រាជធានីភ្នំពេញ ៖ ពីខេត្តបន្ទាយមានជ័យមានសេចក្តីរាយការណ៍ថា កាលពីវេលាម៉ោងជាង៩យប់ថ្ងៃទី១៦ សីហា មានករណីបោកគ្រាប់បែកចូលក្នុងក្រុមផឹកស៊ីមួយកន្លែងជិតស្ពានកោះកែវ ស្ថិតនៅក្នុងភូមិកោះកែវ ឃុំប្ញស្សីក្រោម ស្រុកមង្គលបុរី បណ្តាលឲ្យមនុស្ស៤នាក់ បានរបួសធ្ងន់ និងស្រាល ។
ការវាយប្រហារដោយគ្រាប់បែកដៃនេះ ត្រូវបានសមត្ថកិច្ចអះអាងថា គឺជារឿងគំនុំ ពេលនេះប៉ូលិសកំពុងតែស្រាវជ្រាវរកជនដៃដល់យ៉ាងដុតដៃដុតជើងហើយ ។ ក្រោយពីបោកគ្រាប់បែកភ្លាមជនបង្កបានរត់គេចខ្លួនបាត់ ចំណែកជនរងគ្រោះវិញដេករដូករណែលត្រូវបានគេដឹកបញ្ជូនទៅមន្ទីរពេទ្យមិត្តភាពកម្ពុជា-ជប៉ុន ស្រុកមង្គលបុរី ដើម្បីសង្រ្គោះភ្លាមៗ។
ជនរងគ្រោះមាន ១-ឈ្មោះឡោ គង់ ភេទប្រុស អាយុ៣៥ឆ្នាំ ម្ចាស់ផ្ទះទទួលរងរបួសចំខ្នង៣កន្លែង និងកំភួនជើងឆ្វេង១កន្លែង (ស្រាល) ២-ឈ្មោះប៊ុន បូវាសនា ភេទស្រី អាយុ៣១ឆ្នាំ ត្រូវជាប្រពន្ធម្ចាស់ផ្ទះ ទទួលរងរបួសចំភ្លៅ ខាងឆ្វេង១កន្លែង (ស្រាល) ៣-ឈ្មោះវ៉ា យិញ ភេទប្រុស អាយុ៣៨ឆ្នាំ ទទួលរបួសចំចុងចិញ្ចើមឆ្វេង១កន្លែង (ស្រាល) និង៤-ឈ្មោះឡាយ ឆៃណា ភេទស្រី អាយុ៣៨ឆ្នាំ ទទួលរងរបួសចំក្រោមក្បាលជង្គង់ស្តាំ១កន្លែង (រងរបួសមធ្យម) នារីរងគ្រោះម្នាក់នេះ ត្រូវជាប្រពន្ធឈ្មោះវ៉ា យិញ រស់នៅភូមិប្ញស្សីក្រោក ឃុំប្ញស្សីក្រោក ស្រុកមង្គលបុរី ។
ប្រភពព័ត៌មានបានឲ្យដឹងថា សមត្ថកិច្ចបានចុះធ្វើការស្រាវជ្រាវនៅកន្លែងកើតហេតុប្រាប់ថា គ្រាប់បែកដៃនោះជាប្រភេទគ្រាប់បែកមីនីផលិតនៅប្រទេសចិន តាមការសន្និដ្ឋានរបស់សមត្ថកិច្ចជាជំហានដំបូងអះអាងថា ករណីនេះគឺរឿងគំនុំក្នុងការងាររកស៊ី(កិបកេងផលប្រយោជន៍តែម្នាក់ឯង) បច្ចុប្បន្ន សមត្ថកិច្ចកំពុងធ្វើការតាមដាន និងស្រាវជ្រាវយ៉ាងយកចិត្តទុកដាក់តាមជំនាញ ដើម្បីស្វែងរកចាប់ខ្លួនមុខសញ្ញាជនបង្កគ្រោះថ្នាក់យកមកចាត់ការតាមច្បាប់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ