ខេត្តបន្ទាយមានជ័យ ៖ អនុវត្តតាមសេចក្តីណែនាំរបស់លោកអ៊ុង អឿន អភិបាលខេត្ត និងបទបញ្ជាដោយផ្ទាល់របស់លោកឧត្តមសេនីយ៍ត្រី ខេង ស៊ុម ស្នងការនគរបាលខេត្ត ស្តីពីការរៀបចំគ្រប់គ្រងថែរក្សាសណ្តាប់ធ្នាប់ និងសោភ័ណភាពតាមដងផ្លូវ ស្ពាននៅក្នុងខេត្ត កាលពីព្រឹកថ្ងៃទី១៦ សីហា ២០១២ កម្លាំងនគរបាលស្រុកមង្គលបុរីដឹកនាំដោយលោកវរសេនីយ៍ត្រី យ៉ត សុផល បានសហការជាមួយអាជ្ញាធរឃុំចំនួន៣ នៅតាមដងផ្លូវជាតិលេខ៥ ចុះរៀបចំសណ្តាប់ធ្នាប់នៅតាមទីប្រជុំជន (តូបលក់ដូរ) ដែលលយចូលមកលើដីចំណីផ្លូវបង្កឲ្យមានការប៉ះពាល់ដល់ការធ្វើដំណើរលើដងផ្លូវសាធារណៈ។
លោកវរសេនីយ៍ត្រី យ៉ត សុផល អធិការនគរបាលស្រុកមង្គលបុរី បាននិយាយថា ដោយពិនិត្យឃើញកន្លងមកនៅទីប្រជុំជនផ្សារបន្ទាយនាង ក្នុងឃុំបន្ទាយ ផ្សារភ្នំធំក្នុងឃុំអូរប្រាសាទ និងផ្សារភ្នំតូចក្នុងឃុំភ្នំតូច នៃស្រុកមង្គលបុរី មានភាពអនាធិបតេយ្យដែលបងប្អូនអាជីវករមួយចំនួនបានធ្វើតូបលក់ដូរ ដោយរំលោភបំពានមកលើដីចំណីផ្លូវ ចិញ្ចើមផ្លូវជាញឹកញាប់ដែលតែងតែបង្កឲ្យមានគ្រោះថ្នាក់ចរាចរណ៍ ជាងនេះទៅទៀតគឺធ្វើឲ្យបាត់បង់នូវសណ្តាប់ធ្នាប់សាធារណៈ ម្យ៉ាងទៀតផ្លូវនេះ ក៏មានរថយន្តតូចធំ ភ្ញៀវជាតិ និងអន្តរជាតិធ្វើដំណើរឆ្លងកាត់ផងនោះ។ ដូច្នេះដើម្បីលំអសោភ័ណភាពឲ្យបានល្អ និងបញ្ចៀសនូវការគ្រោះថ្នាក់ជាយថាហេតុ លោកឧត្តមសេនីយ៍ត្រី ខេង ស៊ុម ស្នងការនគរបាលខេត្ត នៅក្នុងឱកាសប្រជុំប្រចាំសប្តាហ៍កន្លងទៅនេះបានដាក់ផែនការឲ្យលោកដឹកនាំកម្លាំងជំនាញ និងកម្លាំងនគរបាលប៉ុស្តិ៍សហការជាមួយអាជ្ញាធរឃុំ រៀបចំសណ្តាប់នៅតាមទីផ្សារទាំង៣កន្លែងខាងលើ ឲ្យមានសណ្តាប់ធ្នាប់ល្អ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ