ខេត្តកំពង់ចាម ៖ រហូតមកដល់បច្ចុប្បន្នគណៈកម្មការបច្ចេកទេស ព្រំដែនប្រទេសទាំង២ (កម្ពុជា-វៀតណាម) បានឯកភាពគ្នាបោះបង្គោលសីមាសរុបបានចំនួន៦០បង្គោល ក្នុងនោះភូមិសាស្រ្តគ្រប់គ្រងរបស់វរសេនាតូចនគរបាលការពារព្រំដែនលេខ៦១៥ មាន២៨បង្គោល និងនៅក្នុងភូមិសាស្រ្តគ្រប់គ្រងដោយវរសេនាតូចនគរបាលការពារពំ្រដែនលេខ៦១៧ មាន៣២បង្គោល។ នេះគឺជាប្រសាសន៍របស់លោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្តថ្លែងនៅក្នុងកិច្ចប្រជុំបូកសរុបសហប្រតិបត្តិការរវាងនគរបាលស្រុកមេមត់ និងនគរបាលស្រុកឡុកនិញ ខេត្តប៊ិញភឿក-ស្រុកតាំងចូវ ខេត្តតៃនិញ (វៀតណាម) កាលពីព្រឹកថ្ងៃទី១៦ សីហា នៅក្នុងសាលប្រជុំនៃអធិការដ្ឋាននគរបាលស្រុកមេមត់ ប្រចាំឆមាសទី១ និងលើកទិសដៅឆមាសទី២ ឆ្នាំ២០១២ ជាមួយនឹងភាគីវៀតណាមដឹកនាំដោយលោកវរសេនីយ៍ឯក វ៉ ហុងមិន ប្រធាននគរបាលស្រុកឡុកនិញ ។
លោកវរសេនីយ៍ត្រី ឯម កុសល អធិការនគរបាលស្រុកមេមត់ បានឲ្យដឹងថា ជាមួយនោះដែរភាគីទាំង២បានឯកភាពវាយតម្លៃរាល់សភាពការណ៍ និងលទ្ធផលការងារសហការរយៈពេល១ឆមាសដើមឆ្នាំ២០១២ ជាមួយនឹងការលើកឡើងនូវខ្លឹមសារស្តីពីការបង្កើនកិច្ចសហការក្នុងការតស៊ូទប់ស្កាត់ប្រយុទ្ធប្រឆាំងនឹងបទល្មើស ដើម្បីការពារសន្តិសុខព្រំដែនរយៈពេល៦ខែដើមឆ្នាំ២០១២ នេះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ