រាជធានីភ្នំពេញ ៖ ស្រី្តជនជាតិថៃ៤នាក់បានត្រូវសាលាដំបូងរាជធានី សម្រេចឃុំខ្លួនដាក់ពន្ធនាគារជាបណ្តោះអាសន្ន ពាក់ព័ន្ធនឹងការជួញដូរគ្រឿងញៀនជាង២០គីឡូក្រាម ឆ្លងដែន ដោយខុសច្បាប់ ។ ស្ត្រីជនជាតិថៃ៤នាក់នោះមាន ១-ឈ្មោះ Rodsiri Rung Tiwa អាយុ២៤ឆ្នាំ ២-ឈ្មោះ Piw Jansod Utsanee អាយុ ២០ឆ្នាំ ៣-ឈ្មោះ Phumdee Varangkana អាយុ២៩ឆ្នាំ និង៤-ឈ្មោះ Tangboon Ketkarn អាយុ២៩ឆ្នាំ ។
គួរបញ្ជាក់ថា សាលាដំបូងរាជធានីភ្នំពេញ សម្រេចឃុំខ្លួនស្រ្តីជនជាតិថៃទាំង៤នាក់នេះ បន្ទាប់ពីរយៈពេលតែ១សប្តាហ៍ក្នុងខែសីហា ការិយាល័យគយនិងរដ្ឋាករអាកាសយានដ្ឋានអន្តរជាតិភ្នំពេញ បង្ក្រាបក្រុមជួញដូរគ្រឿងញៀនឆ្លងដែនខុសច្បាប់បានចំនួន៣ករណី និងឃាត់ខ្លួនជនសង្ស័យទាំង៤នាក់ ព្រមទាំងដកហូតគ្រឿងញៀនប្រភេទម្សៅេមតំហ្វេតាមីន និងកូកាអុីនបានជាង២០គីឡូក្រាម ដែលពួកគេនាំមកឆ្លងកាត់កម្ពុជាបម្រុងនាំចេញទៅប្រទេស ថៃ។ ករណីបង្ក្រាបគ្រឿងញៀនជាង២០គីឡូក្រាម នេះគឺចាប់បាននៅថ្ងៃទី៧ សីហា, ១៣ សីហា និង១៤ សីហា នៅអាកាសយានដ្ឋានអន្តរជាតិភ្នំពេញដែលជនសង្ស័យដាក់ក្នុងវ៉ាលីសនាំមកពីក្រៅប្រទេស ដោយឆ្លងកាត់ប្រទេសកម្ពុជាក្នុងបំណងនាំទៅកាន់ប្រទេសថៃ ។
បន្ទាប់ពីសមត្ថកិច្ចគយនិងរដ្ឋាករអាកាសយានដ្ឋានឃាត់ខ្លួនហើយស្ត្រីជនជាតិថៃទាំង៤នាក់រួមជាមួយវត្ថុតាងត្រូវបានប្រគល់ជូនទៅឱ្យនគរបាលមន្ទីរប្រឆាំងគ្រឿងញៀនក្រសួងមហាផ្ទៃ ដើម្បីកសាងសំណុំរឿងទៅសាលាដំបូងរាជធានីភ្នំពេញ តាមនីតិវិធីច្បាប់ ។យោងទៅលើចម្លើយគ្រប់គ្រាន់ និងវត្ថុតាងច្បាស់លាស់ហើយនោះតំណាងអយ្យការអមសាលាដំបូងរាជធានី បានធ្វើការចោទប្រកាន់ពួកគេជាផ្លូវការ និងបានចាត់បញ្ជូនទៅខាងចៅក្រមសម្រេចឃុំខ្លួនតែម្តង ៕
ចែករំលែកព័តមាននេះ