ខេត្តឧត្តរមានជ័យ ៖ ពលករខ្មែរចំនួន៥៧នាក់ ក្នុងនោះស្ត្រី២៣នាក់ ដែលជាប់ក្នុងពន្ធនាគារប្រទេសថៃកាលពីថ្ងៃទី២៥ ខែមិថុនា ឆ្នាំ២០១២កន្លងទៅ ត្រូវបានអាជ្ញាធរថៃដោះលែង និងបញ្ជូនមកកម្ពុជាវិញតាមច្រកទ្វារអន្តរជាតិជាំសាងាំ ស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង នារសៀលថ្ងៃទី១៦ សីហា ។
មន្ត្រីប៉ូលិសអន្តោប្រវេសន៍ច្រកទ្វារអន្តរជាតិជាំសាងាំបានឱ្យដឹងថា ពលករខ្មែរចំនួន៥៧នាក់នេះ បានធ្វើដំណើរផ្សងព្រេងចូលទៅក្នុងទឹកដីថៃ ក្នុងស្រុកមុតតាហាន ខេត្តឧប៊ុន ជាប់នឹងព្រំប្រទល់ប្រទេសឡាវ ដោយខុសច្បាប់ ហើយត្រូវសមត្ថកិច្ចថៃចាប់ខ្លួនដាក់ពន្ធនាគារក្នុងប្រទេសថៃកាលពីថ្ងៃទី២៥ ខែមិថុនា ឆ្នាំ២០១២ ដោយចោទប្រកាន់ថា ឆ្លងដែនចូលក្នុងទឹកដីថៃដោយខុសច្បាប់ ។ លុះនៅថ្ងៃទី១៦ សីហា ឆ្នាំ២០១២ អាជ្ញាធរថៃ បានធ្វើការដោះលែង និងបញ្ជូនមកកម្ពុជាវិញតាមមាត់ច្រកទ្វារអន្តរជាតិជាំសាងាំ ។បន្ទាប់ពីបានទទួលពលករខ្មែរទាំង៥៧នាក់ រួចសមត្ថកិច្ចបានធ្វើការណែនាំពួកគេកុំឱ្យធ្វើដំណើរដោយផ្សងព្រេងបែបនេះតទៅទៀត ។ បើបងប្អូនចង់ទៅរកការងារធ្វើ គឺត្រូវតែធ្វើច្បាប់ទម្លាប់ឱ្យបានត្រឹមត្រូវជាមុនសិន ទើបមានសុវត្ថិភាពក្នុងការធ្វើដំណើរក្នុងប្រទេសរបស់គេ ។
មន្ត្រីប៉ូលិសអន្តោប្រវេសន៍បញ្ជាក់ថា ពលករដែលជាប់ពន្ធនាគារនៅក្នុងប្រទេសថៃ ហើយត្រូវបានដោះលែងទាំងនេះ គឺមកពីខេត្តបន្ទាយមានជ័យ ចំនួន៩នាក់ ខេត្តបាត់ដំបងចំនួន៤នាក់ ខេត្តឧត្តរមានជ័យ៨នាក់ ខេត្តពោធិ៍សាត់ចំនួន២នាក់ ខេត្តព្រៃវែងចំនួន១នាក់ ខេត្តកំពង់ឆ្នាំងចំនួន៣នាក់ ខេត្តកំពង់ចាមចំនួន២៤នាក់ ខេត្តកំពង់ធំចំនួន៤នាក់ និងខេត្តសៀមរាបចំនួន២នាក់ ។ បន្ទាប់ពីបានធ្វើការអប់រំរួច សមត្ថកិច្ចបានអនុញ្ញាតឱ្យពួកគេទៅកាន់លំនៅឋាន ដើម្បីជួបជុំក្រុមគ្រួសារវិញ ៕
ចែករំលែកព័តមាននេះ