ខេត្តកណ្តាល ៖ លោកយាយដែលមាន ជំងឺប្រចាំកាយធ្ងន់បានចាកចេញពីស្រុកមកព្យាបាលនៅរាជធានីភ្នំពេញរយៈពេល៥ខែកន្លងមកហើយ ប៉ុន្តែមិនបានជាសះស្បើយ គឺរឹតតែធ្ងន់ថែមទៀត ហើយដោយសារតែខ្លាចស្លាប់នៅក្នុងផ្ទះជួលរបស់ខ្លួននោះ ម្ចាស់ផ្ទះបានបង្ខំឱ្យគាត់ចាកចេញ ។ លោកយាយត្រូវចៅប្រុសនាំចេញពីផ្ទះជួលទៅជិះរថយន្តក្រុងត្រឡប់ទៅស្រុកកំណើតវិញ ហើយស្លាប់នៅចំណតរថយន្តក្រុង និងបង្កឱ្យមានការភ្ញាក់ផ្អើលយ៉ាងខ្លាំង ។
ហេតុការណ៍ភ្ញាក់ផ្អើលនោះកើតឡើងកាលពីវេលាម៉ោង៩និង១០នាទីព្រឹកថ្ងៃទី១៧ សីហា នៅតាមបណ្តោយផ្លូវជាតិលេខ៤ត្រង់ចំណតរថយន្តក្រុងស្ថិតនៅមុខផ្សារបែកចាន ឃុំបែកចាន ស្រុកអង្គស្នួល ។ លោកយាយនោះ ឈ្មោះយ៉េត សឿន អាយុ៨០ឆ្នាំ ស្រុកកំណើតនៅភូមិស្ទឹងហាវ ឃុំស្ទឹងហាវ ស្រុកស្ទឹងហាវ ខេត្តព្រះសីហនុ ចំណែកឯចៅប្រុសរបស់គាត់ឈ្មោះសៅ ផល្លី អាយុ២៨ឆ្នាំ ស្នាក់នៅផ្ទះជួលម្តុំវត្តនាគវ័ន រាជធានីភ្នំពេញ ។
ប្រភពព៌ត៌មានឱ្យដឹងថា លោកយាយម្នាក់នោះមានជំងឺមហារីកសួតធ្ងន់ និងបានចាកចេញពីស្រុកកំណើតមកស្នាក់នៅផ្ទះជួល ដើម្បីព្យាបាលជំងឺរយៈពេល៥ខែមកហើយ ប៉ុន្តែមិនបានជាសះស្បើយឡើយ ។ ពីមួយថ្ងៃទៅមួយថ្ងៃជំងឺគាត់កាន់តែធ្ងន់ឡើង ។ រហូតដល់ថ្ងៃទី១៧ សីហា ដោយសារតែខ្លាចលោកយាយស្លាប់នៅក្នុងផ្ទះជួលរបស់ខ្លួននោះ ម្ចាស់ផ្ទះជួលបានឱ្យចៅប្រុសនាំគាត់ចេញ ។
ប្រភពដដែលបន្តទៀតថា ដោយគ្មានជម្រើសចៅប្រុសបាននាំលោកយាយរបស់ខ្លួនចាកចេញពីផ្ទះជួលទៅជិះរថយន្តក្រុងត្រឡប់ទៅស្រុកកំណើតវិញ ។ លុះពេលទៅដល់ចំណតរថយន្តក្រុងមុខផ្សារបែកចាន ឃុំបែកចាន ស្រុកអង្គស្នួល លោកយាយឱ្យចៅប្រុសនាំចុះពីរថយន្ត និងឱ្យចៅទៅទិញក្រូចឱ្យហូប ។ ចៅប្រុសបានដាក់ឱ្យលោកយាយសម្រាន្តនៅចំណតរថយន្ត រួចប្រញាប់ប្រញាល់រត់ទៅទិញក្រូចឱ្យគាត់ហូប ប៉ុន្តែចៅមិនទាន់ទៅដល់កន្លែងលក់ក្រូចផង គាត់ក៏ស្លាប់ទៅ ។ ពេលនោះមានការភ្ញាក់ផ្អើលយ៉ាងខ្លាំង ហើយប្រជាពលរដ្ឋនាំគ្នាឱ្យលុយម្នាក់បន្តិចៗទៅចៅប្រុសក្នុងក្តីអាណិតអាសូរ ។ សពលោកយាយត្រូវចៅប្រុសនាំយកទៅតម្កល់នៅឈាបនដ្ឋានវត្តភូមិថ្មី ស្ថិតនៅជិតនោះ ដើម្បីបូជា ៕
ចែករំលែកព័តមាននេះ