ក្នុងឱកាសនៃសន្និសីទសារព័ត៌មានមួយលោកអូសាមូ ហ្វូជីមូរ៉ា អ្នកនាំពាក្យរបស់រដ្ឋាភិបាលជប៉ុនថ្លែងថា ជប៉ុនសម្រេចដោះលែងជនជាតិចិន១៤នាក់ដែលចាប់ខ្លួនកាលពីថ្ងៃទី១៥សីហាកន្លងមកនេះ ក្រោយពីពួកគេ៧នាក់ ក្នុងចំណោមពួកនោះអាចចុះទូកឡើងទៅលើកោះមួយក្នុងចំណោមប្រជុំកោះ DIAOYU ស្ថិតនៅសមុទ្រចិនខាងកើត ។
ប៉ូលិសកោះអូគីណាវា៉ ថ្លែងថា កាលពីព្រឹកថ្ងៃទី១៧ សីហា ជនជាតិចិនទាំង១៤នាក់ដែលជប៉ុនដោះលែងវិញនោះបានទៅដល់កំពង់ផែណាហា កោះអូគីណាវ៉ា ហើយពួកគេនឹងត្រូវប្រគល់ឱ្យដល់អាជ្ញាធរអន្តោប្រវេសន៍ ។ ពួកគេអាចត្រូវដោះលែងនារសៀលថ្ងៃទី១៧ សីហា បញ្ជូនតាមយន្តហោះឬតាមនាវា ហើយផែនការដទៃៗទៀតជាកម្មវត្ថុនៃការពិភាក្សាគ្នា ។
ទោះមានការរារាំងរបស់កងឆ្មាំឆ្នេរសមុទ្រជប៉ុន សកម្មជនចិនទាំង១៤នាក់នោះ បានទៅដល់ប្រជុំកោះ DIAOYU តាមនាវានេសាទមួយគ្រឿងរបស់ក្រុងហុងកុងដើម្បីទាមទារអធិបតេយ្យភាពរបស់ចិនលើប្រជុំកោះនោះ ។ ពួកគេត្រូវអាជ្ញាធរជប៉ុនចាប់ខ្លួនពីបទចូលដែនដីជប៉ុនដោយខុសច្បាប់ ៕
ចែករំលែកព័តមាននេះ