ខេត្តបាត់ដំបង ៖ ស្រ្តីម្នាក់ត្រូវឃាតករសម្លាប់ដោយប្រើកាំបិតកាប់ពីក្រោយកាលពីវេលាម៉ោងជាង៣រំលងអធ្រាត្រឈានចូលថ្ងៃទី១៧ សីហា ២០១២ នៅក្នុងផ្ទះរបស់គាត់ដែលស្ថិតនៅភូមិព្រៃផ្ដៅ ឃុំតាគ្រាម ស្រុកបាណន់ ខណៈពេលប្ដីរបស់គាត់មិននៅផ្ទះ។ ហេតុការណ៍នេះសមត្ថកិច្ចសង្ស័យថា កូនប្រុសធម៌ដែលមកស្នាក់នៅបណ្ដោះអាសន្នមុននេះ២ថ្ងៃជាជនដៃដល់ព្រោះតែរឿងគំនុំអ្វីមួយ ។
មន្រ្តីនគរបាលមូលដ្ឋាននិយាយថា ស្រ្តីរងគ្រោះឈ្មោះយ៉ាង ចំរើន អាយុ៤២ឆ្នាំ ប្ដីឈ្មោះស ឃន អាយុ៦៤ឆ្នាំ ជាប្ដីក្រោយមានកូនប្រុសម្នាក់អាយុ១៥ឆ្នាំ គ្រួសារនេះស្នាក់នៅបណ្ដោះអាសន្នចាំដីឲ្យគេនៅចំណុចខាងលើ។ សមត្ថកិច្ចប្រាប់ថា ឃាតករបានប្រើកាំបិតកាប់សម្លាប់ស្ដ្រីរងគ្រោះក្នុងគ្រាដែលគាត់ដេកនៅក្នុងផ្ទះជាមួយកូនប្រុស ឯប្ដីរបស់គាត់ទៅស្នាក់នៅឯខ្ទមចាំស្រែ។ ប៉ុន្តែសមត្ថកិច្ចបញ្ជាក់ថា នៅយប់នោះក៏មានកូនធម៌ប្រុសរបស់ស្រ្តីរងគ្រោះឈ្មោះភ័ក្រ អាយុជាង៣០ឆ្នាំ មកស្នាក់នៅក្នុងផ្ទះនោះដែរ សមត្ថកិច្ចសង្ស័យថា កូនធម៌របស់ស្រ្តីរងគ្រោះអាចជាជនដៃដល់ក្នុងករណីនេះពាក់ព័ន្ធ និងរឿងគំនុំអ្វីមួយ ព្រោះព្រឹកឡើងកូនធម៌ម្នាក់នេះបានគេចខ្លួនបាត់។
ស្វាមីស្រ្តីរងគ្រោះឈ្មោះស ឃន បានប្រាប់សមត្ថកិច្ចដែរថា នៅយប់នោះគាត់បានទៅស្នាក់នៅឯខ្ទមចាំស្រែ លុះព្រឹកឡើងពេលគាត់ដើរត្រឡប់មកផ្ទះវិញក៏ឃើញប្រពន្ធរបស់គាត់ដេកស្លាប់នៅក្នុងថ្លុកឈាមបាត់ទៅហើយ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ