រាជធានីភ្នំពេញ ៖ លោកស្រី ស៊ុន សាភឿន រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាប្រធានសមាគមនារីអាស៊ានមានប្រសាសន៍ថា ដោយនយោបាយចែករំលែកតាមមាគ៌ាដ៏ត្រឹមត្រូវ និងភ្លឺស្វាងរបស់រាជរដ្ឋាភិបាលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងដោយទឹកចិត្តមនុស្សធម៌របស់ខ្លួនសមាគមនារីអាស៊ានបានខិតខំបំពេញបេសកកម្មមនុស្សធម៌នេះ ដើម្បីជួយសម្រាលទុក្ខលំបាកក្មួយៗក៏ដូចជាអ្នកទទួលខុសត្រូវនៅទីនេះ ។
លោកស្រីប្រធានសមាគមមានប្រសាសន៍បែបនេះ ក្នុងឱកាសដែលសមាគមនារីអាស៊ានចុះសួរសុខទុក្ខ និងនាំយកអំណោយទៅចែកឱ្យកុមារដែលផ្ទុកមេរោគអេដស៍ចំនួន១០៣នាក់ ក្នុងនោះមានកុមារីចំនួន៥១នាក់ ត្រូវបានទទួលការព្យាបាល និងថ្នាំពន្យារពីមន្ទីរពេទ្យកុមារជាតិ នាព្រឹកថ្ងៃទី១៧ សីហា ២០១២ នៅអគារស្ពានឥន្ធធនូ ក្នុងបរិវេណមន្ទីរពេទ្យព្រះកេតុមាលា ។ លោកស្រី មានប្រសាសន៍បន្តថា អំណោយដែលសមាគមនារីអាស៊ាន និងសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍នៃក្រសួងការបរទេសយកមកចែកជូនក្មួយៗនៅពេលនេះគឺបានមកពីការចូលរួមវិភាគទានពីសមាជិក សមាជិកា កិត្តិយសរបស់សមាគមដែលតែងតែមានសន្តានចិត្តមនុស្សធម៌ជួយគាំទ្រដល់សកម្មភាពមនុស្សធម៌របស់សមាគម ។
លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងក្រសួងសុខាភិបាលតែងយកចិត្តទុកដាក់ក្នុងការជួយអ្នកផ្ទុកមេរោគអេដស៍ ដោយបានផ្តល់ជាជំនួយ និងអនុសាសន៍ល្អៗដល់អ្នកជំងឺ និងអ្នកមិនទាន់ឈឺឱ្យមានវិធានការការពារខ្លួនឱ្យបានល្អប្រសើរ ។ ដោយសារអនុសាសន៍ដ៏មានសារសំខាន់នេះ បច្ចុប្បន្នអត្រាអ្នកផ្ទុកមេរោគអេដស៍នៅកម្ពុជាបានថយចុះជាលំដាប់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ