ខេត្តក្រចេះ ៖ ភ្នាក់ងារសារព័ត៌មានទូរទស្សន៍ និងវិទ្យុ ប្រចាំតំបន់ប៉ែកឦសានប្រទេស ជាច្រើនរូប បានទទួលការបណ្តុះបណ្តាលលើការយកព័ត៌មានពីបញ្ហាប្រែប្រួលអាកាសធាតុរយៈពេល២ថ្ងៃចាប់ពីថ្ងៃទី១៦ សីហា នៅក្នុងសាលប្រជុំសណ្ឋាគារលីជឺ ក្នុងក្រុងក្រចេះ ។
វគ្គបណ្តុះបណ្តាលនេះបានរៀបចំ និងសម្របសម្រួលពីសំណាក់លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន និងផ្តល់មូលនិធិដោយបណ្តាញសារព័ត៌មានផែនដី និងអីុនថឺញូស៍ រួមទាំងវាគ្មិនមកពីបណ្តាមន្ទីរ អង្គការពាក់ព័ន្ធនានាជុំវិញខេត្តមួយចំនួនទៀត ។កញ្ញាដានី ជាសហការីអ្នកយកព័ត៌មានវិទ្យុក្នុងស្រុកប្រចាំនៅខេត្តក្រចេះ បាននិយាយថា វគ្គបណ្តុះបណ្តាលស្តីពីការប្រែប្រួលអាកាសធាតុនេះ មានគុណប្រយោជន៍សម្រាប់រូបនាង និងអ្នកកាសែត ក្នុងការសរសេរអត្ថបទពាក់ព័ន្ធនឹងការប្រែប្រួសអាកាសធាតុនៅតាមតំបន់ឱ្យកាន់តែស៊ីជម្រៅបន្ថែមទៀត ខណៈពេលដែលក្នុងប្រទេសកម្ពុជា ក៏ដូចជានៅលើសាកលលោកកំពុងតែមានការប្រឈមនឹងការបម្រែបម្រួលអាកាសធាតុនេះ ។
លោកពៅ សាវុធ អ្នកគ្រប់គ្រងវគ្គបណ្តុះបណ្តាលមកពីវិទ្យាស្ថានកម្ពុជាសម្រាប់ការ សិក្សាផ្នែកសារព័ត៌មានហៅកាត់ (CIMS) បានមានប្រសាសន៍ថា ការបើកវគ្គបណ្តុះ បណ្តាលនេះឡើងគឺមានគោលបំណងចង់ឱ្យអ្នកសារព័ត៌មានទទួលបានចំណេះដឹងថ្មីមួយទៀតអំពីការបម្រែបម្រួលអាកាសធាតុ ព្រោះកត្តានេះ ចាត់ទុកថាជារឿងកង្វល់របស់ពិភពលោកទាំងមូល និងចាត់ទុកថាជាបញ្ហាសំខាន់ដែលពិភពលោកមានការព្រួយបារម្ភ ។
លោកពៅ សាវុធបានបញ្ជាក់ថា នេះជាវគ្គបណ្តុះបណ្តាលលើកទី២ បន្ទាប់ពីវិទ្យាស្ថានធ្លាប់បានបើកវគ្គបណ្តុះបណ្តាលម្តងនៅក្នុងខេត្តបាត់ដំបង ដោយមានការអញ្ជើញអ្នកកាសែតក្នុងស្រុកជាច្រើនស្ថាប័នមកចូលរួមដើម្បីស្វែងយល់ពីចំណេះដឹងមូលដ្ឋានពាក់ព័ន្ធទៅនឹងការប្រែប្រួលអាកាសធាតុ ។
លោកបានបន្ថែមថា ក្រោយពីទទួលបានវគ្គបណ្តុះបណ្តាលរួចមក មានអ្នកកាសែតមួយចំនួនដែលបានបញ្ចប់វគ្គសិក្សាមានការយល់ដឹងបានច្រើនជុំវិញចំណេះដឹងជាមូលដ្ឋាន ក្រោមការពន្យល់បង្ហាញពីតាមវាគ្មិនដែលអញ្ជើញមកពីបណ្តាមន្ទីរ អង្គការពាក់ព័ន្ធនានា ៕
ចែករំលែកព័តមាននេះ