វ៉េបសាយមួយរបស់កាហ្សាក់ស្ថានបានបង្ហាញរូបភាពបញ្ចើចបញ្ចើពីទង្វើនៃការឈប់សំចតរថយន្តគួរឱ្យស្អប់ខ្ពើមបំផុតនៅលើពិភពលោករបស់ជនជាតិកាហ្សាក់ស្ថាន ក្នុងឥរិយាបថនានាជាច្រើន ។ ប្រព័ន្ធវ៉េបសាយខាងលើបានបើកឡើងពីសំណាក់អ្នកប្រើរថយន្តកាហ្សាក់ស្ថានម្នាក់ដែលស៊ូទ្រាំនឹងទង្វើនៃការឈប់សំចតរថយន្តដ៏គំរក់របស់មនុស្សនៅក្នុងប្រទេសនេះដើម្បីប្រើសម្រាប់បញ្ចើចបញ្ចើដល់អ្នកប្រើរថយន្តដែលចតគ្មានរបៀបនិងមិនក្រែងចិត្តអ្នកដទៃ ។
ការបើកសេវាកម្មខាងលើឃើញថា មានមនុស្សចូលរួមផ្តល់រូបភាពគួរឱ្យស្អប់ខ្ពើមទាំងនោះជាង១.៥០០រូបដើម្បីជាការបញ្ឈឺចិត្តចំពោះទង្វើខាងលើ ហើយវ៉េបសាយនេះក៏បានក្លាយជាទីពេញនិយមយ៉ាងខ្លាំង ។របាយការណ៍បញ្ជាក់ថា បច្ចុប្បន្នក្នុងប្រទេសកាហ្សាក់ស្ថានមានអត្រាមនុស្សជាម្ចាស់រថយន្តគឺ០,១៦៧នាក់ក្នុងមួយគ្រឿងដោយមានអ្នកប្រើរថយន្តចំនួន២,៧លាននាក់ ក្នុងចំណោមប្រជាជនចំនួន១៦,៥លាននាក់ ។
អ្នកជំនាញបញ្ជាក់ថា អត្តចរិតនៃការចតរថយន្តគួរឱ្យស្អប់ខ្ពើមបែបនេះអាចបណ្តាលមកពីស្ថានភាពសេដ្ឋកិច្ចរីកចម្រើនយ៉ាងឆាប់រហ័សរបស់កាហ្សាក់ស្ថាន និងការអភិវឌ្ឍនៅក្នុងរដ្ឋធានីធ្វើឱ្យមានការចាប់អារម្មណ៍គ្រប់ទីកន្លែងក្នុងការចតរថយន្ត ។
កាហ្សាក់ស្ថានជាប្រទេសមានចំណូលពីការលក់ប្រេងនិងឧស្ម័នយ៉ាងច្រើនជាហេតុធ្វើឱ្យប្រទេសនេះមានចំនួនរថយន្តសម្រាប់ប្រើប្រាស់កើនឡើងខ្ពស់ ៕
ចែករំលែកព័តមាននេះ