រាជធានីភ្នំពេញ ៖ រថយន្ត SUZUKI ពណ៌ទឹកប៊ិច មួយគ្រឿងដែលគេអះអាងថា អ្នកបើកស្រវឹងជោកជាំបានបោះពួយទៅបុកក្បាលរបាំងថ្មចែកផ្លូវ បណ្តាលឱ្យបាក់ដួលរលំ រថយន្តហោះទៅទំលើរបាំងថ្មជាប់ទៅមុខលែងរួច។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី១៨ សីហា ២០១២ នៅតាមបណ្តោយវិថីម៉ៅសេទុង ចំណុចស្តុបផ្សារដើមគ សង្កាត់ផ្សារដើមគ ខណ្ឌទួលគោក ។ បន្ទាប់ពីមានគ្រោះថ្នាក់បំផ្លិចបំផ្លាញទ្រព្យសម្បត្តិសាធារណៈអ្នកបើក ស្ថិតក្នុងស្ថានភាពស្រវឹងធ្លាក់ភ្នែកបានទាក់ទងហៅមិត្តភក្តិមាឌធំខ្មៅស្លៀកខោប៉ូលិសពាក់អាវខ្មៅមករារាំងអ្នកកាសែតថតទៀតផង ។
តាមសាក្សីឱ្យដឹងថា មុនពេលកើតហេតុគេឃើញរថយន្តម៉ាក SUZUKI ពណ៌ទឹកប៊ិច មួយគ្រឿងបើកដោយបុរសម្នាក់តាមបណ្តោយវិថីម៉ៅសេទុង ក្នុងទិសដៅពីត្បូងទៅជើង ។ លុះមកដល់ស្តុបផ្សារដើមគ ក៏បានបុកក្បាលរបាំងថ្មចែកផ្លូវពេញទំហឹង បណ្តាលឱ្យបាក់ដួលចំណែករថយន្តហោះទៅទំជាប់លើរបាំងថ្ម ។ សាក្សីបន្តទៀតថា ភ្លាមនោះគេឃើញអ្នកបើកបរបានចុះពីលើរថយន្តក្នុងស្ថានភាពស្រវឹង បានទាក់ទងហៅមិត្តភក្តិម្នាក់មកកាងមិនឱ្យអ្នកកាសែតថតក្បាលរបាំងថ្ម និងរថយន្ត ហើយថែមទាំងប្រវាយចាប់ហែកសៀវភៅកំណត់ហេតុអ្នកយកព័ត៌មានទូរទស្សន៍មួយបោះរ៉ាយពេញផ្លូវ ។ ដោយឡែកអ្នកយកព័ត៌មានកោះសន្តិភាពក៏ត្រូវជននោះស្រែកគំរាមថា «អ្ហែងថតអីរថយន្តមិត្តភក្តិអញ» ព្រមទាំងរកវាយ និងស្ទុះមកចាប់ដៃប្រតាយយកម៉ាស៊ីនថតតែដណ្តើមមិនបាន និងត្រូវសម្របសម្រួលឱ្យមន្ត្រីប៉ូលិសមូលដ្ឋាន។ លុះក្រោយមកជននោះបានគេចខ្លួនបាត់នៅសល់តែអ្នកបើកបរ… ពូកែចេះរត់គេចខ្លួនដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ