រាជធានីភ្នំពេញ ៖ មហោស្រពវីដេអូនិងខ្សែភាពយន្តកុមារអន្តរជាតិអាស៊ីលើកទី៤ ដែលរៀបចំដោយស្ថានទូតជប៉ុនប្រចាំកម្ពុជា បានឈានដល់វគ្គពាក់កណ្តាលផ្តាច់ព្រ័ត្រដើម្បីជ្រើសរើសយកទៅចូលរួមប្រឡងក្នុងវគ្គផ្តាច់ព្រ័ត្រនៅថ្ងៃទី២៤ ខែវិច្ឆិកា នាទីក្រុងមីណាអារ៉ាជី ប្រទេសជប៉ុន ។
ក្រោយពីកម្មវិធីប្រឡងគណៈកម្មការវិនិច្ឆ័យបានពិនិត្យយ៉ាងយកចិត្តទុកដាក់និងផ្តល់ពិន្ទុទៅលើរឿងខ្លីចំនួន៣រឿងឱ្យជាប់ជាចំណាត់ថ្នាក់ និងជ្រើសរើសទៅចូលរួមក្នុងមហោស្រពនៅប្រទេសជប៉ុន ។ ខ្សែភាពយន្តខ្លីទាំង៣រឿងនោះរួមមានរឿង«សុភមង្គលនៃជីវិត» ដែលជាស្នាដៃសិស្សវិទ្យាល័យវត្តកោះ, រឿង«អត្ថន័យជីវិត» ស្នាដៃសិស្សវិទ្យាល័យទួលទំពូង និងរឿង«ជីវិត»ស្នាដៃសិស្សវិទ្យាល័យសេរីភាព ។
កម្មវិធីប្រឡងជ្រើសរើសវគ្គពាក់កណ្តាលផ្តាច់ព្រ័ត្ររៀបចំឡើងកាលពីថ្ងៃទី១៦ សីហា ឆ្នាំ២០១២ នៅមជ្ឈមណ្ឌលសហប្រតិការកម្ពុជា-ជប៉ុន ដោយមានការអញ្ជើញចូលរួមជាអធិបតីពីលោកអ៊ិន ថេរ អនុរដ្ឋលេខាធិការក្រសួងអប់រំយុវជន និងកីឡា និងលោកយ៉ូស៊ីហ្វ៊ីរ៉ូ ហ៊ីហ្គ៊ឈិ មន្ត្រីស្ថានទូតជប៉ុនប្រចាំកម្ពុជា ។
ក្នុងពិធីបើកកម្មវិធីប្រឡងជ្រើសរើសវគ្គពាក់កណ្តាលផ្តាច់ព្រ័ត្រនោះមន្ត្រីតំណាងស្ថានទូតជប៉ុនបញ្ជាក់ថា កម្មវិធីប្រឡងជ្រើសរើសខ្សែវីដេអូ និងខ្សែភាពយន្តកុមារអន្តរជាតិអាស៊ីនៅកម្ពុជារៀបចំឡើងដោយស្ថានទូតជប៉ុនប្រចាំកម្ពុជាសហការជាមួយក្រសួងអប់រំ យុវជន និងកីឡា ក្នុងគោលបំណងបង្កើនការយល់ដឹងពីគ្នាទៅវិញទៅមកក្នុងចំណោមសិស្សនៃតំបន់អាស៊ី។ ប្រធានបទនៃមហោស្រពឆ្នាំនេះមានចំណងជើងថា«អត្ថន័យនៃជីវិត»។
លោកយ៉ូស៊ីហ្វ៊ីរ៉ូ ហ៊ីហ្គ៊ឈិ បញ្ជាក់ថា ខ្សែភាពយន្តខ្លីរយៈពេល៣នាទីចំនួន៣៦គ្រឿង ដែលជាស្នាដៃរបស់សិស្សវិទ្យាល័យចំនួន៨ នៅក្នុងនិងជុំវិញរាជធានីភ្នំពេញ ក្នុងនោះខ្សែភាពយន្តចំនួន១៦គ្រឿងត្រូវបានជ្រើសរើសយកមកបង្ហាញជូននៅក្នុងកម្មវិធីប្រឡងវគ្គពាក់កណ្តាលផ្តាច់ព្រ័ត្រ ។ លោកបន្ថែមថា សិស្សនៃវិទ្យាល័យចំនួន៩រូប ដែលទទួលបានជ័យលាភីនឹងត្រូវអញ្ជើញទៅចូលរួមប្រឡងវគ្គផ្តាច់ព្រ័ត្រនៅប្រទេសជប៉ុនដែលមានសិស្សមកពីវិទ្យាល័យនៃប្រទេសឡាវ, មីយ៉ាន់ម៉ា, ថៃ, វៀតណាម, ចិន, កូរ៉េ, តៃវ៉ាន់, ម៉ាឡេស៊ី, ម៉ុងហ្គោលី និងជប៉ុន ។
លោកអ៊ិន ថេរ អនុរដ្ឋលេខាធិការក្រសួងអប់រំ យុវជន និងកីឡាមានប្រសាសន៍ថា មហោស្រពនៅឆ្នាំ២០១២នេះ ក្រសួងបានកំណត់យកវិទ្យាល័យចំនួន៨ នៅរាជធានីភ្នំពេញ រួមមានវិទ្យាល័យហ៊ុន សែន ប៊ុន រ៉ានី វត្តភ្នំ, វិទ្យាល័យវត្តកោះ, វិទ្យាល័យទួលទំពូង, វិទ្យាល័យជា ស៊ីម សន្ធរម៉ុក, វិទ្យាល័យបាក់ទូក, វិទ្យាល័យជា ស៊ីម ជ្រោយចង្វា, វិទ្យាល័យឫស្សីកែវ, វិទ្យាល័យជា ស៊ីម សាមគ្គី និងវិទ្យាល័យខេត្តកណ្តាលចំនួន២ទៀត គឺវិទ្យាល័យហ៊ុន សែន សេរីភាព និងវិទ្យាល័យហ៊ុន សែន តាខ្មៅ ដោយមានសិស្សចូលរួមចំនួន១៥០នាក់ចែកជាក្រុម ក្នុងមួយក្រុមមានសិស្ស៣នាក់ផលិតរឿងខ្លីរយៈពេល៣នាទី ។
លោកអនុរដ្ឋលេខាធិការថ្លែងកោតសរសើរចំពោះសិស្សទាំងអស់ដែលខិតខំប្រឹងប្រែងយកអស់ពីសមត្ថភាពក្នុងការផលិតរឿងខ្លីដើម្បីចូលរួមក្នុងការប្រលងជ្រើសរើសជាលក្ខណៈអន្តរជាតិ ។ លោកក៏ថ្លែងអំណរគុណចំពោះស្ថានទូតជប៉ុនប្រចាំកម្ពុជាដែលតែងតែជួយផ្តល់ការអភិវឌ្ឍហេដ្ឋារចនាសម្ព័ន្ធនៅកម្ពុជា ពិសេស វិស័យអប់រំ ដែលជាមុំមួយនៃយុទ្ធសាស្ត្រចតុកោណរបស់រាជរដ្ឋាភិបាល ៕
ចែករំលែកព័តមាននេះ