ខេត្តបាត់ដំបង ៖ ស្រ្តីម្នាក់ត្រូវឃាតករ សម្លាប់ដោយប្រើកាំបិតកាប់ពីក្រោយ កាលពីវេលាម៉ោងជាង៣ទៀបភ្លឺថ្ងៃទី១៧ សីហា នៅក្នុងផ្ទះរបស់គាត់ស្ថិតនៅភូមិព្រៃផ្ដៅ ឃុំតាគ្រាម ស្រុកបាណន់ ខណៈប្ដីគាត់មិននៅផ្ទះ ។ ចំពោះហេតុការណ៍នេះ សមត្ថកិច្ចសង្ស័យថា កូនប្រុសធម៌ដែលមកស្នាក់នៅបណ្ដោះអាសន្នមុននេះ២ថ្ងៃជាអ្នកដៃដល់ ព្រោះតែរឿងគំនុំដោយសារក្រោយកើតហេតុក៏បាត់មុខកូនធម៌នោះដែរ ។
មន្ត្រីនគរបាលមូលដ្ឋាននិយាយថា ស្រ្តីរងគ្រោះឈ្មោះយ៉ាង ចំរើន អាយុ៤២ឆ្នាំ ប្ដីឈ្មោះស ឃន អាយុ៦៤ឆ្នាំ ជាប្ដីក្រោយ មានកូនប្រុសម្នាក់អាយុ១៥ឆ្នាំ ។ គ្រួសារនេះស្នាក់នៅបណ្ដោះអាសន្នចាំដីឲ្យគេនៅចំណុចខាងលើ ។ សមត្ថកិច្ចប្រាប់ថា ឃាតករបានប្រើកាំបិតកាប់សម្លាប់ស្ដ្រីរងគ្រោះក្នុងគ្រាដែលគាត់ដេកក្នុងផ្ទះជាមួយកូនប្រុស ឯប្ដីរបស់គាត់ស្នាក់នៅឯខ្ទមស្រែ។ ប៉ុន្តែសមត្ថកិច្ចបញ្ជាក់ថា នៅយប់នោះក៏មានកូនប្រុសធម៌របស់ស្រ្តីរងគ្រោះឈ្មោះភ័ក្ត្រ អាយុជាង៣០ឆ្នាំ ស្នាក់នៅក្នុងផ្ទះនោះដែរ ហើយ សមត្ថកិច្ចសង្ស័យថា កូនធម៌របស់ស្រ្តីរងគ្រោះ អាចជាជនដៃដល់ក្នុងករណីនេះ ពាក់ព័ន្ធនឹងគំនុំអ្វីមួយ ព្រោះព្រឹកឡើងកូនធម៌ម្នាក់នេះបានគេចខ្លួនបាត់ ។
កូនប្រុសរបស់ស្រ្តីរងគ្រោះឈ្មោះឃន ខន អាយុ១៥ឆ្នាំបានបំភ្លឺដែរថា ពេលមកពីឆ្លុះកណ្ដុរភ្លាម ម្ដាយខ្លូនបានឲ្យខ្លួនជួបជាមួយកូនធម៌គាត់ម្នាក់នៅខេត្តព្រះវិហារ តែប៉ុន្មានម៉ាត់ប៉ុណ្ណោះ ខ្លួនក៏ចូលដេកលក់ទៅ ។ លុះព្រឹកឡើងពេលឪពុកមកផ្ទះឃើញម្ដាយខ្លួនដេកស្លាប់លើដី ទើបខ្លួនមានការភ្ញាក់ផ្អើលតែម្ដងហើយគ្រានោះក៏បាត់មុខបងធម៌ឈ្មោះភ័ក្រ្ត នោះដែរ ។
ស្វាមីស្រ្តីរងគ្រោះឈ្មោះស ឃន បានប្រាប់សមត្ថកិច្ចដែរថា នៅយប់នោះគាត់បានស្នាក់នៅឯខ្ទមចាំស្រែ លុះព្រឹកឡើង ពេលដើរមកផ្ទះក៏ឃើញប្រពន្ធគាត់ដេកស្លាប់ក្នុងថ្លុកឈាមបាត់ទៅហើយ ។ គាត់ប្រាប់ថា ស្រ្តីរងគ្រោះជាភរិយាក្រោយ និងមានកូនប្រុសម្នាក់ ។ គាត់បញ្ជាក់ថា ភរិយាក្រោយនេះ និងគ្រួសារគាត់មុនមិនដែលមានជម្លោះអីនឹងគ្នាទេ ។ ម្យ៉ាងទៀត ភរិយាក្រោយរបស់គាត់នេះសម្បូរកូនធម៌ណាស់ តិចៗឃើញកូនធម៌នេះ តិចៗឃើញកូនធម៌នោះ មកលេងមិនសូវលស់ពេលទេ។ លុះពេលកូនធម៌ឈ្មោះភ័ក្ត្រ ដែលជាអតីតយោធានេះមកលេងម្ដងក៏មានរឿងទៅ ។
តាមការបំភ្លឺពីសាក្សីថា កូនធម៌នោះមកស្នាក់នៅបាន២ថ្ងៃក៏មានរឿងនេះកើតឡើង ។ ប្រភពដដែលបន្តថា នៅយប់កើតហេតុគេឃើញកូនប្រុសស្រ្តីរងគ្រោះ និងកូនធម៌ឈ្មោះភ័ក្ត្របានចេញទៅឆ្លុះកណ្ដុរជាមួយគ្នា លុះម៉ោងប្រហែល៣ទៀបភ្លឺទើបត្រឡប់មកផ្ទះវិញ ។ ប៉ុន្តែនៅវេលាម៉ោង៧ព្រឹកទើបមានការភ្ញាក់ផ្អើលថា ឈ្មោះយ៉ាង ចំរើន ត្រូវគេសម្លាប់ រីឯកូនធម៌ឈ្មោះភ័ក្ត្រ ក៏បាត់ខ្លួនដែរ ។ សាក្សីបញ្ជាក់ដែរថា ស្ទើររាល់ថ្ងៃគេតែងឃើញមានអ្នកដំណើរតែងមកស្នាក់នៅបណ្ដោះអាសន្ននៅផ្ទះស្រ្តីរងគ្រោះ ហើយក៏រាប់អានគ្នាជាម៉ែធម៌កូនធម៌ទៅ តែពេលនេះគេសង្ស័យកូនធម៌ហ្នឹងហើយដែលជាជនដៃដល់ ។
លោកថោង ថិន អធិការរងនគរបាលស្រុកបាណន់ថ្លែងថា កម្លាំងជំនាញកំពុងសាកសួរស្វាមី និងកូនប្រុសគាត់ ប៉ុន្តែកូនធម៌ស្រ្តីរងគ្រោះបានគេចខ្លួនទៅហើយ ។ លោកអធិការរងបានបញ្ជាក់ថា សពស្រ្តីរងគ្រោះត្រូវឃាតករប្រើកាំបិតកាប់ត្រូវកញ្ចឹងក និងក្បាល រួចវាយបាក់ធ្មេញអស់ ។ គេសង្ស័យជារឿងគំនុំច្រើនជាងករណីផ្សេងៗ ព្រោះស្រ្តីរងគ្រោះគ្មានបាត់បង់ទ្រព្យសម្បត្តិទេ ។ លោកថោង ថិន ប្រាប់ថា សមត្ថកិច្ចកំពុងស្រាវជ្រាវកំណត់មុខសញ្ញានោះហើយ ៕
ចែករំលែកព័តមាននេះ