គណបក្សប្រឆាំងឥណ្ឌា BHARATIYA JANATA (BJP) កាលពីថ្ងៃ ទី១៧ សីហា កន្លងមកនេះ បានអំពាវនាវដល់នាយករដ្ឋមន្ត្រីលោកម៉ាន់ ម៉ូហាន់ស៊ិញ ឱ្យលាលែងដោយសារការខាតបង់ខាងសេដ្ឋកិច្ចធ្ងន់ធ្ងរមកពីការគ្រប់គ្រងមិនល្អលើការធ្វើអាជីវកម្មធ្យូងថ្ម។ក្នុងរបាយការណ៍របស់ខ្លួនចេញផ្សាយកាលពីថ្ងៃទី១៧ សីហា សវនកម្មផ្លូវការអះអាងថា ថវិការដ្ឋឥណ្ឌានឹងមានចំណូល១៨៥ពាន់លានរូពី (ប្រមាណ៣៧.០០០លានដុល្លារ) ថែមទៀត ប្រសិនបើដំណើរការប្រគល់ឱ្យធ្វើអាជីវកម្មអនុវត្តបានល្អចំពោះប្លុកធ្យូងថ្មឱ្យដល់បណ្តាក្រុមហ៊ុនឯកជន ឬរដ្ឋ ។
គណបក្ស BJP បានទម្លាក់ការទទួលខុសត្រូវដោយផ្ទាល់ចំពោះរឿងនេះលើលោកស៊ិញ ពីព្រោះគឺរូបលោកដែលជាអ្នកកាន់ក្រសួងធ្យូងថ្មខ្លួនឯង ពេលមានការបាត់បង់នោះ ។ខាងសវនកម្មឥណ្ឌានិយាយថា ការខាតបង់កើតមានព្រោះដំណើររការបញ្ចូលតម្លាភាពក្នុងការបែងចែកប្លុកធ្យូងថ្ម ដែលចាប់ផ្តើមកាលពីខែមិថុនា ឆ្នាំ២០០៤ មានការយឺតយ៉ាវដោយសារហេតុផលផ្សេងៗ ។
ការស្ទាបស្ទង់មតិមួយចេញផ្សាយកាលពីថ្ងៃទី១៧ សីហា ដោយទស្សនាវដ្តី INDIA TODAY បង្ហាញថា ប្រជាប្រិយភាពរបស់គណបក្ស BJP មានលើសប្រជាប្រិយភាព របស់គណបក្សកាន់អំណាចមកពី ការមិនសប្បាយចិត្តរបស់សាធារណមតិចំពោះអតិផរណាអំពើពុករលួយ និងអត្រាឥតការងារធ្វើខ្ពស់ ក្រោមការគ្រប់គ្រងរបស់គណបក្សចម្រុះកាន់អំណាចចាប់តាំងពីឆ្នាំ២០០៤មក៕
ចែករំលែកព័តមាននេះ