រដ្ឋមន្ត្រីការបរទេសអេក្វាទ័រ លោករីកាដូ ប៉ាទីណូ ប្រកាសកាលពីថ្ងៃទី១៦ សីហាថា ប្រទេសអេក្វាទ័របានផ្តល់សិទ្ធិជ្រកកោននយោបាយដល់ស្ថាបនិកវ៉េបសាយ WIKILEAKS ដ៏ល្បីល្បាញលោក JULIAN ASSANGE ដែលរត់ភៀសខ្លួនចាប់តាំងពី២ខែមកហើយក្នុងស្ថានទូតរបស់ខ្លួនប្រចាំទីក្រុងឡុងដ៍ ។
ប្រទេសអេក្វាទ័របានធ្វើការសម្រេចចិត្តនោះបន្ទាប់ពីរដ្ឋាភិបាលអង់គ្លេសគំរាមលុកចូលក្នុងស្ថានទូតអេក្វាទ័រប្រចាំក្រុងឡុងដ៍ ។ រដ្ឋាភិបាលអង់គ្លេសបានចេញបញ្ជាឱ្យធ្វើបត្យាប័នលោក JULIAN ASSANGE ទៅកាន់ប្រទេសស៊ុយអែតដែលនៅទីនោះលោកទទួលការចោទប្រកាន់ពីបទចាប់រំលោភរួមភេទនារី២នាក់ ។
លោកប៉ាទីណូ ថ្លែងថា រដ្ឋាភិបាលអេក្វាទ័រនៅតែស្មោះត្រង់ចំពោះប្រពៃណី ការពារពួកអ្នកដែលភៀសខ្លួនចូលមកជ្រកកោនក្នុងបណ្តាទីតាំងការទូតរបស់ខ្លួន ។ លោកពន្យល់ថា ការសម្រេចចិត្តនោះធ្វើឡើងក្រោយពីប្រទេសអង់គ្លេស ស៊ុយអែត និងសហរដ្ឋអាមេរិក បដិសេធមិនធានាថា លោក ASSANGE នឹងពុំត្រូវធ្វើបត្យាប័នទៅកាន់សហរដ្ឋអាមេរិកដើម្បីសួរចម្លើយពីរឿងចារកម្មក្រោយការចេញផ្សាយតាមវ៉េបសាយរបស់លោកនូវឯកសារការទូតអាមេរិកដល់ទៅ២៥០.០០០ច្បាប់ ។ នៅអាមេរិកលោក ASSANGE អាចត្រូវកាត់ទោសដោយតុលាការពិសេសឬយោធាហើយលោកអាចទទួលទោសប្រហារជីវិតទៀតផង។
លោក ASSANGE បានរត់ចូលស្ថានទូតអេក្វាទ័រ ប្រចាំទីក្រុងឡុងដ៍កាលពីថ្ងៃទី១៩ មិថុនា ដើម្បីស្នើសុំសិទ្ធិជ្រកកោននយោបាយ។ លោកសំដែងការអបអរសាទរចំពោះការសម្រេចចិត្តនោះរបស់អេក្វាទ័រដោយចាត់ទុកថានេះជាជោគជ័យដ៏សំខាន់មួយ ៕
ចែករំលែកព័តមាននេះ