រាជធានីភ្នំពេញ ៖ ទីតាំងមួយដែលគេរកឃើញនិងចាត់ទុកថា ជាស្ថានីយប្រវត្តិសាស្ត្រ ឬទីក្រុងបុរាណមួយ ស្ថិតនៅភូមិស្រុកចេក សង្កាត់ជើងឯកខណ្ឌដង្កោ ត្រូវបានធ្វើកំណាយតាមលក្ខណៈបច្ចេកទេសដើម្បីសិក្សាឱ្យកាន់តែច្បាស់លាស់ពីទីក្រុងបុរាណរបស់ខ្មែរដោយរាជបណ្ឌិត្យសភាកម្ពុជាដោយមានការគាំទ្រពីសាលារាជធានីភ្នំពេញ ។
ព្រឹកថ្ងៃទី១៦ សីហា ២០១២ លោកកែប ជុតិមា អភិបាលរាជធានីភ្នំពេញ បានអញ្ជើញទៅពិនិត្យមើលសកម្មភាពដែលអ្នកជំនាញកំពុងធ្វើកំណាយនៅស្ថានីយប្រវត្តិសាស្ត្រនេះដែលជាប្រភេទឡដីដុតបុរាណ ដើម្បីអភិរក្ស ។ ឆ្លងតាមរយៈការធ្វើកំណាយនេះ គេបានរកឃើញឧបករណ៍និងសម្ភារប្រើប្រាស់១ចំនួនដែលភាគច្រើនជាប្រភេទកុលាលភាជន៍ធ្វើពីដីដុត ក្រៅពីនេះគេពុំឃើញមានសម្ភារផ្សេងទៀតទេ នៅពេលធ្វើការកំណាយកំពុងដំណើការយ៉ាងមមាញឹក ។
លោកផុន កសិកា ប្រធានផ្នែកបុរាណវិទ្យានៃរាជបណ្ឌិត្យសភាកម្ពុជា ដែលបានដឹកនាំធ្វើកំណាយនេះឱ្យដឹងថា ការធ្វើកំណាយនេះមាន គោលបំណងចង់ដឹងពីរចនាសម្ព័ន្ធ និងរូបរាងរបស់ឡ អាយុកាលរបស់ឡ ក៏ដូចជាប្រភេទកុលាលភាជន៍ ដែលផលិតនៅទីនោះ ។ លោកផុន កសិកា បញ្ជាក់ថា ឆ្លងតាមភស្តុតាងដែលរកឃើញតាមរយៈសិលាចារិក និងឯកសារផងនោះធ្វើឱ្យដឹងបានពីអាយុកាលដែលបុព្វបុរសយើងបានមករស់នៅទីនោះតាំងពីសតវត្សទី៤ ហើយប្រភេទកុលាលភាជន៍ដែលផលិតបានត្រូវនាំទៅលក់នៅតំបន់នានា ក្នុងប្រទេសនិងក្រៅប្រទេស។
លោកប្រធានផ្នែកបុរាណវិទ្យាឱ្យដឹងទៀតថា នៅតំបន់បឹងជើងឯកបានរកឃើញឡបុរាណចំនួន៦១ឡ តែឡខ្លះបានរលាយបាត់រូបរាងទៅហើយ ។ ចំពោះទិន្នន័យដែលប្រមូលបានពីការធ្វើកំណាយនេះនឹងត្រូវយកទៅធ្វើវិភាគនៅប្រទេសសិង្ហបុរី ដោយមានការជួយឧបត្ថម្ភពីអង្គការមិត្តវប្បធម៌ខ្មែររបស់សហរដ្ឋអាមេរិក ។
នៅក្នុងពេលទៅពិនិត្យដោយផ្ទាល់នោះ លោកកែប ជុតិមា បានផ្តល់ថវិកាចំនួន១លានរៀលដល់ក្រុមអ្នកធ្វើកំណាយ ។ លើសពីនេះប្រកាសផ្តល់ម៉ាស៊ីនបូមទឹក និងប្រេងសម្រាប់់បូមទឹកដាក់ស្រែជូនប្រជាពលរដ្ឋ និងណែនាំឱ្យមន្ទីរសាធារណការ និងដឹកជញ្ជូន លើកគម្រោងស្ថាបនាផ្លូវក្រាលក្រួសក្រហម១ខ្សែនៅ ភូមិស្រុកចេក សង្កាត់ជើងឯក និងកែលំអជួសជុលស្ពានដែលមានស្រាប់ឱ្យធំទូលាយបង្កលក្ខណៈងាយស្រួលក្នុងការធ្វើដំណើររបស់ប្រជាពលរដ្ឋ ។
លោកអភិបាលក្រុង បានណែនាំឱ្យលោកអភិបាលខណ្ឌដង្កោឧស្សាហ៍ទៅពិនិត្យក្នុងភូមិសាស្ត្រដែលខ្លួនទទួលខុសត្រូវ ដើម្បីបានដឹង ច្បាស់ពីតំរូវការជាក់ស្តែងរបស់ប្រជាពលរដ្ឋ ។ លោកកែប ជុតិមា បានអញ្ជើញទៅពិនិត្យមើលទីតាំងចាក់សំរាមជើងឯកផងដែរ ដោយកត់សម្គាល់ឃើញថា នៅទីលានចាក់សំរាមមានបរិស្ថានល្អប្រសើរជាងមុន តាម លក្ខណៈបច្ចេកទេស និងបានជំរុញឱ្យមានការលើកកម្ពស់ការគ្រប់គ្រងសំរាមឱ្យម៉ត់ចត់ថែមទៀត នៅពេលដែលបរិមាណសំរាមកើនឡើងឥតឈប់ឈរ គឺសំរាមដែលដឹកចេញពីរាជធានីភ្នំពេញមានចំនួន១.៤០០តោនក្នុង១ថ្ងៃ ៕
ចែករំលែកព័តមាននេះ