខទុក្ខ និងនាំយកនូវអំណោយមកចែកជូនបងប្អូនប្រជាពលរដ្ឋនៅភូមិជ្រៃក្រឹម ឃុំផ្ទះរុង ស្រុកភ្នំក្រវាញ នាពេលនេះចំពេលដែលពួកគាត់កំពុងតែមានការខ្វះខាតស្បៀង និងស្រែស្រូវជួបគ្រោះរាំងស្ងួត ។ កន្លងមកនេះលោកជំទាវជា ខេង ស៊ុយ សែម ឱ្យតែដឹងថា បងប្អូនប្រជាពលរដ្ឋជួបការលំបាក ឬមានទុក្ខកង្វល់ផ្សេងៗទោះជាផ្លូវលំបាកធ្វើដណើរ ឬនៅឆ្ងាយយ៉ាងណាក៏ដោយក៏លោកជំទាវនៅតែអញ្ជើញទៅដល់ជានិច្ច ដើម្បីដឹងសុខដឹងទុក្ខរបស់បងប្អូនពិតប្រាកដ ។ ជាក់ស្តែងថ្ងៃនេះលោកជំទាវបានដឹកនាំប្រតិភូមួយក្រុមចុះមកដល់ភូមិជ្រៃក្រឹម ដែលជាភូមិមួយនៅក្នុងព្រៃ ហើយឆ្ងាយដាច់ស្រយាលពីទីប្រជុំជន ដើម្បីបានឃើញផ្ទាល់នឹងភ្នែកនូវស្ថានភាពជីវភាពរស់នៅរបស់បងប្អូន ។
ជាមួយគ្នានេះដែរលោកជំទាវបាននាំយកស្បៀង និងសម្ភារមួយចំនួនមកចែកជូនដល់បងប្អូនប្រជាពលរដ្ឋទាំង៥០០គ្រួសារដោយក្នុងមួយគ្រួសារទទួលបានអង្ករ២០គីឡូក្រាម ម៉្សៅទឹកដោះគោបំប៉នសុខភាព១កំប៉ុង សាប៊ូម្សៅកន្លះគីឡូក្រាម ប៊ីចេង១ថង់ មុងជ្រលក់ថ្នាំ១ និងថវិកា៤០.០០០រៀល។ កម្លាំងប្រដាប់អាវុធមូលដ្ឋាន៤០នាក់ ម្នាក់ៗទទួលបានសាប៊ូម្សៅ១ថង់ និងថវិកា២០.០០០រៀល ។ អង្ករជាអំណោយរបស់អង្គការ Transform Asia ក្រៅពីនោះជាអំណោយរបស់លោករដ្ឋមន្ត្រី ស៊ុយ សែម និងលោកជំទាវ ជា ខេង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ