រាជធានីភ្នំពេញ ៖ នៅថ្ងៃទី២២ សីហា ខាងមុខវេលាល្ងាច លោកWilliam E.Todd ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា និងលោក Flynn Fuller នាយកបេសកកម្មនៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិប្រចាំនៅកម្ពុជា (USAID) នឹងរៀបចំពិធីអបអរខួបលើកទី៥០ឆ្នាំ និងខួបលើកទី២០ឆ្នាំរបស់ទីភ្នាក់ងារនេះនៅកម្ពុជា ។
នេះបើយោងតាមសេចក្តីប្រកាសព័ត៌មានកាលពីថ្ងៃទី១៧ សីហា របស់ស្ថានទូតសហរដ្ឋអាមេរិក ។ តាមគម្រោងនេះ លោកបណ្ឌិតសុខ អាន ឧបនាយករដ្ឋមន្ត្រី និងជារដ្ឋមន្ត្រីទីស្តីការគណៈរដ្ឋមន្ត្រី នឹងអញ្ជើញចូលរួមជាភ្ញៀវកិត្តិយសតំណាងឱ្យរាជរដ្ឋាភិបាលកម្ពុជា ។
ទីភ្នាក់ងារ USAID ត្រូវបាបង្កើតឡើងនៅឆ្នាំ១៩៦១ ដោយផុសចេញពីស្មារតីនៃភាពជឿនលឿន ការច្នៃប្រឌិត និងការឆ្លុះបញ្ចាំងពីគុណតម្លៃ អត្តចរិត និងជំនឿជាមូលដ្ឋានលើទង្វើដ៏ត្រឹមត្រូវរបស់ជនជាតិអាមេរិក ។ ក្នុងស្មារតីនេះហើយ ដែលលោកប្រធានាធិបតី John F. Kennedy បានអំពាវនាវឱ្យបង្កើតទីភ្នាក់ងាររដ្ឋាភិបាលសហរដ្ឋអាមេរិកមួយ ដើម្បីប្រយុទ្ធប្រឆាំងភាពអត់ឃ្លាន ជំងឺ និងភាពក្រីក្រ នៅទូទាំងសកលលោក ។
បេសកកម្មរបស់ USAID ប្រចាំនៅកម្ពុជាត្រូវបានបង្កើតឡើងកាលពី២០ឆ្នាំមុន ប៉ុន្តែប្រវត្តិនៃការផ្តល់ជំនួយរបស់សហរដ្ឋអាមេរិកដល់កម្ពុជាមានរយៈពេលជាច្រើនទសវត្សមកហើយ ។ តាំងពីបេសកកម្មរបស់ USAID ត្រូវបានបង្កើតឡើងក្នុងឆ្នាំ១៩៩២ នៅក្នុងប្រទេសកម្ពុជា ទីភ្នាក់នេះបានធ្វើការងារយ៉ាងជិតស្និទ្ធជាមួយរាជរដ្ឋាភិបាលកម្ពុជា និងជាមួយដៃគូជាច្រើន ដើម្បីធ្វើឱ្យជីវិតរបស់ប្រជាពលរដ្ឋកម្ពុជាមានភាពប្រសើរឡើង ។
នៅក្នុងរយៈពេលពីរទសវត្សកន្លងមកនេះ USAID បានជួយកម្ពុជាដើម្បីធ្វើឱ្យប្រសើរឡើងនូវគុណភាព និងការទទួលបាននូវសេវាថែទាំសុខភាពសង្គ្រោះជីវិត បង្កើនចំណូលរបស់ប្រជាពលរដ្ឋពង្រឹងផលិតកម្មកសិកម្ម អភិរក្សធនធានធម្មជាតិដ៏សម្បូររបស់ប្រទេសកម្ពុជា និងធ្វើឱ្យប្រជាពលរដ្ឋកម្ពុជាបានចូលរួមនៅក្នុងដំណើរការនយោបាយក្នុងប្រទេសរបស់ខ្លួន ។ សមិទ្ធផលដែលសម្រេចបាននេះ គឺបានមកពីភាពជាដៃគូជាមួយកម្ពុជា ៕
ចែករំលែកព័តមាននេះ